Klei Aê Diê Blŭ: II Klei Yăl Dliê 28:8-15
Êlan kliăng: “Êgao hĭn kơ jih jang, brei diih bi khăp hdơ̆ng diih nanao, kyuadah klei khăp guôm lu klei soh” (I Y-Pêtrôs 4:8)
Klei êmuh ksiêm mĭn: Ya klei phung Israel dôk ngă kơ phung ayŏng adei diñu phung Yuđa? Ya bruă Aê Diê ngă leh? Boh knhal tuč si jing? Si Aê Diê čiăng drei dôk dơ̆ng ƀơ̆ng huă hŏng phung ayŏng adei amâo thâo bi djŏ hŏng drei?
Trăn Klei Aê Diê Blŭ anei tlâo blư̆ blŭ kơ boh blŭ “găp djuê” (êlan 8, 11, 15) brei ƀuh Aê Diê čiăng phung jing “găp djuê” msĕ si phung Yuđa leh anăn phung Israel dôk jăk hdơ̆ng digơ̆. Phung Israel leh anăn phung Yuđa jing phung đăo kơ Aê Diê sơăi, kyuanăn tơdah phung kahan Israel mă phung Yuđa ba wĭt jing mnă kơ ƀuôn Samari Aê Diê ƀuah leh diñu. Aê Diê tiŏ nao Khua pô hưn êlâo Y-Ôdet nao drông leh anăn lač kơ diñu jih jang klei dưi diñu mâo leh amâo kbiă hriê mơ̆ng klei ktang diñu pô ôh ƀiădah Aê Diê yơh jao leh phung Yuđa kơ kngan diñu. Ƀiădah lĕ, “hŏng klei ngêñ…hmư̆ hing hlăm adiê” diñu ngă kdlưn hĭn kơ klei Aê Diê brei ngă čiăng bi mdjiê lu phung Yuđa. Ară anei tơdah diñu mă phung găp djuê diñu phung Yuđa ba wĭt jing hlŭn klei anăn soh hŏng klei bhiăn Aê Diê (Bruă Lêwi 25:39-55), kyuanăn diñu ăt ngă soh leh anăn ăt srăng tŭ klei Aê Diê ngêñ mơh (êlan 11).
Pă čô khua phung Israel tơdah hmư̆ klei ƀuah anăn digơ̆ gưt ktang snăk. Digơ̆ “gŭ” bi kdơ̆ng hŏng klei atăt ba wĭt phung mnă kyuadah tơdah ngă msĕ snăn klei soh lŏ thiăm kơ klei soh, klei soh jing prŏng snăk tơl Aê Diê bi truh klei ngêñ hlơr kơ phung Israel. Tơdah hmư̆ klei anăn, snăn phung kahan lui hĕ phung mnă leh anăn mnơ̆ng plah mă ti anăp phung khua leh anăn ti anăp jih jang phung bi kƀĭn. Leh anăn diñu mă čhiăm ao mơ̆ng mnơ̆ng diñu plah leh bi hơô jih jang phung dôk asei lưng ti krah digơ̆, brei digơ̆ čŭt klĭt juă, brei digơ̆ huă ƀơ̆ng leh anăn mnăm, leh anăn trôč êa drao kơ digơ̆. Diñu mdiăng jih jang phung awăt hlăm phung digơ̆ hŏng aseh dliê leh anăn atăt digơ̆ wĭt kơ găp djuê digơ̆ ti ƀuôn Yêrikô.
Mơ̆ng anôk ngă jhat kơ phung găp djuê diñu, tơdah hmư̆ klei lŏ bi hdơr kơ klei bhiăn Aê Diê, leh anăn klei soh diñu ngă leh, phung Israel kmhal kơ klei soh leh anăn bi êdah klei khăp hŏng bruă ngă klă hŏng klei hur har. Diñu amâo lŏ ngă klei jhat ôh ƀiădah uêñ mĭn leh anăn đru phung găp djuê diñu hŏng jih ai tiê, brei mnơ̆ng ƀơ̆ng huă leh anăn čhiăm ao kơ digơ̆. Jing phung găp djuê hlăm Khua Yang, drei amâo dưi tlaih ôh kơ klei amâo thâo bi djŏ leh anăn bi mneh msao. Tăp năng hlăm klei krêñ “hmư̆ hing truh kơ adiê”, drei bi blŭ êkŭt, ngă klei jhat leh anăn ngă klei bi hêñ hdơ̆ng drei…, ƀiădah jih jang klei ngă msĕ snăn jing soh hŏng klei Aê Diê čiăng leh anăn Klei Ñu Blŭ. Tơdah drei tuôm mâo knuih leh anăn bruă ngă msĕ snăn kơ phung găp djuê drei, hdơr bĕ, Khua Yang čiăng drei bi khăp leh anăn bi pap brei hdơ̆ng drei wăt tơdah drei srăng bi luč hĕ klei drei pô čiăng leh anăn klei tŭ dưn kơ drei pô dưn mơh. Khua Yang pap leh jih jang klei soh drei, Ñu khăp leh anăn răng kriê drei, kyuanăn brei drei bi pap, bi khăp leh anăn bi răng kriê mơh hdơ̆ng drei.
Si ngă drei khăng ngă kơ phung găp djuê drei tơdah mâo klei bi keh koh, klei amâo thâo bi djŏ hlăm Phung Sang Aê Diê?
Wah lač: Ơ Khua Yang, pap brei kơ kâo đa tơdah hlăm ai tiê kâo mâo klei blŭ, bruă ngă bi êmut kơ phung găp djuê kâo. Đru kâo thâo uêñ leh anăn khăp kơ phung găp djuê kâo msĕ si Ih uêñ leh anăn khăp leh kơ kâo wăt tơdah kâo jing mnuih amâo năng ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
