Mathiơ 23:1-7
“Iĕm kơchăng kơ lu bơngai hơlĕnh khan sư bơngai pơtruh nơ̆r ‘Bok Kei-Dei. Lu sư bơngai ‘bơ̆r đak klak ŭnh. Bơ̆n lăng gah ‘nguaih sư hơbŏ dim thoi triu, mă-lei lăm to sư dang kŏ-so ‘maih chă kăp đe. Iĕm băt kơ sư bơngai kơnê̆, yua kơ iĕm ‘bôh tơdrong kơnê̆ sư pơm.” (Mathiơ 7:15-16a)
Nơ̆r jet tơchĕng pơwao:
– Dôm tơdrong ayơ tơ’bôh kơ lu thây bơtho khôi juăt păng lu bơngai Pharisi lu sư đei tơdrong jang mă lei ưh kơ đei tơdrong mơsêh đơ̆ng Kră Yang?
– Kră Yang Yêsu ‘maih wă bơtho lu kon pơlei pơla hăm lu bơngai jơ̆ng ‘bang sư tơdrong kiơ?
– Lu bơ̆n yua iŏk ‘bai pơhrăm âu lăm Khŭl bơngai lui kơ Kră Yang thoi yơ?
Kră Yang Yêsu pơma hăm lu kon pơlei pơla păng lu bơngai jơ̆ng ‘bang Sư “Lu thây bơtho tơdrong juăt đe Juđê păng lu khul Pharisi lu sư bơtho bơ̆n tơdrong juăt Môis pơkă.
‘Iĕm athei pơm kiơ̆ thoi sư bơtho păng rok dôm tơdrong sư pơkă. Mă-lei iĕm ‘nĕ kiơ̆ thoi tơdrong arih lu sư. Tơdrong lu sư bơtho ‘lơ̆ng ră, mă-lei lu sư ưh kơ kiơ̆ tơdrong ‘lơ̆ng noh ôh.” (trong 2-3), tơbôh ăn kơ bơ̆n lu sư jơ̆ đei pơchĕp tơdrong jang mă lei ưh kơ đei tơdrong mơsêh đơ̆ng ‘Bok Kei-Dei.
Mă mônh, lu sư arih ưh kơ tơpă yua kơ lu sư bơtho gah tơdrong khôi juăt mă lei ưh kơ pơm kiơ̆ khôi juăt (trong 3). Mă ‘bar, lu sư ưh kơ đei tơdrong ‘mêm, hơlah, lu sư dan tơdrong pŭ trăp ăn kơ bơngai nai na ưh kơ đei pơlung, pơchŭt kŭm ưh kơ đei ‘brơ̆k mơnat ăn kơ lu ‘nhŏng oh sư kơdih, lu sư kơnhăm kơ tơdrong đei lơi yua kơ lu sư đĕch na ưh kơ hiơ̆k kơ tơdrong arih bơngai nai (trong 4). Mă pêng, lu sư ‘maih dêh gah tơdrong pơ-ang akâu kơdih, lăm tơdrong pơjing tơdrong lui lăm tơdrong krao khan, đŏk Nơ̆r ‘Bok Kei-Dei, ơ̆t kơ sŏng sa, pơyơ̆r…, pơm tơ’bôh bơ̆t anăp đe (trong 5), păng lu sư kŭm pơ-ang kơ abĕn ao gah ‘nguaih kơnhăm lu sư ưh kơ wă kơ ư-ang kơ ‘Bok Kei-Dei ôh mă lei wă kơ ư-ang kơ lu sư đĕch. Mă puăn, lu sư arih lăm tơdrong pơ-ang ưh kơ wă iŏk đon ala (trong 6-7), pôk a-tŏk kơdih wă kơ hơ oei ‘bơ̆t anih gĭt lăm tơdrong et sa, dah mă lăm hnam akŭm ‘Bok Kei-Dei, păng pơgŏ bơngai nai krao lu sư ‘bok Thây wă kơ tơbôh khan lu sư mă bơngai jang tơdrong kơjung păng wă khan lu sư âu hlôh tơdrong ‘Bok Kei-Dei hloh kơ bơngai nai.
Kră Yang Yêsu ưh kơ wă lu bơngai jơ̆ng ‘bang Sư kiơ̆ tơdrong kơmĭl kơnê̆ đơ̆ng lu bơngai Pharisi, dôm tơdrong đei tơ’bôh tơ kơpal ‘noh tơ’bôh ăn kơ lu sư jơ̆ bơngai bơtho ưh kơ tơpă, gah nguaih lu sư nhen thoi bơsat tơsơng đak kok mălei gah lăm ‘bĕnh kơ kơting bơngai lôch ôm hach (Mathiơ 23:27).
Khul bơngai lui kơ Kră Yang chăl dang ei Kră Yang đei roi lê̆ adrol bơih gô đei lơ bơngai bơtho hơlĕnh, gah nguaih nhen thoi kon triu mă lei gah lăm nhen thoi kŏ so wă ling lang kăp sa. Noh jơ̆ lu bơngai pơma hơgei, bơtho hơgei mă lei chăl arih lu sư tơplơ̆ kơ tơdrong mă Sư bơtho noh; lu sư pơma ‘mêm mơnat mă lei arih kơdih kơdih ưh kơ wă hiơ̆k dŏng tơgŭm dih băl; pơma lăm minh jơhngơ̆m đon mă lei sư chă pơm grŭp wă tơklah… noh jơ̆ lu bơngai alah hơnglâu ti maih wă tơhlâu tơ’bôh, wă kơ bơngai nai jang kơ sư. ‘Noh jơ̆ bơngai pơang gah tơdrong hơgei, tơdrong đei pơm keh tơdrong kiơ mă lei ưh kơ hiơ̆k bơngơ̆t kơ ‘nhŏng oh sư kơdih. Kră Yang Yêsu đei bơtho “lăng plei băt kơ tơnơm” (Mathiơ 7:15-20) wă kơ băt păng lê̆ kơ “pơm rok kiơ̆ thoi lu sư đei pơm” (trong 3). Tơdah lu bơ̆n đei jơhngơ̆m đon thoi noh, lei lu bơ̆n wă pơrăm kơ khŭl bơngai lui kơ Kră Yang, pơm ưh kơ hiôk jơhngơ̆m ‘nhŏng oh bơngai lui bơ̆n, pơm kơ khŭl bơngai lui ưh kơ đei tơiung păng wơ̆ pran. Apinh Kră Yang tơgŭm bơ̆n đêl ‘bai pơhrăm ‘nâu wă kơ bơ̆n kơchăng.
Kơkuh bơnê kơ Kră Yang mă ‘mêm, apinh Ih tơgŭm inh hŭt lê̆ đĭ dôm tơdrong thoi lu bơngai Pharisi, apinh Ih tơgŭm inh chu yom pơm kiơ̆ nơ̆r Ih, arih iŏk đon ala, ‘mêm mơnat dŏng tơgŭm pơma tơiung dih băl lăm tơdrong lui. Yua anăn Kră Yang Yêsu Krist. Amen
Lu bơ̆n hăm đei đơ̆ng tơdrong kơmĭl kơnê̆ lu bơngai Pharisi ‘bơm lăm jơhngơ̆m bơ̆n ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Pơđơ̆k 30
Kênh Youtube BHKTHN:
