Klei Aê Diê Blŭ: I Y-Pêtrôs 4:12-16
Êlan kliăng: “Tơdah arăng dlao wač kơ diih kyua anăn Krist, diih mâo klei jăk jĭn;…” (I Y-Pêtrôs 4:14)
Klei êmuh ksiêm mĭn: Ya ngă khua ƀĭng kna Y-Pêtrôs mtô drei brei dlăng klei lông dlăng msĕ si “kpur pui”? Ya ngă klei lông dlăng jing sa klei jăk jĭn? Ya jing sa hlăm lu hdră êlan găn gao klei lông dlăng hlăm klei hdĭp?
Mâo sa mta klei lông dlăng ƀiă mnuih hmăng hmưi, anăn jing klei lông dlăng! Klei lông dlăng anei jing “arăng dlao wač kơ diih kyua anăn Krist” amâo djŏ ôh tŭ klei knap mñai kyua “pô bi mdjiê mnuih, amâodah pô knĕ, amâodah pô ngă soh prŏng, amâodah pô khăp mŭt bi rŭng hlăm bruă arăng”. Khua ƀĭng kna Y-Pêtrôs mtô drei brei dlăng klei lông dlăng msĕ si “kpur pui” čiăng lač sa klei mjuăt mjing čiăng kơ klei đăo drei jing ênoh yuôm bhăn. Kyuanăn, “Tơdah arăng dlao wač kơ diih kyua anăn Krist, diih mâo klei jăk jĭn”.
Lông dlăng jing sa klei jăk jĭn kyuadah êlâo hĭn, klei anăn đru kơ klei đăo drei jing doh êngeh hĭn kơ mah doh. Leh anăn klei lông dlăng bi knăl kơ drei jing dŏ Aê Diê, mâo “Mngăt Myang Aê Diê dôk ti diih”. Anăn jing klei bi knăl kơ sa čô đăo kơ Krist sĭt. Khua ƀĭng kna Y-Pêtrôs leh anăn lu phung khua ƀĭng kna mkăn tơdah tŭ klei knap mñai kyua Anăn Khua Yang diñu ƀuh ai tiê diñu “… hơ̆k mơak kyuadah Aê Diê yap digơ̆ năng tŭ klei hêñ kyua anăn Yêsu.” (Bruă Phung Khua Ƀĭng Kna 5:41). Khua Yang Yêsu Pô yơh lač leh: “Jăk mơak yơh phung arăng ngă jhat kyua diñu tui klei kpă ênô, kyuadah ƀuôn ala mtao adiê pioh kơ diñu” (Y-Mathiơ 5:10). Ñu Pô ăt tŭ klei knap mñai mơh, arăng dlao wač, arăng arưp aram êjai dôk mtô lač, ngă bruă jăk, bi mtlaih mnuih hŏng klei yuôm bi hlao klei ruă, suôt yang jhat,… tơl ti knhal tuč tŭ klei djiê hŏng klei hêñ leh anăn kơh kbiă lŏ hdĭp guh kơang. Drei jing dĭng buăl amâo kdlưn hĭn kơ khua ôh, ăt tŭ mbĭt klei knap mñai leh anăn kơh dưn klei guh kơang mbĭt hŏng Khua Yang.
Snăn amâo mâo “klei lŏ bi kngăr msĕ si drei tuôm hŏng klei truh mdê hĭn ôh” tơdah klei lông dlăng truh, ƀiădah bi mklăk wĭt, knhuah hdĭp brei mâo tơdah tŭ klei knap mñai kyua Anăn Khua Yang “Ƀiădah hơ̆k mơak bĕ kyuadah diih tŭ mbĭt klei knap mñai Krist” ! Si ngă dưi mâo klei hơ̆k mơak? Boh sĭt hlăk phŭn tŭ klei knap mñai amâo mâo ôh pô amâo hnĭng ênguôt. Khua ƀĭng kna Y-Pêtrôs čih leh hlăm I Y-Pêtrôs 1:6-7 snei, “… ară anei năng ai diih srăng tŭ bhiâo klei lông dlăng lu mta dưn,”, ƀiădah tơdah djă pioh kjăp klei đăo, ti knhal tuč klei lông dlăng srăng ba hriê “dưi mâo klei bi mni, klei guh kơang, leh anăn klei mpŭ ti hruê Yêsu Krist srăng bi êdah”. Snăn jăk hĭn “đăm brei ñu hêñ ôh, ƀiădah brei ñu mpŭ mni kơ Aê Diê”.
Phung đăo kơ Krist amâo tlaih ôh tŭ klei knap mñai kyua lăn ala ngă jhat tơdah hdĭp klei hdĭp đăo ti krah lăn ala. Klei Aê Diê Blŭ bi mđĭ ai drei đăm hêñ ôh ƀiădah bi mklăk wĭt, ƀuh klei jăk jĭn Khua Yang brei tơdah tŭ klei knap mñai kyua Anăn Khua Yang, hŏng klei anăn klei hdĭp drei tui hlue Khua Yang kwang nanao asăp klei mpŭ mni kơ Aê Diê.
Si knhuah hdĭp drei tơdah tuôm hŏng klei lông dlăng kyua Anăn Khua Yang?
Wah lač: Ơ Khua Yang Yêsu khăp hơiêng! Êjai dôk hdĭp ti lăn ala anei brei kâo jhŏng tŭ klei knap mñai kyua Anăn Ih, kyuadah kâo thâo klei anăn bi mjuăt bi doh klei đăo kâo. Thiăm kơ kâo klei ktang hlăm klei lông dlăng, čiăng kơ kâo dưi găn gao klei ênguôt hnĭng ƀiădah hơ̆k mơak mpŭ mni kơ Khua Yang kyua dưi yap năng tŭ klei knap mñai kyua Anăn Khua Yang! Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
