Klei Aê Diê Blŭ: Klei Mmuñ Siam Hĭn 1:15-17
Êlan kliăng: “Nĕ anei, ih jing siam, Ơ pô kâo khăp, nĕ anei, ih jing siam êdi yơh; ală ih jing msĕ si mgăm” (Klei Mmuñ Siam Hĭn 1:15)
Klei êmuh ksiêm mĭn: Si klei blŭ mtao Y-Salômôn leh anăn mniê ƀuôn Sulam yua bi blŭ hrăm hdơ̆ng diñu? Si klei mtao bi êdah klei ñu uêñ mĭn kơ mniê ƀuôn Sulam? Si klei blŭ leh anăn bruă ngă drei bi êdah klei uêñ mĭn hdơ̆ng ung mô̆ drei?
Tơdah mkŏ mjing klei bi mguôp hlăm gŏ sang, boh nik nak klei bi mguôp ti krah ung mô̆, brei drei răng kơ phung mja điêt kyuadah diñu dưi bi rai jih đang boh kriăk ƀâo (Klei Mmuñ Siam Hĭn 2:15). Dưi lač snei, klei hdĭp ung mô̆ brei mâo klei răng kriê ksul mjing dơ̆ng mơ̆ng mta bruă ngă đơ điêt bi êdah klei khăp hơiêng, thâo bi uêñ mĭn hdơ̆ng ung mô̆, tơdah lui mdei ngă mta klei anei snăn klei hdĭp ung mô̆ srăng ram rai mơh. Klei ngă êlưih ƀuh leh anăn tŭ dưn hĭn čiăng bi êdah klei khăp hơiêng, klei uêñ mĭn jing hŏng klei blŭ yơh. Knŏng hlăm êlan 15, mtao Y-Salômôn dua blư̆ mni kơ klei siam pô ñu khăp: “Nĕ anei ih jing siam, nĕ anei ih jing siam!” Anei amâo djŏ klei blŭ bi myâo ti êngao ôh, ƀiădah hŏng jih ai tiê khăp hơiêng, kyuadah êdei anăn mtam ñu hưn klei siam kƀăt mniê anăn jing “ală ih jing msĕ si mgăm”. Ală jing ƀăng bhă điêt kơ ai tiê (6:22), leh anăn mgăm bi hmô kơ klei doh êngeh (Y-Mathiơ 10:16). Mtao Y-Salômôn mđing dlăng kơ ală čiăng lač klei ñu mđing uêñ êlâo hĭn jing ai tiê mniê anăn, leh anăn tơdah bi hmô ală gơ̆ msĕ hŏng ală mgăm jing čiăng lač, ñu khăp kơ gơ̆ kyuadah ai tiê gơ̆ doh êngeh, êdu êun. Lŏ wĭt lač kơ klei blŭ khăp hơiêng anăn, mniê ƀuôn Sulam lač msĕ mơh “Nĕ anei ih jing siam; Ơ pô kâo khăp, ih kƀăt êdi!” amâo lŏ mâo pô mkăn amâodah ya mta klei mkăn ôh dưi bi mơak kơ gơ̆ hĭn mtao Y-Salômôn.
Dŭm sui leh ung mô̆ drei amâo tuôm lŏ bi blŭ klei khăp hơiêng hdơ̆ng pô? Năng ai mơal kyua klei hdĭp mda duah ƀơ̆ng ngă kơ lu mnuih yap klei ngă anei jing bruă điêt dhiêt đei, mĭndah sui thŭn leh hdĭp mbĭt, snăn klei blŭ khăp hơiêng amâo lŏ yuôm ôh. Ƀiădah lĕ, klei bi dôk ung mô̆ brei mâo klei lŏ bi hlơr leh anăn bi mrâo nanao hŏng klei blŭ khăp hơiêng sĭt êmĭt. Ƀiădah klei blŭ knŏng mâo klei tŭ dưn tơdah mđrăm mbĭt hŏng bruă ngă bi êdah klei khăp uêñ hdơ̆ng ung mô̆. Mtao Y-Salômôn thâo kơ mniê ƀuôn Sulam kbiă hriê mơ̆ng sa boh ƀuôn điêt, sĭt nik gơ̆ srăng ƀuh klei hdĭp ti ƀuôn prŏng Yêrusalem jing mdê snăk sơưn, kyuanăn yơh mtao mkra mjing sa anôk kơ pô khăp ñu dlăng juăt mưng msĕ si klei hdĭp hlăm ƀuôn điêt hŏng “jhưng pĭt drei jing rơ̆k mtah”, “êda sang” hŏng “kyâo sêdar”, “kkal” hŏng “kyâo hngô”. Kyâo sêdar leh anăn kyâo hngô jing mta ana kyâo yuôm hlăk ênuk anăn, klei anei bi êdah kơ mtao Y-Salômôn hŏng jih ai tiê ngă klei jăk čiăng bi mơak kơ mniê ƀuôn Sulam, pô ñu khăp.
Sa hlăm lu mta klei ngă bi rai klei hdĭp ung mô̆ djăl pral hĭn, anăn jing klei amâo lŏ bi uêñ mĭn hdơ̆ng ung mô̆ ôh. Čiăng bi thâo săng hdơ̆ng ung mô̆ snăn brei bi mâo hruê mmông mbĭt, klei khăp, klei gĭr, leh anăn boh nik nak klei bi blŭ hrăm. Pioh mmông hdơ̆ng ung mô̆. Blŭ klei khăp hơiêng leh anăn bi êdah klei mđing uêñ sĭt êmĭt hdơ̆ng ung mô̆ grăp hruê.
Si ngă ung mô̆ diih khăng bi êdah klei khăp hơiêng leh anăn klei bi mđing uêñ hŏng klei blŭ leh anăn bruă ngă mơ̆?
Wah lač: Ơ Khua Yang, kâo myơr kơ Khua Yang klei bi mni kơ pô khăp Ih mdưm ti djiêo kâo. Akâo Khua Yang đru ung mô̆ kâo thâo bi khăp leh anăn thâo bi đru hlăm klei hdĭp ung mô̆ Khua Yang brei leh kơ hmei.
Dlăng Klei Aê Diê Blŭ hlăm tlâo thŭn: Y-Markôs 8:1-9:1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
