Mathais 9:14-17
Nqe cim:
“Tus uas nrog Yexus Khetos koom ib txojsia, tus ntawd yog neeg tshiab. Nws lub neej qub twb dua lawm nimno nws muaj lub neej tshiab” (II.Kauleethaus 5:17).
Lus nug rau sawvdaws xav:
- Yauhas tus uas muab neeg ua kevcai raus dej cov thwjtim tuaj nug Yexus txog yam dabtsi?
- Lo lus nug ntawd qhia paub lawv txojkev xav li cas?
- Tswv Yexus cov lus teb rau lawv muaj lub ntsiab li cas rau cov neeg uas nrog Nws mus?
- Tus Tswv xav kom peb hloov dua tshiab zoo li cas?
Yauhas tus uas muab neeg ua kevcai raus dej tabtom raug kaw hauv tsev lojcuj, nws cov thwjtim txawm tuaj cuag Yexus thiab nug hais tias, “Ua li cas peb cov thiab cov Falixais pheej ua kevcai yoo mov, tiamsis koj cov thwjtim tsis ua li?” Lo lus nug no lub ntsiab yog xav hais tias, cov neeg Falixais thiab Yauhas cov thwjtim ua tau lub neej zoo lawm, tshuav Tswv Yexus thiab Nws cov thwjtim tseem ua neej tsis tau zoo. Vajtswv txoj kevcai teem tseg kom yuav tsum ua kevcai yoo mov ib xyoos ib zaug ncaj rau hnub ua kevcai theej txhoj (Levis Kevcai 23:27-32). Cov neeg Falixais xav ua kom lwm tus pom lawv yog neeg dawbhuv, lawv thiaj rhawv kabke ua kevcai yoo mov ib lub limtiam ob zaug (Lukas 18:12). Cov lus uas Tswv Yexus teb rau lawv qhia paub hais tias Nws tsis tawmtsam ua kevcai yoo mov, Nws cov thwjtim yeej yuav ua kevcai yoo mov thaum uas Nws tsis nrog lawv nyob lawm. Tiamsis lub sijhawm nimno, Nws cov thwjtim tseem tsis ua kevcai yoo mov vim tus Mexiyas tseem nrog lawv nyob ua ke, zoo li “tus nraug vauv tseem nrog nws cov phoojywg noj tshoob ua ke”, yog li lawv yuavtsum muaj kev zoo siab dua li uas nyuaj siab.
Yauhas cov thwjtim thiab cov Falixais tabtom muab Vajtswv txoj kevcai thiab tej kabke uas neeg txhim muaj los sib xyaws ua ke, lawv muab qhov ntawd los ntaus nqi ib tug neeg txojkev ntseeg. Tswv Yexus tsis yog los hauv ntiajteb no kho cov Yixalayees txojkev ntseeg raws li kevcai thiab tej kabke. Thiab kuj tsis yog los muab Vajtswv txoj koob hmoov thiab txoj kevcai lo sib xyaw ua ke xws li muab daim ntaub tshiab xaws nrog daim ntaub qub lossis muab cov cawv tshiab hliv nrog cov cawv qub. Yog muab los tso sib xyaws ua ke zoo li ntawd, thaum kawg haj yam tsis zoo, lub tsho qub yuav ntuag, lub hub yuav tawg ua rau cawv si tas. Tswv Yexus los qhia yam tshiab, Nws nqua hu txhua tus neeg los cuag Nws kom tau txais kev zam txim thiab tau lub neej tshiab.
Niaj hnub nimno, peb kuj muaj kev xav zoo ib yam li Yauhas cov thwjtim. Ntau leej pheej muab yus ua qauv mus ntaus nqi lwm tus, yog leejtwg tsis ua raws li yus xav ces suav hais tias lawv ua tsis yog lawm. Lossis peb muab tej kevcai saib tseemceeb dua txojkev sib raug zoo nrog Vajtswv thiab Vajtswv Txojlus. Lossis ntau leej kuj tso siab vim xav hais tias lawv twb ua tiav feem tswvcuab thaum nyob hauv tuamtsev lawm v.v… Yog tseem muaj kev xav thiab ua lub neej zoo li no, ces peb tabtom zoo ib yam li Yauhas cov thwjtim thiab cov neeg Falixais thaum ub ntag. Vajtswv Txojlus qhia hais tias: “Tus uas nrog Yexus Khetos koom ib txojsia, tus ntawd yog neeg tshiab. Nws lub neej qub twb dua lawm nimno nws muaj lub neej tshiab” (II.Kauleethaus 5:17). Tus Tswv xav kom cov neeg uas ntseeg Nws hloov ua neeg tshiab, lub neej qub twb dua lawm, nimno tseg chaw rau lub neej uas hloov dua tshiab.
Peb xav li cas txog lub neej tshiab uas peb los ntseeg Vajtswv?
Thov Vajtswv:
Vajtswv, vim hlub nyuam yaus Koj thiaj los yug ua neeg. Thov Koj pab nyuam yaus dim tej kabke qub hauv lub ntiajteb no, tej kevcai, kom nyuam yaus ua tau lub neej tshiab nyob hauv tus Tswv Yexus. Amees.
Nyeem Vajluskub hauv peb lub xyoo: I.Xwmtxheej Vajntxwv 18
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
