Mathais 23:1-7
Nqe cim:
“Nej yuav tsum ceevfaj cov cev lus cuav; thaum lawv tuaj cuag nej, lawv ua txuj ua li lawv yog cov yaj, tiamsis lawv lub siab phem ib yam li hma. Thaum nej pom lawv tes haujlwm nej yuav paub.” (Mathais 7:15-16a)
Lus nug rau sawvdaws xav:
– Cov vimchiv twg qhia paub cov xibhwb uas qhia Vajtswv txoj kevcai thiab cov Falixais yog cov neeg muaj meejmom tiamsis tsis muaj Vajtswv lub hwjchim?
– Tswv Yexus xav qhia lawv thiab cov thwjtim yam dabtsi?
– Peb siv zaj kawm no li cas nyob hauv Vajtswv Pawg Ntseeg?
Tswv Yexus hais rau cov pejxeem thiab cov thwjtim hais tias, “Cov xibhwb uas qhia Vajtswv txoj Kevcai thiab cov Falixais yog cov uas muaj cuabkav txhais Mauxes txoj Kevcai…tiamsis tsis txhob xyaum ua raws li lawv ua; rau qhov lawv tsis ua raws li lawv qhia.” (nqe 2-3), qhia paub lawv yog cov neeg uas muaj meejmom tiamsis tsis muaj Vajtswv lub hwjchim.
Tim ib, lawv ua neeg ntsejmuag ncaj siab nkhaus, lawv qhia txoj kevcai tiamsis tsis ua raws li txoj kevcai qhia (nqe 3). Tim ob, lawv tsis muaj kev hlub, tub nkeeg, muab nra rau lwm tus ris xwb tsis muaj kev txhawb zog, lossis ua siab ntev rau lawv cov kwvtij, lawv tsuas saib yam uas muaj nqis rau lawv xwb tsis hmov tshua txog lwm tus txojkev ua neej (nqe 4). Tim peb, lawv nyiam khav txog lawv tus kheej kev ncaj ncees, txog tej uas lawv ua tau nyob hauv kev ntseeg xws li thov Vajtswv, nyeem Vajtswv Txojlus, ua kevcai yoo mov, fij nyiaj…, tabmeeg txhua tus (nqe 5), thiab kuj khav tej khaubncaws hnav, thiab tus mojyam sab nraud. Lawv lub homphiaj yog qhuas tus kheej xwb tsis yog qhuas Vajtswv. Tim plaub, lawv ua neeg khavtheeb, tsis txo hwjchim (nqe 6-7), xwbtim tsa tus kheej muaj nqis los ntawm qhov uas xaiv tej chaw zoo hauv tej rooj noj haus lossis hauv tej tsev sablaj, yuam kom lwm tus hwm lawv thiab muab lawv hu ua xibhwb, rau qhov lawv yog cov neeg uas muaj meejmom siab, thiab lawv kuj suav tias lawv yog cov neeg paub Vajtswv Txojlus heev dua lwm tus.
Tswv Yexus tsis xav kom cov thwjtim xyaum cov Falixais tus qauv, vim tej uas lawv ua hais saud qhia paub lawv yog cov xibhwb cuav, sab nraud zoo li lub ntxa dawb paug tiamsis sab hauv muaj cev tuag tsw lwj ntxiag (Mathais 23:27).
Vajtswv Pawg Ntseeg nimno tau tus Tswv ceebtoom tias muaj ntau tus cevlus cuav, yog cov hma uas hnav plaub yaj tom yaj. Qhov ntawd yog cov neeg uas hais lus zoo, txawj qhia tiamsis lawv tsis ua li ntawd; hais tias muaj kev hlub tiamsis tsis hlub lwm tus li; hais tias koom siab tiamsis cais pab pawg… Cov ntawd yog cov neeg uas tub nkeeg, nyiam taw tes kom lwm tus ua rau yus xwb. Tswv Yexus qhia rau peb tias “saib cov txiv paub tsob ntoo” (Mathais 7:15-20) kom peb paub thiab “tsis ua li lawv ua” (nqe 3). Yog peb tabtom muaj lub siab zoo li ntawd, ces yog peb tabtom rhuav Vajtswv Pawg Ntseeg, ua rau cov kwvtij ntseeg nyuaj siab, ua rau Pawg Ntseeg tsis loj hlob. Thov Vajtswv muab zaj kawm hnub no ceebtom qhia peb txhua tus.
Thov Vajtswv,
Vajtswv tus muaj kev hlub, thov Koj tshem lub siab zoo li cov Falixais lub tawm hauv nyuam yaus mus, thov pab nyuam yaus ua li Koj qhia, txo hwjchim, hlub kom txhawb tau cov ntseeg. Nyuam yaus tuav Tswv Yexus lub npe thov, Amees.
Peb puas tabtom ua raws li cov Falixais tus qauv tsis zoo no?
Nyeem Vajluskub hauv peb lub xyoo: Pajlug 30
Kênh Youtube BHKTHN:
