Pajlug 15:13-15; Yakaunpaus 1:2-4
Nqe cim:
“Thaum neeg zoo siab, lawv lub ntsejmuag luag ntxhi, tiamsis thaum lawv ntxhov siab, lawv lub ntsejmuag mluas mlob”(Pajlug 15:13).
Peb saib ntxiv hauv phau txhais HMOWSV,
“Lub siab zoo mas ua rau lub ntsejmuag luag, tiamsis kev tu siab ua rau tus ntsujplig yaj tag”
Lus nug rau sawvdaws xav:
- Kev zoo siab hauv nruab siab tau qhia tawm sab nraud licas?
- Qhov muaj nqis ntawm kev zoo siab thiab qhov tsis zoo ntawm kev tu siab yog dabtsi?
- Cov tswvyim twg pab kom peb niaj hnub muaj kev zoo siab rau hauv nruab siab?
Ib tsoom cov mloog txhua tus,
Vajntxwv Xalumoos qhia kom peb yuav tsum tuav rawv kev zoo siab hauv nruab siab. Kev xav hauv lub siab nws qhia tshwm los ntawm tus cwjpwm sab nraud thiab lub siab yuav xav mus rau seem zoo. Thaum peb zoo siab, lub ntsejmuag luag ntxhi, lub siab xav tej yam zoo. Thaum lub siab xav tej yam zoo peb yuav tau txais tus Tswv lub tswvyim. Thaum muaj kev zoo siab, peb tej lus hais, kev ua haujlwm yuav qhia tawm kev txawj ntse, thoob tsib to nrog. Tiamsis thaum muaj kev nyuaj siab, lub siab qaug zog, tas kev cia siab, nyob ntsejmuag mluas mlob thiab tswj tsis tau tej lus hais, ua haujlwm yuam kev, tswj tsis tau tus kheej, tsis muaj tswvyim …
Vajntxwv Xalumoos qhia rau peb paub lub neej uas lub siab qhia tawm rau sab nraud thiab kev tau tej nqi zog sib txawv. Xalumoos siv cov lus sib piv xws li: “ua neej” nrog rau “niaj hnub”; lub siab “txomnyem ntsuav” nrog rau “zoo siab”; “pluag” nrog rau “muaj noj muaj haus” qhia paub hais tias kev zoo siab hauv nruab siab yuav pab kom peb tiv taus thiab nyiaj taus tej kev txomnyem. Lo lus “muaj noj muaj haus niaj hnub” tsis yog hais txog tus neeg uas tau lub neej zoo, tiamsis yog muaj kev zoo siab, cia siab nyob rau txhua lub tsamthawj.
Yog li ntawd, lub tswvyim twg pab kom peb niaj hnub muaj kev zoo siab hauv nruab siab? Zoo siab yog ib dej txiv ntawm Vaj Ntsujplig lub txiv (Kalatias 5:22) yog li ntawd, Vaj Ntsujplig pub txojkev zoo siab rau txhua tus uas yog Vajtswv haivneeg. Timthawj Paulus kuj qhia hais tias cia li zoo siab rau qhov tus Tswv twb yuav los sai sai no, peb lub neej tom ntej yog nyob saum ntuj ceebtsheej mus ibtxhis: “Nej yuav tsum niaj hnub zoo siab,... tus Tswv twb yuav los sai sai no”(Filipis 4:4-5). Yakaunpaus qhia hais tias, lub tswvyim pab tau kev zoo siab yog zeem paub tej kev sim siab, kev txomnyem hauv peb lub neej yuav ua rau peb muaj kev ntseeg ruaj khov: “Cov kwvtij, thaum nej raug ntau yam kev nyuaj siab, nej cia li suav hais tias yog nej tau koob hmoov zoo kawg. Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv. Tiamsis nej yuav tsum ua siab ntev mus li tsis txhob tso tseg, nej thiaj yuav ua tau neeg zoo kawg nkaus, tsis muaj ib qho uas lwm tus yuav thuam tau” (Yakaunpaus 1:2-4).
Ntseeg hais tias peb txhua tus muaj kev zoo siab nyob rau hauv tus Tswv thiab muaj kev zoo siab rau hauv nruab siab, muaj tus cwjpwm ua neej muaj kev cia siab, qhia tshwm tus Tswv lub tswvyim rau txhua tus tibneeg paub los ntawm peb tus cwjpwm txo hwjchim. Peb zoo siab tsis yog yuav tau txais koob hmoov rau lub neej nyob ntiajteb no xwb tiamsis peb niaj hnub muaj kev cia siab rau lub neej tom ntej uas nyob mus ibtxhis.
Thov Vajtswv,
Tus Tswv, thov Vaj Ntsujplig txojkev zoo siab niaj hnub kav nyuam yaus lub siab, pab kom nyuam yaus muaj kev zoo siab rau txhua lub tsamthawj thiab pab nyuam yaus qhia tawm lub tswvyim uas tus Tswv pub rau txhua tus paub txog Koj lub hwjchim dhau los ntawm nyuam yaus. Amees.
Ib tsoom cov mloog uas hmov thiab tshua,
Peb pheej qhia tawm txojkev zoo siab uas tus Tswv pub rau lwm tus pom los ntawm yam dabtsi?
Nyeem Vajluskub hauv peb lub xyoo: Nehemis 4:15-5:19
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
