Mathais 17:14-18
Nqe cim:
“Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj”(Efexus 6:12)
Lus nug rau sawvdaws xav:
– Thaum Tswv Yexus los ntawm cov neeg coob coob, muaj ib tug txivneej tuaj thov Yexus ua dab tsi rau nws tus menyuam?
– Tswv Yexus hais rau cov thwjtim li cas?
– Peb kawm tau yam dab tsi thaum paub txog lub zog ntawm kev tsaus ntuj?
Muaj ib tug txivneej coj nws tus tub uas tabtom qaug dabpeg tuaj cuag Tswv Yexus, tiamsis tsis ntsib Yexus, nws thiaj thov Yexus cov thwjtim ntiab dab, tiamsis cov thwjtim ntiab tsis tau tus dab no tawm. Thaum Tswv Yexus thiab peb tug thwjtim nqis pem lub roob los txog ntawm cov neeg coob coob, tus txivneej ntawd thiaj thov Tswv Yexus ntiab dab tawm hauv nws tus metub mus. Nws qhia rau Yexus hais tias, “nws qaug dabpeg thiab txomnyem kawg li. Nws pheej ntog rau hauv qhovcub thiab rau hauv dej.” (nqe 15). Tswv Yexus ntiab dab, ces dab txawm tawm ntawm tus metub mus thiab kho nws rov zoo lawm.
Vim li cas cov thwjtim ntiab tsis tau dab, puas yog lawv tsis tau muaj hwjchim? Tsis yog, vim hauv Mathais 10:1 qhia paub hais tias, Tswv Yexus twb muab hwjchim rau cov thwjtim lawm. Puas yog Tswv Yexus tsis nyob ze cov thwjtim? Kuj tsis yog thiab, rau qhov Lukas 10:17 qhia paub cov thwjtim twb los qhia rau Tswv Yexus hais tias, lawv twb ntiab tau ntau tus dab ua ntej ntawd. Tiamsis zaum no thaum lawv nqis saum roob los, Tswv Yexus pom qhov uas cuaj leej thwjtim tsis nrog Nws mus saum roob lawv kev qaug zog. Yexus hais tias, “cov neeg tsis ntseeg thiab tsis ncaj”, nqe lus no yog nqe uas tus Tswv pheej hais rau cov Yudais, tiamsis zaum no Tswv Yexus siv los hais rau Nws cov thwjtim uas tsis muaj kev ntseeg. Yexus qhia rau lawv paub hais tias, lub sijhawm Nws nrog lawv nyob tshuav tsis ntau lawm, lawv yuav tsum muaj kev ntseeg khov kho, kev ntseeg loj hlob; rau qhov Nws yuav tsis nrog lawv nyob mus li. Qhov ntawd yog zaum kawg uas Timthawj Mathais sau txog Tswv Yexus ntiab dab. Peb zeem paub hais tias Tswv Yexus txhawj nyob tsam cov thwjtim tsis ntseeg thiab sab ntsujplig tsis loj hlob, rau qhov Nws twb yuav ncaim lawv mus.
Zaj kawm rau peb tiam no yog; tsis txhob qaug zog thaum tabtom ua tau yam ub yam no, thiab cia li nco ntsoov hais tias qhov uas cov thwjtim ntiab tsis tau dab ua rau tus txivneej uas coj nws metub tuaj cuag Yexus tsawg kev ntseeg rau tus Tswv. “Yexus hais rau tus metub ntawd leej txiv hais tias ua li cas koj hais tias, yog koj pab tau! Yog leejtwg ntseeg, kuv yeej ua tau txhua yam huv tibsi” (Malakaus 9:23). Lub zog ntawm cov neeg uas tawmtsam Vajtswv thiab lub ntiajteb uas tsaus ntuj yeej muaj zog heev. Dab Ntxwgnyoog tus uas kav tiam tsaus ntuj chim heev thaum paub hais tias nws lub sijhawm tshuav tsis ntau lawm (Tshwmsim 12:12). Xav kom lub neej sab ntsujplig muaj zog txaus, yuav tsum tag xyaum kev ntseeg tsis so li. Peb yuav siv peb lub zog los tawmtsam kev tsaus ntuj yeej tsis tau li, tiamsis yog peb vamkhom Vajtswv lub hwjchim peb yuav kovyeej kev tsaus ntuj (Efexus 6 :10), rau qhov dab Ntxwgnyoog tsuas ntshai Vajtswv lub hwjchim nkaus xwb.
Thov Vajtswv,
Vajtswv, thov Koj pab kom nyuam yaus muaj txojkev sib txuas nrog Koj thiab Koj Txojlus, kom nyuam yaus tau txais lub zog ntawm sab ntsujplig thiab loj hlob kev ntseeg; nyuam yaus thiaj kovyeej lub zog ntawm qhov kev tsaus ntuj txhua hnub. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb yuav tsum ua li cas thiaj kovyeej lub zog ntawm kev tsaus ntuj?
Nyeem Vajluskub hauv peb lub xyoo: II Kevcai 3
Kênh Youtube BHKTHN:
