I Petus 4:12-16
Nqe cim:
“Yog leejtwg thuam nej vim nej yog cov uas ntseeg Yexus Khetos, nej cia li zoo siab” (I Petus 4:14).
Lus nug rau sawvdaws xav:
– Vim licas Timthawj Petus qhia peb saib tej kev sim siab zoo li “cub hluav taws”?
– Vim licas sim siab yog ib txoj koobhmoov?
– Ib txoj hauv tej haukev pab peb hla dhau kev sim siab hauv lubneej yog dabtsi?
Muaj ib yam koob hmoov muaj tsawg leej ntshaw, ntawd yog kev sim siab! Kev sim siab hais ntawm no yog “raug thuam vim ntseeg Yexus Khetos” tsis yog “tua neeg, ua tubsab, ua phem thiab thab plaub.” Timthawj Petus qhia peb saib kev sim siab zoo li “cub hluav taws” txhais tau hais tias ntawd yog ib qho kev ceem ua rau peb txojkev ntseeg thiaj muaj nqis tuaj. Yog li ntawd, nws thiaj hais tias: “Yog leejtwg thuam nej vim nej yog cov uas ntseeg Yexus Khetos, nej cia li zoo siab”.
Kev sim siab yog ib txoj koob hmoov, vim yam xubthawj qhov ntawd pab peb txojkev ntseeg tau ceem huv dua tej uas tseem kub. Txuas ntxiv, kev sim siab ua tabpov tias peb yog tus Tswv tug, muaj Vaj Ntsujplig lub tshwjchim c ntsa iab nyob nrog peb. Ntawd yog lub cim ntawm ib tug uas ntseeg Yexus tseeb. Timthawj Petus thiab lwm tus Timthawj thaum raug txomnyem vim Vajtswv Lub Npe, “lawv zoo siab kawg li, rau qhov Vajtswv pom zoo cia cov uas qhia Yexus zaj raug kev txajmuag” (Tes Haujlwm 5:41). Tswv Yexus tawm lus hais tias: “Cov uas raug luag tsimtxom vim lawv ua raws li Vajtswv lub siab nyiam, cov ntawd tau koob hmoov; rau qhov Ntuj Ceebtsheej yog lawv tug” (Mathais 5:10). Tswv Yexus kuj tiv kev txomnyem, raug thuam, raug hem thaum qhuab qhia, ua zoo, siv txujci cawm neeg, ntiab dab,… thaum kawg Nws raug tuag saum tus ntoo khaublig thiab tomqab ntawd Nws sawv rov los ci ntsa iab. Peb uas yog tubqhe yeej tsis muaj hwjchim dua tus Tswv, peb yuav tsum koom nrog Nws raug txomnyem thiaj tau koom nrog Nws tau koobmeej ci ntsa iab.
Yog li ntawd peb tsis txhob xav tsis thoob lossis “poob siab” thaum raug kev sim siab, tiamsis yuav tsum “zoo siab, rau qhov uas” peb “raug kev tsimtxom ib yam li Yexus Khetos twb raug los lawm!” Yuav ua licas thiaj zoo siab taus? Tseeb tiag thaum nyuam qhuav raug txomnyem tsis muaj ib tug twg tsis nyuaj siab, tsis yws. Timthawj Petus sau tseg hauv I Petus 1:6-7 hais tias, “Txawm yog nej yeej yuav raug kev txomnyem nyuaj siab ib nyuag ntu los nej yuav tsum zoo siab… Vajtswv yuav tsum muab nej txojkev ntseeg uas tseemceeb dua kub sim saib puas yuav thev taus. Yog nej thev taus, thaum txog hnub uas Yexus Khetos los Vajtswv yuav qhuas nej thiab nej yuav tau ntsejmuag.” Yog li ntawd thaum “nej raug kev tsimtxom, nej cia li ua Vajtswv tsaug, nej tsis txhob txajmuag qhia rau cov neeg uas tsimtxom nej ntawd hais tias nej yog cov uas ntseeg Yexus Khetos.”
Tus ntseeg Yexus qaij tsis dhau kev txomnyem vim raug luag tsimtxom thaum ua neej ntseeg nrog neeg ntiajteb. Vajtswv Txojlus txhawb peb lub zog txhob txajmuag, tiamsis saib tej ntawd yog koob hmoov tus Tswv pub, dhau qhov ntawd peb lubneej uas nrog tus Tswv mus yuav nrov ntxhe suab hu nkauj qhuas Vajtswv.
Thov Vajtswv,
Tswv Yexus uas hlub tshua! Ua neej nyob hauv ntiajteb no, thov kom nyuam yaus muaj lub siab tawv tiv kev txomnyem vim Koj Lub Npe rau qhov nyuam yaus paub hais tias tej ntawd sim nyuam yaus txojkev ntseeg. Thov ntxiv zog rau nyuam yaus thaum raug sim siab kom nyuam yaus hla dhau kev nyuaj siab, hu nkauj qhuas Koj vim tau suav hais tias yog tus raug txomnyem vim Koj Lub Npe! Nyuam yaus tuav Yexus Khetos lub npe thov, Amees.
Peb xav licas thaum ntsib kev sim siab vim tus Tswv Lub Npe?
Nyeem Vajluskub hauv peb lub xyoos: II Kevcai 11
Kênh Youtube BHKTHN:
