Klei Aê Diê Blŭ: I Kôrantô 7:1-5
Êlan kliăng: “Brei akŏ êa ih mâo klei jăk jĭn, leh anăn hơ̆k mơak bĕ hŏng mô̆ ih mâo mơ̆ng ênuk hlăk ai.” (Klei Bi Hriêng 5:18)
Klei êmuh ksiêm mĭn: Si klei khua ƀĭng kna Y-Pôl mblang kơ klei bi kuôl leh anăn klei bi mguôp sa asei mlei hlăm klei hdĭp ung mô̆? Ya klei brei ung mô̆ ngă čiăng čiêm rông klei hdĭp ung mô̆ pô? Si diih dôk čiêm rông klei hdĭp ung mô̆ gŏ sang diih?
Khua ƀĭng kna Y-Pôl dôk čih hră mơĭt čiăng wĭt lač kơ klei phung đăo ti Sang Aê Diê ƀuôn Kôrantô êmuh kơ knhuah hdĭp phung đăo kơ Krist hlăm klei bi kuôl, bi dôk ung mô̆, dôk asei hliê, klei bhiăn hdơ̆ng ung mô̆, klei bi lui ung mô̆… (I Kôrantô 7:1-16). Hlăm 5 êlan tal êlâo hlăm kdrêč anei, ñu kñăm kơ bruă ung leh anăn mô̆ hlăm klei bi dôk čiăng dưi djă pioh leh anăn čiêm rông klei hdĭp ung mô̆ pô.
Ƀuôn prŏng Kôrantô hlăk anăn hing ang kơ klei hdĭp knhông, ngă klei bi dôk êkei mniê mtŭk mtŭl čhŏ mrŏ hlăm klei kkuh mpŭ kơ yang diñu. Kyuanăn khua ƀĭng kna Y-Pôl čiăng mtô lač êlâo hĭn kơ klei hdĭp bi dôk ung mô̆ kơ phung đăo. Ñu lač, jing jăk hĭn kơ êkei amâo mkŏ mdơ̆ng gŏ huă, amâo ruêh sô̆ hŏng mniê ôh, ƀiădah čiăng đăm lĕ hlăm klei soh knhông, snăn brei grăp čô êkei mâo mô̆ ñu pô, leh anăn grăp čô mniê mâo ung ñu pô (êlan 1-2). Tơdah leh bi kuôl, sa hlăm lu mta bruă kơ ung mô̆ ngă čiăng djă pioh klei jăk mơak hlăm klei hdĭp ung mô̆ jing, brei thâo bi hrăp klei khăp čiăng asei mlei kđeh hdơ̆ng ung mô̆. Anei jing klei Aê Diê čuăn leh hlăk Ñu mkŏ mjing klei bi dôk ung mô̆ (Klei Mphŭn Dơ̆ng 2:24). Klei khăp čiăng hlăm kđeh asei mlei jing mnơ̆ng brei mơ̆ng Khua Yang čiăng kơ ung mô̆ mâo klei bi mguôp suôr tliêr, leh anăn knŏng hlăm klei hdĭp hdơ̆ng ung mô̆. Bruă kơ ung leh anăn mô̆ brei mđing uễn bi hrăp klei khăp čiăng hlăm kđeh hdơ̆ng ung mô̆, leh anăn jih dua jing mtăp mđơr sơăi hlăm klei bi mguôp suôr tliêr anei (êlan 3-4). Kyuanăn ung mô̆ amâo dưi hngah hdơ̆ng diñu ôh tơdah sa čô hlăm diñu mâo klei čiăng jĕ giăm, knŏng tơdah bi tŭ ư êjai đa đa hruê čiăng pioh mmông wah lač (êlan 5a). Ung mô̆ brei dưm bruă klei hdĭp mngăt jing dlông hĭn kơ klei khăp čiăng hlăm kđeh. Ƀiădah lĕ, klei ư̆ kăm anei knŏng bhiâo mơh, kyuadah tơdah amâo ngă snăn, yang jhat srăng mjhua mplư čiăng bi rai klei hdĭp ung mô̆ (êlan 5b).
Čiăng čiêm rông klei hdĭp ung mô̆, brei jih dua ung mô̆ uêñ mĭn bi mđĭ klei jăk mơak kơ gŏ sang pô hŏng lu êlan. Klei bi dôk hlăm asei mlei kđeh jing sa hlăm lu mta klei čiăng yuôm brei ung wăt mô̆ uễn mĭn răng kriê. Klei khăp hlăm klei ung mô̆ bi dôk jing sa hdră êlan bi êdah klei bi khăp hdơ̆ng ung mô̆, čiăng bi êdah drei pô, čiăng tuh êyuh ai tiê leh anăn klei khăp prŏng êlam kơ pô drei khăp. Kyuanăn, Klei Aê Diê Blŭ mtô klei dưi bi dôk knŏng hjăn hdơ̆ng ung mô̆ pô yơh (Klei Bi Hriêng 5:15-19).
Klei soh knhông hruê anei hlăm ƀuôn sang wăt hlăm Phung Sang Aê Diê đĭ hĭn. Lu klei hdĭp ung mô̆ ram rai kyua klei soh knhông. Kyuanăn, jih dua ung mô̆ brei thâo răng kriê leh anăn čiêm rông klei hdĭp ung mô̆ pô tui si Klei Aê Diê Blŭ mtô leh anăn bi đru hdơ̆ng ung mô̆ pô thâo dưn mnơ̆ng brei anei mơ̆ng Aê Diê.
Si ngă drei yap yuôm mơ̆ mnơ̆ng brei klei hdĭp dôk ung mô̆ mơ̆ng Aê Diê leh anăn dôk hdĭp djŏ tui si Klei Aê Diê Blŭ mtô mơ̆?
Wah lač: Ơ Khua Yang, lač jăk kơ Ih brei leh kơ anak mnuih mnơ̆ng brei klei bi dôk ung mô̆. Akâo kơ Khua Yang đru ung mô̆ kâo thâo uêñ mĭn răng kriê, čiêm rông leh anăn djă pioh klei hdĭp ung mô̆ hmei doh jăk leh anăn jăk mơak hlăm Khua Yang.
Dlăng Klei Aê Diê Blŭ hlăm tlâo thŭn: Y-Mathiơ 12:1-37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
