Klei Aê Diê Blŭ: Y-Mathiơ 23:1-7
Êlan kliăng: “Răng bĕ kơ phung khua pô hưn êlâo soh. Diñu hriê kơ diih hơô klĭt biăp, ƀiădah ti lam diñu jing asâo tan ră. Diih srăng thâo kral diñu tui si boh diñu” (Y-Mathiơ 7:15-16a)
Klei êmuh ksiêm mĭn: Ya mnơ̆ng brei ƀuh kơ phung khua čih hră leh anăn phung Pharisi jing phung mâo bruă ƀiădah kƀah klei dưi mơ̆ng Aê Diê? Ya klei Khua Yang čiăng bi hriăm kơ phung lu leh anăn kơ phung ƀĭng kna Ñu? Si drei srăng mă yua klei hriăm anei hlăm Phung Sang Aê Diê?
Khua Yang Yêsu blŭ kơ phung lu leh anăn kơ phung ƀĭng kna Ñu snei, “Phung khua čih hră leh anăn phung Pharisi dôk ti mdhô̆ Y-Môis, …đăm tui klei diñu ngă ôh” (êlan 2-3), klei anăn bi êdah kơ diñu jing phung mâo bruă ƀiădah kƀah klei dưi mơ̆ng Aê Diê.
Tal sa, diñu jing phung ai ngăm, bi hriăm klei bhiăn ƀiădah amâo hdĭp tui si klei bhiăn ôh (êlan 3). Tal dua, diñu kƀah klei khăp, diñu jing phung alah, knŏng dưm mnơ̆ng ktrŏ ti mra arăng, ƀiădah amâo mâo klei bi juh, bi mđĭ ai amâodah pap brei ôh kơ phung ayŏng amai adei pô, diñu mĭn mă knŏng klei tŭ dưn kơ diñu pô, ƀiădah amâo uêñ ôh kơ klei truh kơ pô mkăn (êlan 4). Tal tlâo, diñu khăp hưn ktưn brei arăng ƀuh klei kpă ênô diñu pô, kơ bruă diñu dưi ngă leh hlăm klei đăo msĕ si klei wah lač, dlăng Klei Aê Diê Blŭ, klei kăm ƀơ̆ng huă, klei myơr…(êlan 5), leh anăn diñu hưn ktưn wăt hlăm kdrăp diñu čŭt hơô leh anăn klei kơhưm ti êngao msĕ mơh. Klei diñu kñăm čiăng jing mpŭ mni kơ diñu pô, amâo djŏ mpŭ mni kơ Aê Diê ôh. Tal pă, diñu mâo klei dôk dơ̆ng ƀơ̆ng huă mgao, amâo mâo klei luă gŭ ôh (êlan 6-7), bi mđĭ mă kơ diñu pô tơdah khăp kơ anôk arăng mpŭ êjai ƀơ̆ng huă leh anăn mdhô̆ jăk hĭn hlăm sang bi kƀĭn, brei pô mkăn mpŭ kơ diñu leh anăn pia Nai kơ diñu kyuadah diñu mĭn kơ diñu jing phung mâo bruă yuôm, klei dưi prŏng, leh anăn diñu hưn kơ diñu pô jing phung thâo săng kơ Klei Aê Diê Blŭ hĭn kơ phung mkăn mơh.
Khua Yang Yêsu amâo čiăng ôh phung ƀĭng kna Ñu tui klei bi hmô jhat mơ̆ng phung Pharisi, kyuadah mơ̆ng jih jang knuih diñu lač leh ti dlông bi êdah kơ diñu jing phung ai ngăm, ti êngao diñu jing msĕ si msat arăng mia čŭr kô̆, ƀiădah hlăm lam bŏ hŏng klang mnuih djiê leh anăn djăp mta mnơ̆ng čhŏ (Y-Mathiơ 23:27).
Khua Yang mtă brei Phung Sang Aê Diê hruê anei răng kyuadah srăng mâo lu phung khua pô hưn êlâo soh, diñu jing phung asâo tan hơô klĭt biăp kĕ bi mdjiê leh anăn hiêk ƀơ̆ng. Anăn jing phung blŭ jăk, mtô thâo ƀiădah klei diñu dôk dơ̆ng ƀơ̆ng huă bi klăk kluôm dhuôm; mtô kơ klei khăp ƀiădah lui pô djiê măng pô djiê, mtô kơ klei bi mguôp jing sa ƀiădah diñu pô ngă klei bi kah mbha phung… Anăn jing phung alah khăp yua pô mkăn, brei pô mkăn mă bruă kơ diñu. Anăn jing phung khăng hưn kơ diñu jing mnuih hriăm lu, mâo klei thâo, dưi ngă lu mta bruă ƀiădah amâo uêñ ôh kơ phung ayŏng adei pô. Khua Yang bi hriăm drei “dlăng kơ boh thâo kral ana ñu” (Y-Mathiơ 7:15-20) čiăng thâo leh anăn đăm tui klei diñu ngă ôh (êlan 3). Tơdah drei pô dôk mâo klei mĭn msĕ snăn, jing drei dôk bi rai Phung Sang Aê Diê Khua Yang yơh, ngă klei bi êka kơ phung ayŏng amai adei drei pô, ngă kơ Phung Sang Aê Diê amâo mâo klei bi mđĭ leh anăn amâo dưi đĭ hriê kơ prŏng ôh. Mơ̆ng klei hriăm hruê anei, akâo Khua Yang đru grăp čô drei thâo răng.
Drei dôk tŭ klei bi hmô jhat mơ̆ng phung Pharisi mơ̆?
Wah lač: Ơ Khua Yang, mă hĕ mơ̆ng kâo klei ai ngăm, đru kâo gưt leh anăn ngă tui si klei Ih mtă, thâo bi luă gŭ kâo pô, thâo bi khăp, bi đru leh anăn thâo bi mđĭ ai hdơ̆ng ayŏng amai adei hlăm klei đăo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
