Klei Aê Diê Blŭ: Y‑Mathiơ 9:14-17
Êlan kliăng: “Kyuanăn tơdah sa čô dôk hlăm Krist, ñu jing mnuih hrih mrâo leh; mnơ̆ng hđăp êgao tuč leh, nĕ anei, jih jang mnơ̆ng jing mrâo leh sơăi.” (II Kôrantô 5:17).
Klei êmuh ksiêm mĭn: Ya klei phung ƀĭng kna Y‑Yôhan nao êmuh Khua Yang Yêsu? Si klei diñu bi mĭn bi êdah hlăm klei êmuh anăn? Ya klei yuôm hŏng phung tui hluê Khua Yang mơ̆ng klei Khua Yang Yêsu wĭt lač? Si Khua Yang čiăng drei mlih mrâo?
Y‑Yôhan dôk hlăm sang mnă, phung ƀĭng kna ñu nao kơ Khua Yang Yêsu leh anăn êmuh, “Si ngă hmei leh anăn phung Pharisi kăm ƀơ̆ng huă, ƀiădah phung ƀĭng kna Ih amâo kăm ƀơ̆ng huă ôh?” Klei êmuh anei čiăng lač kơ phung Pharisi leh anăn phung ƀĭng kna Y‑Yôhan hdĭp djŏ, bi Khua Yang Yêsu leh anăn phung ƀĭng kna Ñu hdĭp soh. Klei bhiăn kčah kơ klei kăm ƀơ̆ng huă grăp thŭn sa blư̆ hlăm Knăm bi doh klei soh (Bruă Lêwi 23:27-32). Phung Pharisi čiăng bi mklă klei yap kpă anăn, snăn lŏ mjing klei bhiăn kăm ƀơ̆ng huă dua blư̆ grăp hruê kăm (Y‑Luk 18:12). Klei Khua Yang Yêsu wĭt lač brei ƀuh Ñu amâo bi kdơ̆ng ôh hŏng klei kăm ƀơ̆ng huă, phung ƀĭng kna Ñu ăt srăng kăm ƀơ̆ng huă kơ êdei anăp, hlăk Ñu amâo lŏ dôk mbĭt hŏng digơ̆ ôh. Ƀiădah hlăm wưng ară anei, phung ƀĭng kna ñu amâo kăm ƀơ̆ng huă ôh kyua Yang Mêsia ăt dôk mbĭt hŏng diñu, amâo mdê ôh hŏng klei “sa čô ung dôk hŏng ƀĭng găp hriê mơak hruê bi kuôl” kyua anăn brei hơ̆k mơak hĭn kơ ênguôt hnĭng.
Phung ƀĭng kna Y‑Yôhan leh anăn phung Pharisi dôk bi lŭk klei bhiăn leh anăn knhuah gru djuê ana, mă anăn mjing hnơ̆ng čuăn čiăng mkă klei đăo knang huĭ mpŭ mơ̆ng sa čô mnuih. Khua Yang Yêsu hriê ti lăn ala anei amâo djŏ čiăng lŏ mkra wĭt klei đăo phung Israel hŏng dŭm klei bhiăn leh anăn knhuah gru kjăp phĭt ôh. Ăt kăn hriê mkra plah wah klei pap leh anăn klei bhiăn msĕ si mnal mrâo hlăm ao sô amâodah tuh kpiê mrâo hlăm kdô klĭt sô ôh. Kyua klei bi lŭk snăn knhal tuč knŏng jing kjham hĭn, ao sô mâo lu anôk jhĭt, kdô klĭt dưm kpiê hluh kpiê hŏk. Khua Yang Yêsu hruê bi hriăm dŭm klei mrâo mrang, Ñu iêô mthưr jih jang mnuih hriê kơ Ñu čiăng dưi pap brei klei soh leh anăn mlih mrâo kluôm ênŭm.
Hruê anei, drei ăt mâo klei mĭn msĕ si phung khua ƀĭng kna Y‑Yôhan mơh. Lu mnuih khăng mă klei jing pô pioh mkă pô mkăn, hlei pô amâo ngă ôh msĕ hŏng klei mĭn pô snăn jing hdĭp soh. Amâodah drei dlăng dŭm bruă ngă mkŏ mjing klei đăo, kdrăp klei bhiăn yuôm hĭn kơ klei bi mguôp hŏng Khua Yang leh anăn Klei Aê Diê Blŭ. Amâodah lu mnuih ăt ƀuh jăk leh hơĭt ai tiê kyua pô ngă leh djăp ênŭm bruă klam mơ̆ng sa čô đăo hlăm sang Aê Diê… Tơdah bi mĭn leh anăn lŏ dơ̆ng hdĭp msĕ snăn drei dôk tui kru êdeh phung ƀĭng kna Y-Yôhan leh anăn phung Pharisi mphŭn dô dih.
Klei Aê Diê Blŭ mtô: “Kyuanăn tơdah sa čô dôk hlăm Krist, ñu jing mnuih hrih mrâo leh; mnơ̆ng hđăp êgao tuč leh, nĕ anei, jih jang mnơ̆ng jing mrâo leh sơăi.” (II Kôrantô 5:17). Aê Diê čiăng phung tui hluê Ñu jing mnuih mrâo, čiăng klei hdĭp hđăp êgao tuč, dăp anôk kơ klei hdĭp mlih mrâo kluôm ênŭm.
Si drei bi mĭn kơ klei hdĭp mlih mrâo kluôm ênŭm sĭt tui hluê Khua Yang?
Wah lač: Ơ Khua Yang, kyua khăp kâo Ih hriê ti lăn ala jing mnuih. Akâo Ih bi mtlaih kâo mơ̆ng klei bhiăn hđăp ti lăn ala, klei bhiăn ti êngao čiăng kâo klă sĭt dưi mlih mrâo kluôm ênŭm leh anăn hdĭp hŏng Khua Yang kluôm ênŭm.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 18
Kênh Youtube BHKTHN:
