Êsai 58:6-10
“Tơdah iĕm đĭ jơhngơ̆m rong lu bơngai pơmat-tat păng asong ăn sa phĭ kơ lu bơngai pơngot, lei tơdrong hơdah ih gô pơchrang lăm măng mu, kơplah noh măng ih thoi lĕ kơ ‘năr dơ̆ng.” (Êsai 58:10)
Nơ̆r jet tơchĕng pơwao:
- Kră Yang tơbăt ăn kơ bơ̆n ơ̆t kơ sŏng sa mă Kră Yang wă noh tơdrong kiơ?
- La yơ tơdrong hơdah lu bơ̆n gô nhen măt ‘năr lĕch kiơ̆ pơge?
- Lu bơ̆n ba ăn tơdrong hơmĕng ăn kơ bơngai nai thoi yơ?
Kră Yang ‘Bok Kei-Dei wơh ‘Bok Ê-sai chrih kơ lu bơngai Israel lăm tơdrong ơ̆t kơ sŏng sa krao khan mă lei ưh kơ tơpă. Lu sư đei pơm kiơ̆ kơ tơdrong juăt đĕch păng wă kơ đei tơdrong apah đơ̆ng Kră Yang đĕch na ưh kơ đei tơjur akâu jăn lu sư păng chă tơdrong Kră Yang wă lăm tơdrong lu sư ơ̆t kơ sŏng sa krao khan (Êsai 58:1-5). Jơ âu Kră Yang đei tơ’bôh tơdrong ơ̆t kơ sŏng sa tơpă ưh kơ trŏ wă pơrăm akâu jăn ôh, mă lei đei tơdrong dŏng tơgŭm lu bơngai mă đe pơgŏ pơđep, “Noh hăm trŏ ưh kơ trŏ ơ̆t kơ sŏng sa mă Inh lăp đon hrĕch lê̆ tơlei glang tơdrong kơnê̆, plôh lê̆ đêl đe chô̆ đơ̆ng ‘long ăt.Tơlĕch achăng lu bơngai đe pơjuă pơđep gơh hơgei, gơ̆ lê̆ rim ‘long ăt dah kiơ?” (trong 6). Tơdrong âu tơ’bôh kơ Kră Yang đei hyơ̆k bơngơ̆t kơ bơngai mă đei tơdrong đe pơgŏ pơđep “mam khuă” păng “’long ăt” ưh kơ sĭ pơma hơdrô̆ tơmam pơkơ̆ng gah sĕch akar, mă lei đei pơma kơ tôm tơdrong đei pơgŏ pơđep lăm dôm tơdrong arih kon bơngai. Lu bơngai lui ưh kơ pơm ưh kơ băt kơ lăm dôm ơh sơ’ngon lăm teh đak. Tơdrong ‘mêm tơpă ưh kơ trŏ minh tơdrong sơngon đĕch, mă lei kăl kơ đei jang pơm tơ’bôh. Kră Yang đei tơ’bôh thim: Athei klah song ăn ‘bĕng sa kơ lu bơngai mă oei pơngot, chông ba bơngai dơnuh hin tơhnam bơ̆n kơdih, pơhrŭk kơ bơngai băn ao kơplah lu sư hơkâu hoh (trong 7). Arih tơpăt hăm tơdrong ‘mêm noh jơ̆ yua jơnăr, jên tơmam păng tơdrong gơh hơgei wă klah song păng dŏng tơgŭm lu bơngai mă kăl yua.
Kră Yang đei pơkă ăn tơdrong ‘lơ̆ng kơ lu kon pơlei pơla Sư kơplah lu sư pơm kiơ̆ thoi Nơ̆r Kră Yang đei ată: “Na tơdrong ih pơm gô rang hơdah thoi pơgê hrôih; rơka ih gơh klaih ‘bônh. Tơdrong ‘lơ̆ng tơpăt ih gô năm adrol kơ ihtơdrong ư-ang Kră Yang gô wei-lăng đơ̆ng rŏng ih.” (trong 8). Kơplah bơ̆n ba ăn tơdrong pơlung kơ bơngai nai, na jơhngơ̆m bơ̆n đei tơdrong pơklaih kơdih. Kơplah bơ̆n mơ̆ng lu bơngai dơnuh hin krao hơpơi, Kră Yang pơkă gô mơ̆ng nơ̆r bơ̆n krao khan, păng gô dui ba lu bơ̆n kơplah đei tơ’bơ̆p năr gleh truh (trong 9-10). Đơ̆ng chăl arih đei tơdrong ‘mêm mơnat, ba ăn tơdrong hơdah hăm tơdrong hơmĕng hăm tơdrong bơ̆n đei jang tơgŭm đơ̆ng noh bơngai nai gô ‘bôh tơdrong ‘mêm tơpă nhen thoi Kră Yang Yêsu oei bơ̆jang lăm teh đak âu.
Dang ei, lăm teh đak đei tơdrong ưh pă hyơ̆k bơngơ̆t dih băl păng tơdrong pơgăn lăm tơdrong bơngai mơdrŏng păng bơngai dơnuh rai đunh rai jrŭ să. Nơ̆r Kră Yang đei krao wơ̆n bơ̆n nhen thoi ka soăn tơ tu đak, hyơ̆k bơngơ̆t kơ bơngai mă đe pơgŏ pơđep, tơgŭm bơngai dơnuh hin, klah song tơmam ăn kơ bơngai kơ’bah, pơm ăn tơdrong hyôk hơđơ̆ng lăm hnam dơnŏ păng lăm khul bơngai lui. Đon lui tơpă ưh kơ sĭ lăm hnam akŭm đĕch mă lei kăl kơ đei yak năm lăm kon pơlei pơla rim năr. Lơ wơ̆t bơ̆n năm akŭm ling lang, krao khan gơh hơgei, mă lei kơ’bah kơ tơdrong ‘mêm. Kră Yang oei chơ chă lu bơngai mă đei tơdrong ‘mêm đơ̆ng lăm jơ-hngơ̆m mă đei tơdrong ‘mêm tơpă hăm arih tơpăt. ‘nĕ kơ ăn đon lui lăp lăm hnam akŭm đĕch mă lei kăl kơ đei tơ’bôh tơnguaih dơ̆ng lăm trong glung, lăm anih jang, lăm hnam trưng, păng tơ anih mă kăl kơ tơdrong ‘mêm. ‘Noh jơ̆ tơdrong kơkuh kơ Kră Yang mă Kră Yang lăp đon ba ăn tơdrong hơdah kơ teh đak mă ‘bĕnh kơ măng mu.
Ơ Kră Yang, apinh Ih tơgŭm inh băt kơ ‘mêm mơnat hăm tơdrong jang pơm. Apinh yua chăl arih inh ba ăn tơdrong hơdah păng tơdrong hơmĕng Ih ăn kơ lăm teh đak dang ei. Yua anăn Kră Yang Yêsu Krist, Amen.
Lu bơ̆n kăl kơ tơplih lăm tơdrong kiơ đơ̆ng bơ̆n pơhrăm ‘bai pơhrăm âu?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jop 31
Kênh Youtube BHKTHN:
