Yaxayas 58:6-10
Nqe cim:
“Yog nej pub zaub mov rau cov neeg tshaib plab noj thiab pab cov neeg txomnyem. Ces tej kev tsaus ntuj uas nyob ibncig nej yuav hloov ua lub teeb ci rau nej pom kev ib yam li thaum tavsu.” (Yaxayas 58:10)
Lus nug xav:
– Tus Tswv qhia tias kev yoo mov tiag uas Nws txaus siab yog dabtsi?
– Thaum twg peb lub teeb thiaj yuav ci ntsa ib yam li thaum kaj sawv ntxov?
– Peb yuav coj lub teeb ntawm txojkev cia siab mus rau lwm tus li cas?
Vajtswv txib tus Cevlus Yaxayas mus cem cov Yixalayees txog qhov uas lawv ua txuj ua kevcai yoo mov. Lawv tsuas ua raws tej kevcai hais tseg thiab xav siv kev yoo mov los pauv kom tau Vajtswv tej koob hmoov xwb, lawv tsis txo hwjchim tiag tiag los nrhiav kom paub Vajtswv lub siab nyiam thaum lawv yoo mov (Yaxayas 58:1-5). Nyob ntawm no, tus Tswv qhia meej hais tias kevcai yoo mov uas tus Tswv txaus siab tsis yog tsimtxom tus kheej lub cev, tiamsis yog tes haujlwm hlub tshua, pab thiab saib xyuas cov uas raug luag tsimtxom, uas yog “daws tej saw hlau ntawm txojkev tsimtxom thiab txo tus quab ntawm txojkev tsis ncaj ncees, thiab tso cov neeg uas nej tsimtxom tawm mus” (nqe 6). Qhov no qhia pom tias Vajtswv hmov tshua txog cov neeg uas raug tsimtxom thiab raug luag ua tsis ncaj ncees. “Tej saw hlau” thiab “tus quab” tsis yog khi lub cev xwb, tiamsis tseem yog txhua yam kev tsimtxom, kev tsis ncaj ncees thiab kev rhuav tshem tibneeg lub meej mom. Vajtswv haivneeg yuav tsum tsis txhob ua txuj tsis quav ntsej tej kev txomnyem hauv zej zos. Txojkev hlub tsis yog ib qho kev xav hauv nruab siab xwb, tiamsis yuav tsum hloov los ua tej haujlwm uas ua qhia pom sab nraud. Tus Tswv tseem qhia ntxiv hais tias: Muab mov faib rau cov tshaib plab noj, qhib qhovrooj rau cov neeg pluag uas tsis muaj tsev nyob, thiab pub ris tsho rau cov neeg txomnyem tau hnav (nqe 7). Kev ua neej ncaj ncees thiab sib hlub yog siv peb lub sijhawm, nyiaj txiag thiab tej peev xwm uas Vajtswv pub los faib thiab ua haujlwm pab cov uas muaj kev cheemtsum.
Tus Tswv muaj tej lus cog tseg zoo rau Nws haivneeg thaum lawv ua raws li Nws tej lus qhia, hais tias: “Ces kuv txojkev kaj yuav ci rau nej ib yam li lub hnub ci thaum sawv ntxov, thiab nej tej qhov txhab yuav zoo sai” (nqe 8). Thaum peb coj kev nplig siab mus rau lwm tus, peb tus kheej kuj tau txais kev kho zoo thiab. Thaum peb mloog cov neeg txomnyem lub suab quaj, tus Tswv coglus tias Nws yuav mloog peb tej lus thov thiab coj peb kev thaum peb ntsib kev tsaus ntuj nyob ibncig (nqe 9-10). Thaum peb ua neej muaj kev hlub thiab ci lub teeb ntawm txojkev cia siab dhau ntawm tej haujlwm pab lwm tus, ces luag yuav pom Tswv Yexus Khetos txojkev hlub tseeb tabtom ua haujlwm hauv ntiajteb no.
Niaj hnub nimno, tibneeg ua neej tsis quav ntsej txog lwm tus thiab kev sib nrug ntawm tus muaj tus pluag yim deb zuj zus, Vajtswv Txojlus nqua hu peb ua neej zoo li tus ntses nce dej. Peb yuav tsum tiv thaiv cov uas raug luag ua tsis ncaj ncees, pab cov uas txomnyem, faib rau cov uas tsis muaj txaus, thiab txhim kho tej kev sib raug zoo nrog lwm tus. Kev ntseeg tseeb tsis yog tsuas nyob hauv Tuamtsev xwb, tiamsis yuav tsum tawm mus rau kev ua neej txhua hnub. Ntau zaus peb mus pehawm tsis tu ncua, thov Vajtswv zoo heev, tiamsis peb tsis muaj lub siab hlub tshua. Tus Tswv yeej ib txwm nrhiav cov neeg uas muaj lub siab hlub lwm tus thiab ua neej ncaj ncees. Tsis txhob cia peb txojkev ntseeg nres rau hauv Tuamtsev xwb, tiamsis yuav tsum tawm mus rau tom tej kev, tej chaw ua haujlwm, tej tsev kawm ntawv thiab tej chaw uas muaj cov neeg tabtom cheemtsum kev hlub. Qhov ntawd thiaj yog txojkev pehawm uas Vajtswv txaus siab thiab ua tau lub teeb ci rau hauv lub ntiajteb uas tsaus ntuj nti.
Thov Vajtswv,
Tus Tswv, thov pab nyuam yaus paub hlub los ntawm tes haujlwm. Thov siv nyuam yaus lub neej coj Koj lub teeb ntawm txojkev cia siab, kev ncaj ncees thiab kev hlub tshua mus rau hauv zej zos txhua hnub. Nyuam yaus tuav Tswv Yexus Khetos lub npe thov, Amees.
Thaum kawm tau zaj no, peb yuav tsum hloov tej yam dabtsi hauv peb lub neej?
Nyeem Vajluskub hauv peb lub xyoos: Yauj 31
Kênh Youtube BHKTHN:
