Tơdrong Pơđơ̆k 25:8-10; Mathiơ 18:15-17
“Dah bôl buăl bơngai lui pơm kơnê̆ kơ iĕm, iĕm athei khan kơ sư kơdrô̆ biĕm. Dah sư chu kơ iĕm khan, lei iĕm oei hiôk hăm sư.” (Mathiơ 18:15)
Nơ̆r jet tơchĕng pơwao:
– Yua kơ kiơ ‘nĕ kơ hăt tơbăt kơ ‘bok sek tơlang?
– Kră Yang Yêsu bơtho thoi yơ mưh đei tơdrong pơma băl lăm Khul Bơngai Lui?
– Bơ̆n kăl kơ tơplih tơdrong kiơ đơ̆ng tơdrong tơchĕng pơma băl hăm ‘nhŏng mai oh?
Pơtao Sôlômôn bơtho kon sư tơdrong arih gơh hơgei: “’Nĕ kơ hăt tơbăt kơ ‘bok sek tơlang”. Nơ̆r bơtho âu pơma kơ minh ‘nu bơngai hăt hot kơ tơbăt kơ ‘bok sek tơlang dah hăt hot kơ tơ’bơ̆p bơngai đei tơdrong hăm ih. Kơtul dêh mưh hăt hot jô̆ kơ đe bơngai kơnê̆. Mă mônh, mưh hăt tơbăt kơ ‘bok sek tơlang lei anat kơ đei tơdrong trŏ tơpă, hơđăl rơđah, ưh kơ sĭ ưh kơ keh đĕch ôh mălei phŏ kơnh truh kơduh tơmam, pơliĕm bơngai mă ih kêng noh. Thoi noh ih gô “mơlâu”. Mă ‘bar, mưh tơbăt kơ ‘bok sek tơlang dôm tơdrong ưh kơ ‘lơ̆ng gah bơngai ih kêng noh, lei athei băt bơngai mă ih kêng noh kư̆m gô roi pơdah dôm tơdrong ưh kơ ‘lơ̆ng mă ih oei ôn. Phŏ bơngai mă jei lăm tơdrong sek tơlang mălei đei tơdrong mơnat dêh đơ̆ng rŏng kơnh yua kơ dôm tơdrong kơnê̆ ih oei ôn na bơngai mă ih kêng sư noh gô pơdah đĭ tơdrong hlơp ih. Nơ̆r “kon pơlei oei jê̆ ih” wă pơma kơ lu bơngai mă oei jê̆ ih, dah lu bơngai mă buăl juăt ih dah lu bơngai mă jang hơdai ih. Thoi noh, mă lơ mă tŏsĕt lu sư kư̆m băt dôm tơdrong hlơp ih. Mă pêng, mưh ih tơbăt kơ ‘bok sek tơlang, juăt sư đei tơdrong tơ’bưh hăm bơngai nai, jơ̆ lu bơngai pơm kơdranh dah lu bơngai mă dơ̆ng gah ih. ‘Bônh dêh wă kơ lăp ih, na ih “roi pơdah tơdrong hlơp bơngai nai” (trong 9). Thoi noh, ih jing “bơngai yak ưh kơ tơklă” pơma kơnê̆ bâu roi đe (Tơdrong Pơđơ̆k 11:13, 20:19). Bơngai hơgei hơlen nơ̆r ‘Bok Kei-Dei anăn sư Jerome đei tơblang trong ‘nâu thoi âu: Dôm tơdrong kiơ măt ih ‘bôh bơih, ‘nĕ kơ hăt roi tơdah lăm tơdrong pơjah băl”. Mưh sư kơtơ̆ng ih roi pơdah tơdrong sư kơ đe, sư gô pơjăm păng ih pă gơh pơdrâu iŏk dôm nơ̆r ih. Pơma bơih. Tuch luch, mă jei ih lăm tơdrong sek tơlang pơjah băl, đe kư̆m pă lui ngeh kơ ih, pơyom kơ ih, păng hiong tơdrong tih dêh noh jơ̆ hiong buăl juăt. ‘Noh bơih dôm tơdrong ih athei đĭ jơhngơ̆m pơ’lơ̆ng, tơchĕng mă hơlen hơdrol kơ wă tơbăt kơ ‘bok sek tơlang.
Đei tơdrong pơma tơhil băl lăm ‘nhŏng mai oh bơngai lui kơ Kră Yang Yêsu athei đei tơdrong ‘mêm, jơhngơ̆m băt mơnat păng tơdrong ‘lơ̆ng rơgoh (lăng Mathiơ 18:15-17). Bơ̆n athei adrin chu iŏk đon ala, iơ̆m dim, păng pơ’lơ̆ng mưh wă hơmet dôm tơdrong đei pơma băl. Kră Yang khan “Dah bôl buăl bơngai lui pơm kơnê̆ kơ iĕm, iĕm athei khan kơ sư kơdrô̆ biĕm. Dah sư chu kơ iĕm khan, lei iĕm oei hiôk hăm sư”. (Mathơ 18:15). Bơ̆n ưh kơ sĭ tơchĕng kơ tơdrong hơmet băl mă ‘lơ̆ng, pơ’lơ̆ng, ‘lơ̆ng tơpăt, mălei athei tơchĕng kơ tơdrong kăl hloh noh jơ̆ “bơ̆n oei hiôk hăm sư”. Kon pơlei Kră Yang athei minh jơhngơ̆m đon, ‘nĕ kơ hăt tơbăt kơ ‘bok sek tơlang, pơm ưh kơ hiôk dih băl.
Kơkuh kơ Ih Kră Yang, inh bơnê kơ Ih mơnat ăn tơdrong yoch inh păng ăn kơ inh jing kon Ih. Apinh Kră Yang ăn kơ nhôn đei tơdrong iŏk đon ala,’mêm mơnat wă kơweh đơ̆ng dôm tơdrong pơjah sek tơlang. Apinh ăn kơ nhôn tơgŭm tơiung đon lui dih băl. Yua anăn Kră Yang Yêsu Krist, Amen.
Bơ̆n hăm ‘bônh hăt kơ sek tơlang, dah pŭ iŏk tơdrong ưh kơ hiôk, dah mă pơm kơ đe ưh kơ hiôk yua kơ juăt kơ pơma kơnê̆ ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 35
Kênh Youtube BHKTHN:
