II Xwmtxheej 28:8-15
Nqe cim:
“Qhov uas tseemceeb tshaj plaws huv tibsi, yog nej ib leej yuav tsum hlub ib leeg tiag tiag, rau qhov txojkev hlub npog tau txhua yam kev txhaum huv tibsi.” (I Petus 4:8)
Lug nug rau sawvdaws xav:
– Cov Yixalayees tabtom ua dabtsi rau lawv cov kwvtij Yudas?
– Tus Tswv pab licas? Thaum kawg zoo licas?
– Tus Tswv xav kom peb yuav tsum ua licas rau cov kwvtij uas tsis haum nrog peb?
Ntu Vajluskub no muaj peb zaug hais txog lo lus “kwvtij” (nqe 8, 11, 15 HMOWSV) qhia pom hais tias tus Tswv xav kom cov uas yog “kwvtij” zoo li cov Yudas thiab Yixalayees yuav tsum ib tug ua zoo rau ib tug. Thaum cov Yudas, uas yog cov Yixalayees cov kwvtij koom tib tug Tswv raug cov Yixalayees tej tubrog ntes coj los hauv nroog Xamalis, ces tus Tswv tau los pab. Nws txib Tus cevlus Audes tuaj tos thiab qhia kom lawv nco ntsoov hais tias lawv muaj yeej tsis yog vim lawv lub zog tiamsis yog vim tus Tswv muab cov Yudas cob rau lawv txhais tes. Tiamsis, thaum lawv “npau taws vog” (HMOWSV) lawv tau ua dhau tus Tswv txojcai uas yog tua cov Yudas tuag lawm coob heev. Nimno yog lawv tseem ntes cov kwvtij no los ua qhev ces yog ua txhaum tus Tswv txoj kevcai lawm (Levis Kevcai 25:39-55), ua li ntawd ces lawv kuj ua txhaum thiab kuj yuav raug tus Tswv rau txim (nqe 11).
Thaum hnov tej lus cem no, cov Yixalayees plaub tug thawjcoj tau muaj lub siab tawv ua raws. Lawv “tsis pom zoo” qhov uas coj cov Yixalayees los ua qhev, vim ua li ntawd ces yog haj yam txhaum loj, yuav ua rau tus Tswv “rau txim” rau lawv. Thaum hnov tej lus no, cov tubrog Yixalayees txawm “muab cov Yudas uas lawv ntes thiab tej khoom uas lawv huab los cob rau cov nomtswv thiab cov pejxeem.” Tomqab ntawd lawv muab tej ris tsho uas lawv huab tau los rau cov Yudas raug ntes hnav, muab khau khiab rau lawv rau, muab mov rau lawv noj, dej rau lawv haus thiab muab roj txiv ntoo los pleev rau lawv tej qhov txhab. Cov uas mus tsis taus kev tau caij nees luav thiab lawv tau xa rov mus cuag “lawv cov kwvtij” hauv lub nroog Yelikaus.
Yog cov uas ua phem rau tej kwvtij tiamsis thaum hnov txog tus Tswv txoj kevcai, paub txog lawv tej kev txhaum, cov Yixalayees tau lees txim thiab ua qhia tshwm dhau ntawm tes haujlwm hauv kev hlub tuaj. Lawv tsis ua phem rau cov kwvtij lawm tiamsis hmov tshua, pab tej kwvtij tej yam cheemtsum. Yog kwvtij hauv tus Tswv, qee zaug peb kuj qaij tsis dhau muaj tej lub sijhawm sib tawmtsam, tsis sib haum. Qee zaug thaum chim “npau taws vog”, peb kuj sib thuam, sib txo, sib ua phem,… tiamsis ua li ntawd tsis raws li tus Tswv thiab Nws Txojlus. Yog peb muaj kev xav thiab tes haujlwm zoo li ntawd rau peb tej kwvtij ces yuav tsum nco ntsoov hais tias tus Tswv xav kom peb yuav tsum sib hlub, sib zam txim txawm tias yuav raug txo hwjchim thiab raug poob ntau yam. Tus Tswv twb zam peb tej kev txhaum, Nws hlub tshua, tu, saibxyuas peb, vim li ntawd, peb kuj yuav tsum zamtxim, hlub thiab tu peb tej kwvtij.
Thov Vajtswv,
Tus Tswv, thov zam txim rau nyuam yaus yog hais tias nyuam yaus lub siab, lus hais, tes haujlwm muaj kev ntxub tej kwvtij. Thov pub nyuam yaus paub hmov tshua thiab hlub tej kwvtij zoo ib yam li Koj twb hmov tshua thiab hlub nyuam yaus txawm tias nyuam yaus tsis tsimnyog tau tej ntawd. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb pheej ua licas rau peb cov kwvtij thaum muaj kev tsis sib haum, sib tawmtsam hauv Pawg Ntseeg?
Nyeem Vajluskub hauv peb lub xyoos: Ntawv Nkauj 22
Kênh Youtube BHKTHN:
