Klei Aê Diê Blŭ: Klei Bi Hriêng 25:8-10; Y-Mathiơ 18:15-17
Êlan kliăng: “Tơdah ayŏng adei ih ngă soh hŏng ih, nao hưn kơ ñu klei soh ñu hjăn hdơ̆ng diih. Tơdah ñu hmư̆ klei ih, ih mâo klei bi grăng leh hŏng ayŏng adei ih” (Y-Mathiơ 18:15)
Klei êmuh ksiêm mĭn: Ya ngă đăm ruăt nao hưn kơ khua phat kđi ôh? Si ngă Khua Yang Yêsu mtă tơdah bi mâo klei hlăm Phung Sang Aê Diê? Ya klei drei čiăng bi mlih hĕ tơdah mĭn kơ bruă ngă čiăng đăm mâo klei bi blŭ kđi hŏng ayŏng amai adei?
Mtao Salômôn bi hriăm anak ñu hdră êlan hdĭp hŏng klei thâo mĭn snei: “Đăm ruăt hưn kơ khua phat kđi ôh”. Klei bi hriăm anei lač kơ sa čô mnuih ruăt kčŭt hŏng khua phat kđi amâodah ruăt nao bi tuôm hŏng pô ñu bi mâo klei. Mluk snăk tơdah ruăt kčŭt kơ sa čô mnuih. Tal sa, tơdah ruăt nao hưn kơ khua phat kđi, dleh snăk mâo mnơ̆ng hưn bi sĭt hŏng klei djŏ, klă mngač, amâo djŏ knŏng amâo mâo klei tŭ ôh ƀiădah tăp năng wăt srăng ba kđi mơh kơ pô tŭ klei kčŭt, tơdah snăn sĭt nik anak srăng tŭ “klei bi hêñ.” Tal dua, tơdah kčŭt kđi kơ sa čô mnuih jing srăng bi êdah klei amâo jăk ôh kơ pô anăn, brei anak thâo pô tŭ klei kčŭt ăt srăng bi êdah mơh klei jhat pô kčŭt dôk mdăp. Tăp năng pô kčŭt dưi hlăm klei phat kđi ƀiădah kơ êdei ñu srăng mâo klei rŭng kyuadah pô ñu kčŭt srăng bi êdah klei jhat hgăm ñu ngă leh. Pruê̆ blŭ “pô riêng gah ih” čiăng lač kơ phung găp djuê, amâodah phung tuôm jing leh mah jiăng amâodah phung mă bruă mbĭt, kyuanăn ƀiă lu diñu ăt thâo mơh kơ klei hgăm anak. Tal tlâo, tơdah anak hưn kơ khua phat kđi, bhiăn srăng djŏ tuôm hŏng pô tal tlâo, jing phung hưn bi sĭt amâodah phung anak đoh ktŭng dôk tĭng kơ anak. Ênưih snăk kyua klei tŭ dưn kơ pô, anak “srăng bi êdah klei hgăm sa čô mkăn” (êlan 9), snăn yơh anak srăng jing “pô yăl dliê djưč” blŭ jhat êkŭt tluôn (Klei Bi Hriêng 11:13; 20:19). Pô hriăm êlam Klei Aê Diê Blŭ Jerome mblang kơ êlan anei snei: “ya klei ală ih ƀuh đăm ruăt bi êdah ôh hlăm klei bi mneh msao”. Tơdah pô mâo klei hŏng anak hmư̆ klei anak kčŭt mčeh, diñu srăng bi hêñ anak leh anăn dleh snăk anak lŏ hrui wĭt klei blŭ leh. Ti knhal tuč, wăt tơdah anak dưi hlăm klei bi blŭ kđi, anak srăng luč knuih mơh, leh anăn klei luč liê prŏng hĭn jing luč mah jiăng. Kyua klei anăn yơh, snăn brei anak răng bi jăk, mĭn bi nik êlâo kơ nao hưn kơ khua phat kđi.
Hlăm klei amâo bi djŏ hdơ̆ng ayŏng anai adei hlăm Phung Sang Aê Diê, Khua Yang Yêsu mñă kơ klei khăp, klei pap leh anăn klei doh jăk (dlăng Y-Mathiơ 18:15-17). Brei drei gĭr bi luă gŭ drei pô, leh anăn thâo răng tơdah mgaih mkra jih jang klei amâo bi djŏ. Khua Yang Yêsu lač: “Tơdah ayŏng adei ih ngă soh hŏng ih, nao hưn kơ ñu klei soh ñu hjăn hdơ̆ng diih. Tơdah ñu hmư̆ klei ih, ih mâo klei bi grăng leh hŏng ayŏng adei ih” (Y-Mathiơ 18:15). Đăm drei knŏng mĭn mă kơ klei mgaih mkra klei amâo bi djŏ hŏng klei răng, hŏng klei êdu êun leh anăn hŏng klei kpă ôh, ƀiădah wăt brei drei mĭn mơh kơ klei yuôm hĭn jing drei “mâo klei bi grăng hŏng ayŏng adei” drei. Brei phung đăo bi mguôp jing sa, đăm ruăt duah bi blŭ kđi, bi êka hdơ̆ng găp ôh.
Drei khăng ruăt kčŭt kđi, amâodah tŭ klei arăng bi êka, amâodah bi êka kơ pô mkăn kyua klei drei djưč mơ̆?
Wah lač: Ơ Khua Yang, kâo bi mni kơ Ih pap brei leh klei soh kâo leh anăn brei kâo jing anak Ih. Akâo Khua Yang đru hmei thâo luă gŭ, thâo bi khăp čiăng weh đuĕ mơ̆ng klei bi kčŭt kđi. Đru hmei thâo bi kjăp klei đăo hdơ̆ng hmei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
