Klei Aê Diê Blŭ: Klei Bi Hriêng 15:13-15; Y‑Yakơ 1:2-4
Êlan kliăng: “Ai tiê hơ̆k mơak bi êdah ti ƀô̆ mta, ƀiădah ai tiê ênguôt bi ktrŏ mngăt.” (Klei Bi Hriêng 15:13).
Klei êmuh ksiêm mĭn: NSi ngă klei mơak mơ̆ng lam ai tiê bi êdah? Ya jing klei tŭ dưn mơ̆ng klei mơak leh anăn klei bi hmăi jhat mơ̆ng klei ênguôt? Ya mta čuăn đru drei dưi mâo nanao klei mơak hlăm ai tiê?
Mtao Y‑Salômôn mñă kơ anak brei djă pioh klei mơak hlăm ai tiê. Klei bluh ai hlăm ai tiê bi êdah truh kơ knuih ti êngao leh anăn wăt kơ klei mĭn hlăm lam. Tơdah anak mơak, ƀô̆ mta anak hơ̆k mơak, klei mĭn anak mngač tač. Tơdah klei mĭn anak mngač tač anak srăng tui duah leh anăn mă tŭ klei thâo mĭn mơ̆ng Aê Diê. Tơdah anak mơak, klei blŭ, bruă ngă anak srăng bi êdah klei thâo mĭn, thâo săng. Bi klăk hŏng klei anăn tơdah ai tiê anak ênguôt, klei mĭn anak srăng jing dliu awăt, êgah êmăn, dlưh hrŏ. Klei blŭ, klei ngă jing mluk mgu, kƀah klei thâo răng pô, kƀah klei thâo săng.
Mtao Y‑Salômôn brei anak ƀuh klei jing hlăm ai tiê bi êdah nanao kơ knuih ti êngao hŏng klei ngă leh anăn atăt truh kơ boh tŭ mdê mdê. Ñu yua grăp hlâo klei blŭ bi klăk, msĕ si: “jih jang hruê” bi klăk hŏng “nanao”; hlăm ai tiê “knap mñai” bi klăk hŏng “hơ̆k”; “jhat” bi klăk hŏng “huă mnăm” brei ƀuh ñu čiăng kñăm hlăm klei ñu mtô lač snei, ai tiê hơ̆k mơak srăng đru anak mnuih dưi tŭ gĭr leh anăn găn hgao klei jhat truh. Klei blŭ “mâo klei huă mnăm nanao” amâo lač kơ anak mnuih tuôm nanao hŏng klei ênưih hlăm klei hdĭp ôh, ƀiădah dưi djă pioh nanao klei hơ̆k mơak, klei čang hmăng hlăm jih klei truh.
Snăn ya mta čuăn dưi đru drei mâo klei hơ̆k mơak nanao hlăm ai tiê? Kyuadah klei hơ̆k mơak jing sa knuih mơ̆ng Yang Mngăt Jăk (Galati 5:22) snăn hlăm klei pap Yang Mngăt Jăk, Khua Yang srăng brei klei hơ̆k mơak hlăm ai tiê kơ grăp čô phung anak ƀuôn sang Aê Diê. Khua ƀĭng kna Y‑Pôl ăt mtô mơh brei hơ̆k mơak kyuadah thâo kơ Khua Yang giăm truh leh, hruê êdei anăp kơ drei jing Ƀuôn Jăk dôk nanao hlŏng lar: “Mơak bĕ nanao hlăm Khua Yang… Khua Yang giăm truh leh.” (Philip 4:4-5). Y‑Yakơ brei thâo mta čuăn čiăng mâo klei hơ̆k mơak jing thâo săng klă jih jang klei lông dlăng, klei dleh dlan hlăm klei hdĭp drei srăng đru kơ klei đăo drei kjăp hĭn: “Ơ phung ayŏng amai adei, tơdah diih tuôm hŏng klei lông dlăng lu mta, brei diih yap klei anăn jing klei hơ̆k mơak sơăi. Kyuadah diih thâo leh klei lông dlăng kơ klei diih đăo mjing klei gĭr. Brei klei gĭr bi leh sĭt nik bruă ñu, čiăng kơ diih jing prŏng khue, klă ênŭm, amâo kƀah sa klei ôh” (Y‑Yakơ 1:2-4).
Hmăng hmưi kơ grăp čô drei mâo nanao klei mơak hlăm Khua Yang leh anăn djă pioh klei hơ̆k mơak hlăm ai tiê, mâo knuih mơak hlăm klei hdĭp, bi êdah klei thâo mĭn Khua Yang kơ jih jang mnuih thâo klei êdu êun drei. Kdlưn hĭn mơh, drei amâo knŏng bi knal klei jăk mơak hlăm klei hdĭp ară anei hin ti lăn ala ôh ƀiădah đăo kjăp nanao kơ ênuk hlŏng lar.
Hŏng si êlan drei khăng bi êdah klei mơak Khua Yang ti êngao čiăng kơ jih jang mnuih ƀuh?
Wah lač: Ơ Khua Yang, akâo kơ klei mơak mơ̆ng Yang Mngăt Jăk kiă kriê ai tiê kâo nanao, đru kâo hơ̆k mơak nanao hlăm djăp mta klei truh leh anăn đru kâo bi êdah klei hdĭp, klei thâo mĭn Khua Yang čiăng kơ jih jang mnuih thâo kral klei ktang Ñu hlăm kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 4:15-5:19
Kênh Youtube BHKTHN:
