Klei Aê Diê Blŭ: Y-Mathiơ 17:14-18
Êlan kliăng: “Kyuadah drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê.” (Êphêsô 6:12)
Klei êmuh ksiêm mĭn: Tơdah Khua Yang Yêsu lŏ wĭt hŏng phung ƀuôn sang, mâo mnuih akâo Khua Yang ngă ya klei kơ anak êkei ñu? Si Khua Yang lač hŏng phung khua ƀĭng kna? Si klei mñă kơ drei tơdah thâo klei myang mơ̆ng klei mmăt?
Sa čô mnuih ba anak êkei ñu dôk bi kñhăk kyua yang jhat ngă duah Khua Yang Yêsu. Kyua amâo bi tuôm ôh hŏng Khua Yang anăn ñu akâo kơ phung ƀĭng kna Khua Yang suôt yang jhat, ƀiădah diñu amâo dưi suôt ôh yang jhat anei. Tơdah Khua Yang Yêsu leh anăn tlâo čô ƀĭng kna mơ̆ng čư̆ trŭn hŏng phung ƀuôn sang, pô anei akâo kơ Khua Yang suôt yang jhat đru anak êkei pô tlaih mơ̆ng klei huĭ hyưt “… kyuadah ñu bi kñhăk asei mlei knap mñai snăk, jêñ jêñ ñu êbuh hlăm pui leh anăn hlăm êa ” (êlan 15). Khua Yang Yêsu ƀuah suôt yang jhat, leh anăn yang jhat kbiă mơ̆ng hđeh anăn, leh anăn gơ̆ hlao mmông anăn mtam.
Ya ngă phung ƀĭng kna amâo dưi suôt yang jhat, djŏ mơ̆ diñu ka dưi brei klei myang? Amâo djŏ ôh, kyua Y-Mathiơ 10:1 brei thâo Khua Yang Yêsu brei leh klei dưi kơ phung ƀĭng kna. Djŏ mơ̆ kyua Khua Yang Yêsu amâo dôk giăm diñu ? Ăt kăn djŏ rei, kyua Y-Luk 10:17 brei thâo phung ƀĭng kna yơh hưn hŏng Khua Yang diñu tŭ jing leh hlăm bruă suôt yang jhat hlăk hiu hưn Klei Mrâo Mrang Jăk. Khădah snăn, ară anei tơdah mrâo trŭn čư̆, Khua Yang tuôm hŏng klei êdu awăt mơ̆ng dua păn čô ƀĭng ana adôk. Ñu lač, “Ơ găp djuê amâo mâo klei đăo leh anăn soh,…”, Khua Yang khăng yua boh blŭ anei čiăng lač kơ phung Yuđa, ƀiădah tinei Khua Yang yua čiăng lač kơ phung ƀĭng kna êdu awăt klei đăo. Ñu brei thâo wưng Ñu dôk hŏng digơ̆ amâo lŏ sui ôh, klei đăo diñu brei ktang hĭn, hriê kơ prŏng hĭn kyua Khua Yang amâo dưi ôh grăp mnĭt mmông dôk giăm mñă kơ diñu. Anei jing gưl knhal tuč Khua ƀĭng kna Y-Mathiơ čih kơ klei Khua Yang Yêsu suôt yang jhat, drei thâo Khua Yang Yêsu klă sĭt rŭng răng kơ klei amâo đăo leh anăn mngăt ai tiê khăng mơ̆ng phung ƀĭng kna kyua hruê mmông Ñu bi ktlah hŏng phung ƀĭng kna giăm leh.
Klei hriăm kơ drei jing đăm pĭt wơr ôh hlăm klei tŭ jing, brei hdơr klei amâo kluôm ênŭm mơ̆ng phung ƀĭng kna ƀiă lu hmăi kơ klei đăo hlăm Khua Yang Yêsu mơ̆ng ama hlăm klei yăl dliê, “Yêsu lač kơ ñu, “Tơdah ih dưi! Jih jang klei dưi sơăi kơ hlei pô đăo” (Y-Markôs 9:23). Klei ktang mơ̆ng phung bi kdơ̆ng hŏng Khua Yang leh anăn mơ̆ng lăn ala mmăt ăt ktang, boh nik diñu ƀrư̆ ngêñ snăk tơdah thâo hruê mmông diñu amâo dôk sui ôh (Klei Bi Êdah 12:12). Čiăng mâo nanao klei ktang hlăm mngăt brei mâo klei hriăm mjuăt nanao čiăng klei đăo amâo mdei đĭ kyar. Drei amâo dưi ôh yua klei ktang hjăn pô čiăng bi kdơ̆ng hŏng klei myang mơ̆ng klei mmăt, ƀiădah brei kluôm dhuôm knang kơ ai ktang kluôm dhuôm mơ̆ng Khua Yang Yêsu, kyua yang jhat knŏng huĭ kơ klei myang Khua Yang đuč.
Si drei ngă čiăng dưi hŏng klei myang klei mmăt?
Wah lač: Ơ Khua Yang, akâo kơ Ih đru kâo sĭt suôr hŏng Khua Yang leh anăn Klei Aê Diê Blŭ čiăng kâo mâo klei ai ktang hlăm mngăt leh anăn hriê kơ prŏng hlăm klei đăo čiăng kơ kâo mâo klei ktang bi blah leh anăn dưi hŏng klei myang klei mmăt grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
