I Lu Pơtao 12:26-33
“Iĕm ‘nĕ kơ pơm lu rup man kơdih, kư̆m ‘nĕ pơm rup ayơ nhen thoi tơmam tơ kơpal plĕnh ti, dah tơ ala teh âu dah tơ lăm ala đak sŭng” ( Lĕch Đơ̆ng Êyiptơ 20:4).
Nơ̆r jet tơchĕng pơwao:
– Pơtao Jêrôbôam tơ’bơ̆p hăm tơdrong anat yă kiơ?
– Pơtao đei pơkeh hăm trong gơlong ayơ?
– Lu bơ̆n kư̆m đei tơdrong pơhlŭ pơlung wă kơ chơchă lu trong gơlong wă kơkuh kơ Kră Yang ưh kơ trŏ noh thoi yơ?
Mơjĭt adrĕch gah yă nơ̆m Isơrael iung blah pơtao Rôbôam păng pôk ‘bok Jêrôbôam pơm potao lu sư (I Pơtao 12:12-19). Đơ̆ng rŏng kơ noh kư̆m đei hiôk hơđơ̆ng, pơtao Jêrôbôam tơ’bơ̆p hăm tơdrong anat mă kăl dêh: Tơdrong kơkuh kơ ‘Bok Kei-Dei. Kơplah ei sơ̆, kon pơlei tơgah yă nơ̆m athei wih brŏk tơ pơlei Jêrusalem tŏ sĕt ngei pêng wơ̆t lăm minh sơnăm wă kơ năm pơm phĕt kăl, Phĕt Năm Brih, Phĕt Pang Tơkôt, Phĕt Bơsŭn (Bơtho Khôi Juăt 16:16). Đơ̆ng noh, pơtao Jêrôbôam hli kơ kon pơlei wih kiơ̆ pơtao Rôbôam.
Wă kơ hơmet tơdrong hơnat âu, pơtao Jêrôbôam athei pơm ‘bar tŏ rup rơmo kon hăm maih ‘noh jơ̆ tơdrong wă kơkuh ‘nao ăn kơ kon pơlei (trong 28-29). Rŏ lăng pơtao rok kiơ̆ ‘bok Arôn (Lĕch Đơ̆ng Êyiptơ 32:1-10) wă kơ huay kơ đei tơdrong kon pơlei iung blah kơplah pơtao oei pơgơ̆r. Pơtao Jêrôbôam băt tơpă lĕch yua đơ̆ng ‘bok Arôn păng kon pơlei Isơrael gô đei iŏk kơplah kơkuh kơ rup yang rơmo maih mă-lei đei tơdrong hli kơ hiong dêh char pơm kơ sư ưh kơ lăp đon kơ lĕch yua noh. Tơdrong mă sư tơchĕng tơtăm noh tơdrong hơmet pơkeh tơdrong hơnat ‘bơ̆t măt. Dang ei, lu bơ̆n kư̆m ưh kơ wă thoi noh kơplah chă jên tơmam mă ưh kơ tơpăt na wă hơmet tơdrong jên tơmam, dah pơma hơlĕnh kơplah tơ’bơ̆p tơdrong hli tơrơ, dah lăp đon hăm tơdrong tơplơ̆ hăm tơdrong tơpăt yua kơ wă chă lơi yua.
Wă kơ pơkeh tơdrong chă đon âu, pơtao Jêrôbôam đei pơjing ‘bar anih kơkuh tơ Bêthel păng Đan. Bêthel oei tôch gah gơal lăm dêh char yă nơ̆m, lăp ataih kơ Jêrusalem dang 15km, na Đan oei tôch gah yă nơ̆m. Hơđăl dêh tơdrong pơtao kơnhăm ‘noh jơ̆ wă kơ ‘bônh kơ kon pơlei brŏk năm lăm tơdrong kơkuh. Păng pơtao chă đon đei keh jing (trong 30). Pơtao Jêrôbôam sư hlôh kơ kon pơlei păng pơm kiơ̆ hloi thoi kon pơlei hơpơi wă, lu sư wă kơ kơkuh dôm tơdrong kiơ mă lu sư ‘bôp păng măt, păng kơkuh kiơ̆ kơ tơdrong mă ‘bônh đĕch, hiôk chơt lăp đon. Đĭ-đăng đơ̆ng pơtao Jêrôbôam păng kon pơlei kơkuh ưh kơsĭ kơkuh kơ Kră Yang ‘Bok Kei-Dei ôh, lu sư kơkuh kiơ̆ kơdih wă lăp đon.
Gah cheng kơ noh, pơtao Jêrôbôam kư̆m kiơ̆ kơdih wă sư đei pơjing lu bơngai awih awăn lăm tơdrong akŭm kơkuh, păng ăn khei ‘năr lăm tơdrong pơm phĕt, dôm tơdrong wă tơjê̆ nhen thoi tơdrong juăt ‘bok Môis. Mălei ră, Tơdrong Juăt Môis đơ̆ng Kră Yang ‘Bok Kei-Dei ăn, na pơtao Jêrôbôam đei pơm hơrĭ hơrĭ lăm tơdrong kơkuh ‘nao ưh kơ kiơ̆ thoi Kră Yang ‘Bok Kei-Dei wă lăp đon, păng yua kơ tơdrong ‘noh bơih pơm “tơdrong ‘noh jing tơdrong yoch” (trong 30). Đơ̆ng năr âu, lu bơ̆n ‘bôh hơđăl lăm tơdrong akŭm kơkuh kơ Kră Yang ‘Bok Kei-Dei păng pơm kiơ̆ thoi Sư wă păng dôm nơ̆r Sư tơtă ưh kơsĭ kơ kơ̆m giĕng, chă pơm gah ‘nguaih. Kră Yang ‘Bok Kei-Dei jơ̆ ‘Bok ‘lơ̆ng tơpăt, Sư ưh kơ lăp đon tơdrong kơkuh ưh kơ trŏ, ưh kơ ‘blep trŏ thoi nơ̆r Sư đei bơtho pơkă.
Ơ Kră Yang ‘Bok Kei-Dei ‘lơ̆ng tơpăt, apinh tơgŭm inh đei jơhngơ̆m đon tơchĕng kơ Ih lăm tơdrong akŭm kơkuh păng tơdrong arih ‘lơ̆ng rim năr.Apinh ‘nĕ ăn măt inh lăng tơ inh kơdih păng lu rup yang hơyơ. Krao khan yua anăn Kră Yang Yêsu Krist, Amen.
Lu bơ̆n oei chơchă tơdrong kiơ kơplah kơkuh kơ Kră Yang?
Đŏk Sơ̆p Hla ar ‘Bok Kei-Dei lăm pêng sơnăm: Tơdrong Jang 27
Kênh Youtube BHKTHN:
https://www.youtube.com/c/bhkthn
