Mathiơ 23:13-15
“ Sư băt kơ lu bơngai hơlĕnh, lăng ‘bôh đĭ tơdrong yoch, Lei Sư ưh kơ băt hơđăl hă?” (Jop 11:11)
Nơ̆r jet tơchĕng pơwao:
– Kră Yang Yêsu chrih kơ lu bơngai Pharisi gah tơdrong kiơ?
– Yua kơ kiơ Kră Yang chrih kơ lu sư?
– Lu bơ̆n kăl kơ arih thoi yơ wă kơ Kră Yang huei kơ chrih khan ‘bơ̆r đak klak ŭnh?
Mathiơ 23:13-33 khan tơbăr lơ wơ̆t yua nơ̆r “pơmat-tat dêh kơ lu iĕm” wă chrih kơ lu thây bơtho khôi juăt păng bơngai Pharisi. ‘nâu ưh kơ sĭ minh nơ̆r pơma tơ’bôh jơhngơ̆m mơnat, mă wă tơ’bôh khan tơbăt gah tơdrong Kră Yang sek tơlang ‘măn kơ lu bơngai noh. “pơmat-tat dêh kơ lu iĕm” pơdah đơ̆ng lăm jơhngơ̆m Kră Yang Yêsu ơh blĕk ưh kơ lăp đon yua kơ lăng lăm tơdrong jang păng tơdrong arih lu thây bơtho khôi juăt păng bơngai Pharisi, lu sư noh bơih khul bơngai pơgơ̆r tơdrong lui chăl noh sơ̆.
Lăm sơ̆p Hla Bơar ‘Bok Kei-Dei ‘nâu, Kră Yang Yêsu chrih kơ lu sư, nơ̆r “bơngai ‘bơ̆r đak klak ŭnh” wă kơ pơm tơ ‘bôh kơ đe lăng gah ‘nguaih đĕch, wă khan nơ̆r pơma dah lăm jơhngơ̆m lu sư tơ’bôh tơ anih pơdah wă kơ đe lăng. Lăm tơđrong lu thây bơtho khôi juăt păng bơngai Pharisi, lu sư oei hơlĕnh bơngai nai, lu sư tơchĕng đĕch khan lu sư hlôh băt gah ‘Bok Kei-Dei mă tơpă lu sư ưh tam mă hllôh băt, lu sư tơchĕng khan lu sư bơih bơngai mă đơ̆ng Kră Yang wơh lu sư mă tơpă Kră Yang ưh kơ wơh lu sư, lu sư tơchĕng hơmĕng ngeh gơh mơ̆t tơ Plei ‘Lơ̆ng mă tơpă lăm năr tôch ning mônh Kră Yang khan ưh kơ băt kơ lu sư! (Mathiơ 7:23) lu thây bơtho khôi juăt păng lu bơngai Pharisi noh bơih khul bơngai mă oei pơgăn bơngai nai mơ̆t lăm Plei ‘Lơ̆ng, hloh kơ noh dơ̆ng, lu sư kư̆m thoi bơngai atŏk dơ̆ng tơdrong pŭ trăp kơ lu bơngai mă oei mơ̆ng kiơ̆ sư kơ plah lư sư chă trong kơdih dan lơ tơdrong khôi juăt, lu tơdrong hơgăt lê̆, lư sư pơm ăn kơ bơngai Juđê phara biơ̆ “ jing bơngai ‘bar wơ̆t oei lăm dơnâu ŭnh” (trong 15), wă khan ưh pă đei bơih tơdrong hơmĕng.
Kră Yang Yêsu khan: Inh boih trong iĕm năm tŏk tơ ‘Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai ‘noh ưh kơ truh tơ ‘Bă Inh ôh.” (Yôhan 14:6). Nơ̆r Kră Yang pơma pơsĭt kơ lu bơngai mă lui gơnang kơ Kră Yang gah tơdrong tơ’bôh hlôh tôm păng minh anih đei pŭn hiôk Kră Yang ăn kơ lu bơngai lui kơ Sư. Kră Yang Yêsu bơih mă Tơ’ngla đơ̆ng plĕnh thoi noh Sư roi tơbăt gah ‘Bok Kei-Dei păng gah Plei ‘Lơ̆ng hăm lơ tơdrong Kră Yang tơ’bôh noh trŏ kơ lui ngeh: “Kră Yang ‘Bok Kei-Dei, ưh kơ đei bu gơh ‘bôh Sư, lăp minh ‘nu Kon pôm Sư đĕch ‘bôh Sư păng oei hơdai Sư tơpă. Kon Sư tơbăt ăn kơ bơ̆n tơdrong ‘Bă Sư.” (Yôhan 1:18). Thoi noh, jing kon Sư tơpă noh lu bơngai song iŏk gơh hơgei đơ̆ng plĕnh ưh kơ arih “‘bơ̆r đak klak ŭnh” (Yakơ 3:17). Lu bơ̆n kăl kơ arih tơpăt hăm Kră Yang păng bơ̆n kơdih, lu bơ̆n băt kơdih oei rơdu, lu tơdrong yoch bơ̆n kơdih tơbral ‘bơ̆t anăp Kră Yang, gơnang kơ Sư ăn kơ lu bơ̆n jơhngơ̆m pran kĕ jei, lu bơ̆n athei arih tơpăt hăm lu ‘nhŏng mai oh bơ̆n, tơgŭm băl dơ̆ng kơjăp păng wơ̆ tơ̆l lăm đon lui. Lu bơ̆n ưh kơ gơh pơma tơdrong kiơ mă pơm trăp ăn kơ bơngai nai dah ‘nhŏng mai oh jing tơtăm, hli tơ rơ păng hiong tơdrong hơmĕng lăm đon lui, athei ling lang iŏk nơ̆r pơma tưk tơiung, pơlung dih băl.
Kơkuh kơ Ih Kră Yang, Ih bơih Tơ’ngla băt tôm tơdrong lăm jơhngơ̆m inh, apĭnh Ih tơgŭm inh huei kơ arih ‘bơr đak klak ŭnh mă-lei arih tơpăt ‘bơ̆t anăp Kră Yang păng lu bơngai jum dăr kơ inh wă kơ nơ̆r pơma, tơdrong jang inh ling lang tơiung bơngai nai. krao khan yua anăn Kră Yang Yêsu Krist, Amen.
Lu bơ̆n hăm oei đei arih ‘bơ̆r đak klak ŭnh mă bơ̆t năp Kră Yang dah bơngai nai?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Tơdrong Jang 1
Kênh Youtube BHKTHN:
