Klei Aê Diê Blŭ: Y-Yôsuê 2:1-11
Êlan kliăng: “Kyuadah msĕ si asei mlei amâo mâo mngăt djiê leh, msĕ snăn klei đăo amâo mâo bruă bi êdah djiê leh msĕ mơh.” (Y-Yakơ 2:26)
Klei êmuh ksiêm mĭn: Mơ̆ng ya klei dua čô knuă tlaih mơ̆ng klei arăng tiŏ mă? Ya ngă H’Rahap ngă snăn? Si drei ngă čiăng đru phung mkăn thâo drei mâo klei đăo sĭt hlăm Khua Yang Yêsu?
Y-Yôsuê tiŏ nao hŏng klei hgăm dua čô knuă ti Kanaan, boh nik jing ƀuôn Yêrikô. Dua čô anei truh ti sang sa čô mniê knhông anăn H’Rahap. Diñu đăm tinăn kyua sang gơ̆ ti ƀuôn prŏng, jing msĕ si sa boh sang jưh ênưih truh, ênưih đuĕ kyua anăn arăng amâo đing ôh leh anăn ênưih hmư̆ klei hâo hưn. Boh sĭt, jih jang kyua klei Aê Diê atăt êlan kyua Ñu ƀuh leh klei đăo mniê anei. Mtao ƀuôn Yêrikô hmư̆ klei arăng hưn kơ dua čô knuă kyua anăn mtrŭn asăp kơ H’Rahap jao digơ̆. Ƀiădah ñu amâo gưt klei mtao mtă ôh mdăp phung knuă ti dlông čuôr sang, mbĭt anăn mdêč êlan mkăn kơ phung čiăng tiŏ mă digơ̆.
Čiăng dưi ngă snăn, ñu mâo klei jhŏng snăk kyua tơdah arăng ƀuh srăng bi mdjiê kyua bi kdơ̆ng hŏng ala čar. Ñu mâo klei jhŏng anei kyua ñu đăo kơ Aê Diê. Hlăk êjai blŭ hrăm hŏng dua čô knuă ti dlông čuôr sang, ñu amâo lač ôh kơ ai tiê đru leh digơ̆ ƀiădah lač kơ klei đăo ñu kơ Aê Diê mơ̆ng sa čô Hêbrơ. Ñu đăo kơ Aê Diê brei leh ƀuôn Yêrikô kơ phung ƀuôn sang Israel kyua anăn diñu srăng dưi. Phung ƀuôn sang hlăm krĭng huĭ hyưt sơăi kyua hmư̆ klei myang Aê Diê ngă leh kơ phung ƀuôn sang Israel hlăk êjai bi mtlaih diñu mơ̆ng čar Êjip leh anăn ya klei dưi Aê Diê brei leh kơ diñu. Ñu hưn klei đăo kơ Aê Diê jing “Yêhôwa Aê Diê diih jing Aê Diê Pô dôk hlăm adiê ti dlông leh anăn ti lăn ala ti gŭ” (êlan 11). Ñu đăo kơ Aê Diê jing Aê Diê kơ jih lăn ala êngĭt adiê, mdê hŏng phung yang mkăn mơ̆ng ƀuôn sang tue, digơ̆ knŏng đăo kơ yang sa krĭng wăl đuč (I Bruă Mtao 20:23). Ñu amâo djŏ knŏng đăo hlăm ai tiê ôh leh anăn hưn klei đăo hŏng klei blŭ ôh ƀiădah lŏ bi êdah klei đăo hŏng bruă ngă jhŏng bi mtlaih phung knuă.
Y-Yakơ mtô klei đăo amâo mâo bruă bi êdah jing klei đăo djiê, leh anăn klei đăo hrăm mbĭt hŏng bruă ngă, kyua bruă ngă yơh klei đăo jing kluôm ênŭm (Y-Yakơ 2:22, 26). Ñu ăt mtô mơh snei, mniê knhông H’Rahap kyua jum phung knuă leh anăn ktrâo kơ digơ̆ nao êlan mkăn, ăt jing kyua bruă ngă dưi yap jing kpă ênô (Y-Yakơ 1:25). Bruă ngă amâo đru kơ pô mkăn mâo klei bi mtlaih ôh ƀiădah klei đăo mâo bruă mă jing klei đăo sĭt, leh anăn kyua anăn dưi yap jing kpă ênô. Jing phung đăo kơ Krist, drei amâo djŏ knŏng hưn klei đăo ôh ƀiădah lŏ bi êdah klei đăo anăn hlăm bruă gưt kơ Klei Aê Diê Blŭ. Bruă ngă bi êdah klei đăo sĭt brei tŭ klei săn asei, tla ênoh, boh nik wăt klei hdĭp pô msĕ si H’Rahap hlăm klei yăl dliê anei. Akâo kơ Khua Yang đru drei jhŏng tla ênoh kơ klei đăo pô kơ Khua Yang.
Drei jhŏng bi êdah klei đăo sĭt pô hŏng bruă ngă wăt tơdah srăng tŭ klei săn asei amâodah arăng ngă jhat, dleh dlan mơ̆?
Wah lač: Ơ Khua Yang, bi mni lač jăk kơ Ih brei kơ kâo klei hriăm kơ klei đăo hlăm klei bi hmô H’Rahap. Akâo kơ Ih đru kâo mâo klei jhŏng bi êdah klei đăo sĭt pô hlăm klei blŭ leh anăn bruă ngă wăt tơdah srăng tuôm hŏng klei arăng bi kdơ̆ng, dleh dlan. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Galati 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
