Pajlug 25:8-10; Mathais 18:15-17
Nqe cim:
“Yog koj ib tug kwvtij ua txhaum rau koj, koj cia li mus qhia nws qhov txhaum rau nws thaum neb ob leeg xwb. Yog nws mloog koj lus, koj yuav tau nws rov los ua koj kwvtij li qub.” (Mathais 18:15)
Lus nug rau sawvdaws xav:
– Vim li cas tsis txhob maj ua rau muaj kev sib cav?
– Tswv Yexus qhia li cas thaum muaj kev sib cav nyob hauv Pawg Ntseeg?
– Peb cheemtsum hloov dabtsi ntawm txojkev xav mus txog kev ua haujlwm kom tsis muaj kev sib cav?
Vajntxwv Xalumoos qhia rau cov menyuam tus lw ua neeg muaj tswvyim: “koj tsis txhob maj mus ua timkhawv rau hauv tsev tu plaub”. Lo lus qhia no hais txog ib tug neeg maj mus ua timkhawv nkaug neeg lossis rooj tu plaub, lossis maj ntsib tus neeg hais yus. Maj mus liam txim rau ib tug neeg yog ib qhov ruam kawg nkaus. Tim ib, thaum maj mus ua timkhawv ces yuav tsis yog timkhawv tseeb, meej, tsis yog ua rau lub rooj tu plaub ntug tu tsis tau xwb tseem yuav raug muab nyiaj ntxuav ntsejmuag rau tus neeg foob plaub ntug, ua li ntawd yuav “txajmuag heev”. Tim ob, thaum mus hais plaub ntug yog muab tej yam tsis zoo los hais lwm tus, yuav tsum paub tias tus neeg ntawd kuj yuav qhia yam tsis zoo uas tus neeg foob nws mus hais plaub thiab. Qee zaus thaum hais yeej plaub ntug los tseem ntsib kev nyuaj tom qab no uas yog tus neeg ntawd muab yus qhov tsis zoo nthuav tawm. Nqe lus “dua lwm tus” yog hais txog tus neeg ntawd cov txheebze, lossis nws cov phoojywg, lawv paub ntau yam uas yus ua zais ntshis. Tim peb, thaum koj mus hais plaub ntug, yuav muaj qhov kev ntsig txog tus tim peb, yog tus neeg ua timkhawv lossis tus neeg tuaj koj tog. Yuav yoojyim raug lwm tus ntxias, “muab hais ncha teb ncha chaw” (nqe 9), yog li ntawd koj yuav dhau mus ua“Tus neeg taugxaiv yeej tsis paub zais lus” hais tsis zoo rau lwm tus (Pajlug 11:13; 20:19). Tus tub txhais Vajluskub hu ua Jerome txhais nqe Vajluskub li no: “Tej uas koj lub qhovmuag pom, tsis txhob maj hais tawm rau lub sijhawm sib cav”. Thaum tus neeg ntawd hnov koj taugxaiv, lawv yuav thuam koj thiab koj rub tsis tau cov lus ntawd rov qab lawm. Thaum kawg, txawm yog koj hais plaub ntug yeej, los koj yuav poob ntsejmuag, koob npe, thiab poob kev phoojywg. Qhov no yog cov vimchiv koj yuav tsum ua tib zoo saib, xav ua ntej mam hais plaub ntug.
Tej kev tsis sib haum nyob hauv Pawg Ntseeg, Tswv Yexus hais kom ua neeg muaj kev hlub, hmov tshua thiab kev dawbhuv (saib Mathais 18:15-17). Peb yuav tsum muaj lub siab txo hwjchim, ua siab mos siab muag, thiab ua tib zoo saib thaum daws teebmeem. Tus Tswv hais tias: “Yog koj ib tug kwvtij ua txhaum rau koj, koj cia li mus qhia nws qhov txhaum rau nws thaum neb ob leeg xwb. Yog nws mloog koj lus, koj yuav tau nws rov los ua koj kwvtij li qub” (Mathais 18:15). Peb tsis yog pheej xav kom daws tau tej teebmeem mus rau qhov yog, ua zoo, ncaj ncees xwb, tiamsis yuav tsum xav txog qhov tseemceeb tshaj uas yog “tau nws rov los ua koj kwvtij li qub”. Vajtswv cov menyuam yuav tsum koom siab, qaij deb tej kev sib cav, ua rau muaj kev nyuaj siab.
Thov Vajtswv,
Vajtswv, nyuam yaus ua Koj tsaug qhov Koj zam txim thiab pub nyuam yaus ua koj menyuam. Thov Vajtswv Koj pab kom nyuam yaus txo hwjchim, sib hlub kom thiaj tsis muaj kev sib cav sib ceg. Cia nyuam yaus rau siab ntso txhim kho kev ntseeg. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb puas pheej maj mus ua timkhawv hais plaub ntug, lossis raug kev nyuaj siab lossis ua rau lwm tus nyuaj siab vim qhov uas yus taugxaiv?
Nyeem Vajluskub hauv peb xyoo: Yelemis 35
Kênh Youtube BHKTHN:
