Klei Aê Diê Blŭ: Y-Mathiơ 23:13-15
Êlan kliăng: “Kyuadah Ñu thâo kral hlei pô jing phung mplư; tơdah Ñu ƀuh klei wê, amâo djŏ hĕ Ñu srăng dôk mĭn kơ klei anăn?” (Y-Yôp 11:11)
Klei êmuh ksiêm mĭn: Khua Yang Yêsu phat kđi phung Pharisi kơ ya klei? Ya ngă Ñu phat kđi digơ̆? Si drei srăng hdĭp čiăng amâo tŭ klei Khua Yang phat kđi jing phung ai ngăm ôh?
Hlăm Y-Mathiơ 23:13-33 lu blư̆ Khua Yang Yêsu yua pruê̆ blŭ “knap mñai yơh kơ diih” čiăng phat kđi phung khua čih hră leh anăn phung Pharisi. Anei jing pruê̆ blŭ amâo djŏ knŏng bi êdah klei bi kčŭt hlăm ai tiê ôh, ƀiădah jing sa klei hưn kơ klei phat kđi Khua Yang pioh kơ phung anei. “Knap mñai yơh kơ diih” bi êdah klei Khua Yang Yêsu ngêñ tơdah dlăng kơ bruă ngă leh anăn klei dôk dơ̆ng ƀơ̆ng huă phung khua čih hră leh anăn phung Pharisi, jing phung khua gĭt gai klei đăo hlăm ênuk anăn.
Hlăm trăn Klei Aê Diê Blŭ anei, Khua Yang Yêsu phat kđi klei ai ngăm diñu, boh blŭ “ai ngăm” čiăng lač kơ phung ngă sen, si tô hmô klei diñu blŭ amâodah knuih diñu bi êdah ti dlông knưl jing knŏng klei ngă sen đuč. Boh sĭt gơ̆ phung khua čih hră leh anăn phung Pharisi dôk mplư phung mkăn, diñu mĭn diñu thâo kral Aê Diê, ƀiădah boh sĭt gơ̆ diñu amâo thâo kral ôh; diñu mĭn diñu jing phung dĭng ktang kơ Aê Diê ƀiădah Aê Diê amâo tuôm tiŏ nao diñu ôh; diñu mĭn diñu mŭt leh hlăm Ƀuôn Ala Mtao Aê Diê ƀiădah boh sĭt gơ̆ ti hruê knhal tuč Khua Yang lač Khua Yang amâo thâo kral diñu ôh (Y-Mathiơ 7:23). Phung khua čih hră leh anăn phung Pharisi jing phung dôk ghă mnuih mkăn mŭt hlăm Ƀuôn Ala Mtao Aê Diê, êgao hĭn kơnăn, diñu jing phung dôk dưm klei ktrŏ ti mra phung gưt kơ diñu tơdah diñu mtrŭn lu klei bhiăn, lu klei mtrŭn; diñu mjing phung hur har tui hlue klei đăo phung Yuđa jing “anak čô war pui dua blư̆ jhat hĭn kơ diñu pô” (êlan 15), čiăng lač amâo lŏ mâo sa klei čang hmăng ôh.
Khua Yang Yêsu lač: “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng Kâo” (Y-Yôhan 14:6). Klei Khua Yang blŭ ƀuăn rơ̆ng kơ phung đăo kơ Ñu srăng mâo sa klei bi êdah kluôm ênŭm leh anăn sa anôk jăk jĭn Ñu pioh leh kơ hlei pô đăo kơ Ñu. Khua Yang Yêsu jing Pô trŭn mơ̆ng adiê kyuanăn Ñu dưi brei drei thâo kral Aê Diê Ama leh anăn kơ Ƀuôn Jăk mbĭt hŏng jih jang klei Ñu hưn jing sĭt sơăi: “Amâo mâo sa čô mnuih tuôm ƀuh Aê Diê ôh; Anak mâo knŏng sa čô, Gơ̆ jing Aê Diê mơh, Pô dôk ti djiêô Ama, Gơ̆ yơh bi êdah leh Aê Diê arăng amâo tuôm ƀuh ôh” (Y-Yôhan 1:18). Kyuanăn, phung anak Aê Diê sĭt jing phung mă tŭ klei thâo mĭn mơ̆ng dlông amâo srăng dôk dơ̆ng ƀơ̆ng huă hŏng klei ai ngăm ôh (Y-Yakơ 3:17). Brei drei hdĭp hŏng klei sĭt nik hŏng Aê Diê leh anăn hŏng drei pô, brei drei thâo kơ klei awăt, klei soh drei čiăng kơ drei kmhal hĕ hŏng Khua Yang, akâo Ñu bi ktang drei čiăng drei mâo klei dưi. Brei drei dôk dơ̆ng hŏng klei sĭt nik msĕ mơh hŏng phung ayŏng amai adei drei, bi đru hdơ̆ng drei dôk kjăp leh anăn đĭ hriê kơ prŏng hlăm klei đăo. Đăm drei blŭ amâodah ngă klei bi ktrŏ kơ pô mkăn ôh, huĭdah phung ayŏng amai adei drei mâo klei rŭng răng, huĭ leh anăn luč klei čang hmăng hlăm klei đăo. Brei drei blŭ klei jăk, klei bi mđĭ ai hdơ̆ng drei.
Drei dôk hdĭp ai ngăm ti anăp Aê Diê leh anăn ti anăp pô mkăn mơ̆?
Wah lač: Ơ Khua Yang, Pô thâo klă ai tiê kâo. Đru kâo amâo ngă ai ngăm ôh ƀiădah hdĭp hŏng klei sĭt nik ti anăp Ih leh anăn phung riêng gah kâo čiăng kơ klei kâo blŭ, bruă kâo ngă mâo klei bi mđĭ ai, bi mđĭ klei đăo pô mkăn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
