Klei Aê Diê Blŭ: Y-Êsai 58:6-10
Êlan kliăng: “Tơdah ih brei mnơ̆ng ƀơ̆ng huă ih pô kơ pô êpa, tơdah ih bi trei mnuih knap mñai, hlăk anăn klei mngač ih srăng ƀlĕ hlăm klei mmăt, leh anăn klei mmăt ih srăng jing msĕ si yang hruê dơ̆ng” (Y-Êsai 58:10)
Klei êmuh ksiêm mĭn: Khua Yang brei thâo, ya jing klei kăm ƀơ̆ng huă sĭt Ñu čang hmăng? Hbĭl klei mngač drei srăng jing msĕ si ang dar? Si drei ba klei mngač čang hmăng kơ mnuih mkăn?
Aê Diê tiŏ nao Khua pô hưn êlâo Y-Êsai ƀuah phung Israel kơ klei diñu mgưt ngă kăm ƀơ̆ng huă. Diñu knŏng ngă tui si hdră bhiăn leh anăn čiăng bi mlih nao hriê klei jăk mơak hŏng Aê Diê, ƀiădah amâo sĭt ai tiê bi ti gŭ diñu pô tui duah klei Khua Yang čiăng êjai dôk kăm ƀơ̆ng huă ôh (Y-Êsai 58:1-5). Tinei, Khua Yang bi klă snei, klei kăm ƀơ̆ng huă sĭt amâo djŏ jing klei bi kpĭ asei mlei pô ôh, ƀiădah jing bruă ngă thâo mđing uêñ, đru dŏng leh anăn răng kriê phung mnuih arăng ktư̆ juă, “kleh hĕ klei săng đai klei wê, ruh hĕ bră kă knông, bi êngiê phung arăng ktư̆ juă, leh anăn bi joh hĕ grăp ƀĕ knông” (êlan 6). Klei anei brei ƀuh Aê Diê mđing uêñ kơ phung dôk tŭ klei knap mñai leh anăn phung arăng ktư̆ juă. “Klei săng đai” leh anăn “knông” amâo knŏng kă čăp asei mlei, ƀiădah wăt djăp mta klei ktư̆ juă mkăn, klei amâo mtăp mđơr leh anăn klei plah mă ênoh yuôm anak mnuih. Phung anak ƀuôn sang Aê Diê amâo dưi dlăng hơăi mang ôh kơ klei knap mñai hlăm ala ƀuôn. Klei khăp amâo knŏng jing klei djhưng ai tiê ôh, ƀiădah brei bi êdah hŏng bruă ngă sĭt êmĭt. Khua Yang lŏ mtô: bi mbha mnơ̆ng ƀơ̆ng huă ih hŏng pô êpa, atăt ba hlăm sang ih phung ƀun ƀin amâo mâo sang ôh, bi hơô brei kơ pô lưng mlŭn (êlan 7). Hdĭp kpă ênô leh anăn thâo khăp jing klei yua hruê mmông, prăk kăk leh anăn tui si klei dưi pô bi mbha leh anăn ngă bruă đru phung mâo klei kƀah.
Khua Yang mâo klei ƀuăn jăk siam kơ phung anak ƀuôn sang Ñu tơdah gưt ngă tui si klei Ñu mtô: “Hlăk anăn klei mngač ih srăng mtrang msĕ si ang dar, leh anăn klei bi hlao ih srăng truh djăl” (êlan 8). Tơdah drei ba klei bi juh kơ mnuih mkăn, ai tiê drei pô ăt mâo klei bi hlao msĕ mơh. Tơdah drei mđing hmư̆ klei ur krao phung ƀun ƀin, Khua Yang ƀuăn srăng mđing hmư̆ klei drei wah lač, leh anăn atăt êlan kơ drei êjai hruê mmăt tĭt leh anăn rŭng răng (êlan 9-10). Hŏng klei hdĭp thâo khăp, ba klei mngač čang hmăng hŏng bruă ngă snăn mnuih mkăn srăng ƀuh klei khăp sĭt mơ̆ng Yang Krist dôk ngă bruă ti krah lăn ala.
Hruê anei, ti krah sa ala ƀuôn amâo mâo klei thâo pap leh anăn boh kbưi phung mdrŏng hŏng phung ƀun ƀin ƀrư̆ prŏng hĭn êjai, Klei Aê Diê Blŭ iêô mthưr drei brei dôk hdĭp msĕ kan luê mklăk hŏng hnoh êa đoh. Mđing uêñ đru dŏng phung mnuih arăng krư̆ juă, đru phung dleh dlan, bi mbha mnơ̆ng kơ phung kƀah, lŏ bi hlao bi msir klei bi mguôp mčah rai leh hlăm gŏ sang leh anăn hlăm Phung Sang Aê Diê. Klei đăo sĭt amâo knŏng hjăn hlăm Sang Aê Diê, ƀiădah wăt mŭt hlăm klei hdĭp grăp hruê. Lu blư̆ drei nao Sang Aê Diê nanao, thâo wah lač jăk, ƀiădah kƀah ai tiê thâo khăp thâo pap. Khua Yang dôk tui duah nanao phung mâo ai tiê thâo khăp kơ mnuih leh anăn hdĭp kpă ênô. Đăm brei ôh klei đăo knŏng mjưh ti Sang Aê Diê ƀiădah brei kbiă ti êlan, hlăm anôk mă bruă, hlăm sang hră, leh anăn hlăm anôk mâo mnuih čiăng mâo klei khăp. Klei anăn yơh jing klei kkuh mpŭ bi mơak kơ Aê Diê leh anăn ba klei mngač mtrang hlăm lăn ala mmăt tĭt.
Ya klei drei čiăng bi mlih leh hriăm klei hriăm anei?
Wah lač: Ơ Khua Yang, akâo Ih đru kâo thâo khăp hŏng bruă ngă. Akâo Ih yua klei hdĭp kâo ba klei mngač čang hmăng, klei kpă ênô leh anăn klei khăp klei pap Khua Yang truh kơ ala ƀuôn hruê anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
