I Kauleethaus 7:1-5
Nqe cim:
“Koj cia li txaus siab rau koj tus pojniam thiab nrhiav kev zoo siab nrog tus hluas nkauj uas koj yuav thaum koj tseem hluas” (Pajlug 5:18).
Lus nug rau sawvdaws xav:
– Timthawj Paulus piav qhia licas txog kev sib yuav thiab kev pw ua niamtxiv hauv lub neej txijnkawm?
– Ob niamtxiv yuav tsum siv dabtsi los tu lub neej txijnkawm loj hlob?
– Nej tabtom tu lub neej txijnkawm hauv lub cuabyig zoo licas?
Timthawj Paulus tabtom sau tsab ntawv no los teb cov ntseeg hauv lub nroog Kauleethaus tej lus nug txog Tus Ntseeg lubneej nyob hauv kev sib yuav, kev tsis yuav txijnkawm, lub neej txijnkawm, kev sib nrauj… (I Kauleethaus 7:1-16). Nyob hauv 5 nqe thawj ntawm ntu Vajluskub no, timthawj Paulus hais ntau txog lub luag haujlwm ntawm ob niamtxiv nyob hauv kev pw ua ke ua niamtxiv kom tuav ruaj thiab tu lub neej txijnkawm loj hlob.
Lub nroog Kauleethaus tiam ntawd nto npe rau kev ua phem ua qias, ua plees ua yi thaum pe lwm haivneeg tej vajtswv. Vim li ntawd Timthawj Paulus thiaj siv sijhawm los qhia cov ntseeg hais txog kev pw ua niam ua txiv. Nws hais tias txivneej tsis yuav pojniam los yeej zoo, tiamsis yuav qaij tau kev txhaum nkauj nraug, tus txiv neej thiab tus pojniam tsimnyog yuav tsum sib yuav (nqe 1-2). Thaum sib yuav lawm, ib teg haujlwm ntawm niamtxiv pab kom lub cuabyig muaj kev zoo siab yog sib pab daws kev ntshaw ntawm sab cev nqaij. Ntawm no yog yam uas Vajtswv teeb tseg thaum nws tsim muaj kev sib yuav (Chivkeeb 2:24). Kev sib hlub pw ua niam ua txiv yog yam koob hmoov zoo uas tus Tswv pub rau lub neej txijnkawm kom khi tau ob niamtxiv sib lo ua ke, thiab kev pw ua niamtxiv tsuas pub muaj nyob hauv lub neej txijnkawm xwb. Ob niamtxiv lub luag haujlwm yog sib pab daws ob tug tej kev ntshaw thiab ob tug puavleej sib txig sib luag nyob hauv txojkev sib raug zoo no (nqe 3-4). Vim li ntawd niamtxiv tsis txhob cais chaw pw thaum tus txij tus nkawm ntshaw yus lub cev, tsuas yog thaum ob tug hais haum lawm lossis tseg sijhawm los thov Vajtswv mam tau cais xwb (nqe 5a). Niamtxiv yuav tsum saib kev cheemtsum sab ntsujplig tseem ceeb dua kev cheemtsum sab nqaij tawv. Tiamsis tsuas pub cais ib ntus xwb, vim yog tsis ua li ntawd dab Ntxwgnyoog yuav dag ntxias ua rau lub neej txijnkawm puastsuaj (nqe 5b).
Yuav tu tau kom lub neej txijnkawm loj hlob, tagnrho ob niamtxiv yuav tsum siv ntau txojkev los nthua npoog lub cuabyig. Kev pw ua niamtxiv yog ib yam tseemceeb uas tus niam thiab tus txiv yuav tsum tseg sijhawm los npoog. Kev hlub pw ua niamtxiv yog yam uas ob niamtxiv ua los sib qhia txog kev hlub rau tus txij tus nkawm, kom qhia txog tus kheej, ua txhua yam rau tus yus hlub. Vim li ntawd, tus Tswv tej lus qhia tsuas pub pw ua niamtxiv nyob hauv lub neej txijnkawm xwb (Pajlug 5:15-19).
Niaj hnub nimno kev ua nkauj ua nraug ntawm neeg ntiajteb thiab cov ntseeg yim hnub yim huamvam. Ntau lub cuabyig raug puastsuaj vim kev txhaum nkauj nraug. Vim li ntawd, tagnrho ob niamtxiv yuav tsum siv zog tuav ruaj thiab tu kom lub neej txijnkawm loj hlob raws li Vajtswv Txojlus qhia thiab sib pab siv yam khoomplig uas Vajtswv muab pub hauv lub neej txijnkawm.
Thov Vajtswv,
Tus Tswv, thov ua tsaug vim Koj pub yam khoomplig nyob hauv tibneeg lub neej txijnkawm rau nyuam yaus. Thov pab nyuam yaus ob niamtxiv paub npoog, tu thiab tswj lub neej txijnkawm dawbhuv thiab kaj siab hauv Koj. Amees.
Peb puas saib hlob yam khoomplig tus Tswv pub hauv lub neej txijnkawm thiab puas ua neej raws li Vajtswv Txojlus qhia lawm tau?
Nyeem Vajluskub hauv peb lub xyoos: Mathais 12:1-37
Kênh Youtube BHKTHN:
