Klei Aê Diê Blŭ: I Bruă Mtao 12:26-33
Êlan kliăng: “Đăm ih ngă ôh kơ ih pô rup krah thâodah rup mnơ̆ng hlăm adiê ti dlông, hlăm lăn ala ti gŭ, amâodah hlăm êa ti gŭ lăn.” (Klei Kbiă 20:4)
Klei êmuh ksiêm mĭn: Hŏng ya klei dleh mtao Y-Jêrôbôam dôk tlă anăp? Ya klei mgaih mkra mtao ngă leh? Si klei mplư dưi truh kơ drei tui duah klei mgaih mkra leh anăn klei kkuh mpŭ soh čhuai?
Pluh găp djuê tĭng dưr Israel kgŭ bi kdơ̆ng hŏng mtao Y-Rôbôam leh anăn bi mđĭ Y-Jêrôôam mjing mtao kơ diñu (I Bruă Mtao 12:12-19). Leh mâo klei êđăp ênang, mtao Y-Jêrôbôam tlă anăp hŏng sa klei yuôm jing: Klei kkuh mpŭ kơ Aê Diê. Hlăk anăn, phung ƀuôn sang tĭng kơ dưr ăt wĭt kơ ƀuôn Yêrusalem ƀiă
êdi tlâo blư̆ hlăm sa thŭn nao bi kƀĭn grăp truh knăm prŏng, Knăm Klei Găn, Knăm Huă Mnăm Hruê Kăm leh anăn Knăm Sang Čhiăm (Klei Mtô Mñă Klei Bhiăn 16:16). Kyuanăn, mtao Y-Jêrôbôam huĭ phung ƀuôn sang lŏ wĭt kơ mtao Y-Rôbôam.
Čiăng mgaih mkra klei dleh anei, mtao Y-Jêrôbôam mtă brei ngă rup dua drei êđai êmô mah pioh kơ phung ƀuôn sang kkuh mpŭ (êlan 28-29). Năng ai mtao tui Y-Arôn (Klei Kbiă 32:1-10) čiăng đăm phung ƀuôn sang kgŭ bi kdơ̆ng hŏng klei mtao kiă kriê. Mtao Y-Jêrôbôam thâo sĭt nik boh jhat Y-Arôn leh anăn phung ƀuôn sang Israel hlăk anăn tŭ leh tơdah diñu kkuh kơ rup yang êđai êmô mah, ƀiădah năng ai kyua ñu huĭ đei luč ƀuôn ala mtao ñu snăn ñu amâo lŏ uêñ kơ boh jhat truh ôh. Klei ñu uêñ jing mgaih mkra hĕ ya klei truh ti anăp ală ñu đuč. Hruê anei, năng ai drei ăt tuôm ngă klei msĕ snăn mơh tơdah duah prăk amâo kpă ôh čiăng mgaih mkra djăl klei kƀah prăk kăk, amâodah blŭ luar tơdah ti anăn klei huĭ hyưt, amâodah ư ai mbĭt hŏng klei amâo sĭt nik kyua čiăng mâo klei tŭ dưn kơ pô.
Čiăng ngă tui si hdră mkra anei, mtao Y-Jêrôbôam mdơ̆ng dua anôk pioh kkuh mpŭ mrâo ti ƀuôn Bêthel leh anăn ti ƀuôn Dan. Ƀuôn Bêthel dôk tĭng dhŭng hĭn hŏng ƀuôn ala mtao čar dưr, knŏng kbưi hlăm brô 15km, bi ƀuôn Dan dôk tĭng dưr hĭn. Klă nik klei mtao kñăm čiăng ênưih kơ phung ƀuôn sang êrô êbat nao kkuh mpŭ yơh. Leh anăn hdră mtao mkra mâo klei tŭ jing leh (êlan 30). Mtao Y-Jêrôbôam thâo săng snăk kơ phung ƀuôn sang leh anăn lŏ wĭt lač djŏ tui si klei diñu hmăng hmưi, diñu čiăng kkuh mpŭ kơ ya mnơ̆ng diñu dưi ƀuh hŏng ală, leh anăn kkuh mpŭ hŏng klei ênưih mơak hĭn kơ diñu. Wăt mtao Y-Jêrôbôam leh anăn phung ƀuôn sang sĭt gơ̆ amâo tuôm kkuh mpŭ kơ Aê Diê ôh, diñu knŏng kkuh mpŭ kơ diñu pô tui si hdră êlan diñu čiăng đuč.
Mbĭt ti djiêô anăn, mtao Y-Jêrôbôam mdưm mă hjăn ñu pô phung khua ngă yang, leh anăn bi kčah hruê mlan jih jang knăm, jih jang klei ngă čiăng bi msĕ si hdră bhiăn kkuh mpŭ tui si klei bhiăn Y-Môis. Ƀiădah lĕ, klei bhiăn Y-Môis mơ̆ng Aê Diê pô čuăn kčah, bi mtao Y-Jêrôbôam mkra hdră bhiăn klei kkuh mpŭ mrâo amâo djŏ tui si klei Aê Diê čiăng ôh, leh anăn kyuanăn “mnơ̆ng anăn jing leh sa klei soh” (êlan 30). Mơ̆ng klei anei, drei thâo kral mta phŭn yuôm hlăm klei kkuh mpŭ kơ Aê Diê jing ngă tui si klei Aê Diê čiăng leh anăn tui si klei Ñu mtă, amâo djŏ tui si hdră bhiăn, rup ti êngao. Aê Diê jing Pô kpă ênô, Ñu amâo tŭ ư ôh klei kkuh mpŭ soh, amâo djŏ hŏng klei sĭt nik Khua Yang mtrŭn mtă.
Ya mta klei drei dôk duah êjai kkuh mpŭ kơ Aê Diê?
Wah lač: Ơ Khua Yang jing Aê Diê kpă ênô, đru kâo knŏng dlăng kơ Khua Yang Pô hlăm klei kkuh mpŭ leh anăn hlăm knhuah hdĭp klei đăo grăp hruê. Đăm brei ală kâo dlăng phă ya mta rup yang mkăn ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
