Yausuas 2:1-11
Nqe cim:
“Lub cev uas tsis muaj sia yog lub cev uas tuag lawm, ib yam li ntawd, txojkev ntseeg uas tsis ua haujlwm yog txojkev ntseeg uas tuag lawm thiab” (Yakaunpaus 2:26)
Lus nug xav:
– Los ntawm qhov twg ob tug soj tebchaws khiav dim txoj kev caum ntes nkawd?
– Vim li cas Lahaj ua li ntawd?
– Peb yuav tsum ua haujlwm li cas pab lwm tus kom lawv pom peb muaj kev ntseeg tseeb hauv Tswv Yexus?
Yausuas ntsiagto txib ob tug tub soj tebchaws mus soj tebchaws Kana-as, tshwjxeeb yog hauv lub nroog Yelikaus. Ob tug tub soj tebchaws no mus txog rau hauv ib tug niamntiav npe hu ua Lahaj. nkawd pw ib hmo hauv nws tsev, tej zaum nws lub tsev nyob ze lub roojvag, thiab yog yam tsev so uas yoojyim tuaj thiab rov qab mus thiaj tsis suam muaj neeg ceevfaj thiab yoojyim muab tau tej xov hauv lub nroog ntawd. Tseeb tiag, txhua yam puavleej yog los ntawm Vajtswv kev coj, vim Vajtswv pom tus pojniam no muaj kev ntseeg. Vajntxwv Yelikaus hnov xov txog ob tug tub soj tebchaws nkag tuaj lawd nws thiaj samhwm rau Lahaj yuav tsum cob nkawd rau nws. Tiamsis Lahaj tsis mloog vajntxwv lus, nws muab ob tug tub soj tebchaws zais rau saum ruvtsev, thiab qhia cov uas tuaj ntes nkawd mus lwm txoj kev mus.
Cia kom ua tau li ntawd, Lahaj yuav tsum muaj lub siab tawv heev vim hais tias yog lawv paub ces Lahaj yuav raug txim tuag vim lub txim ntxeev siab rau lub tebchaws. Tos muaj lub siab tawv li ntawd los vim Lahaj ntseeg rau ntawm Vajtswv. Thaum uas nrog ob tug soj tebchaws sib tham saum ruvtsev, nws tsis hais txog tej uas nws pab nkawd, tiamsis nws piav txog nws ntseeg ntawm cov Henplais tus Vajtswv. Nws ntseeg hais tias Vajtswv yuav muab lub nroog Yelikaus rau cov Yixalayees vim li ntawd lawv yeej yuav kovyeej xwb. Cov neeg uas nyob hauv lub tebchaws no ntshai kawg li vim tau hnov txog tej txujci tseemceeb uas Vajtswv tau cawm cov Yixalayees hauv tebchaws Iziv thiab tej kev kovyeej uas Vajtswv pub rau lawv. Lahaj qhia tshwm nws kev ntseeg rau ntawm Vajtswv hais tias “Tus TSWV uas yog nej tus Vajtswv yog tus uas kav saum ntuj thiab hauv ntiajteb no” (nqe 11). Nws ntseeg Vajtswv yog tus Tswv tswj tagnrho lub ntuj thiab lub ntiajteb no, txawv lwm haivneeg tej vajtswv, vim lawv ntseeg hais tias tej vajtswv ntawd tsuas ua vajtswv rau ib cheemtsam twg xwb (1 Vajntxwv 20:23). Lahaj tsis yog ntseeg hauv lub siab xwb tiamsis nws tseem lees kev ntseeg tawm ntawm tej lus hais thiab tseem muab nws tus kheej tiv pab cawm ob tug soj tebchaws.
Yakaunpaus tau qhia hais tias kev ntseeg tsis muaj haujlwm ua yog kev ntseeg tuag thiab txoj kev ntseeg mus ua ke nrog tes haujlwm, los ntawm tej haujlwm ua txoj kev ntseeg thiaj dhau los zoo kawg nkaus (Yakaunpaus 2:22, 26). Nws kuj qhia hais tias tus niamntiav Lahaj yog los ntawm nws txais tos ob tug soj tebchaws thiab qhia rau nkawd mus lwm txoj kev mus, kuj yog los ntawm tes haujlwm uas tau suav ncajncees (Yakaunpaus 1:25). Tej haujlwm ua pab tsis tau tibneeg tau txais kev cawmdim, tiamsis txoj kev ntseeg uas ua haujlwm thiaj yog txoj kev ntseeg tseeb, thiab los qhov ntawd tau suav ncajncees. Yog ib tug ntseeg, tsis yog lees hais tias ntseeg xwb tiamsis peb tseem yuav tsum ua neej tshwm txoj kev ntseeg ntawd dhau los tej haujlwm mloog Vajtswv lus. Lub neej uas pheej ua haujlwm tshwm kev ntseeg tseeb taij kom yuav tsum txaus siab poob txhua yam, them nqi, tej zaum kuj yog yuav tsum muab yus txoj sia pauv ib yam li Lahaj hauv zaj xwm no. Thov Vajtswv pab kom peb muaj lub siab tawv them nqi rau yus txoj kev ntseeg ntawm Vajtswv.
Thov Vajtswv,
Vajtswv, nyuam yaus ua Koj tsaug uas Koj pub rau nyuam yaus tau kawm zaj kawm dhau los ntawm Lahaj tus qauv. Thov pab nyuam yaus muaj lub siab tawv qhia tshwm kev ntseeg los ntawm tej lus hais thiab tej haujlwm ua txawm yuav ntsib kev tawmtsam thiab kev nyuaj los xij kom nyuam yaus txaus siab them nqi rau nyuam yaus txoj kev ntseeg ntawm Koj. Nyuam yaus tuav Tswv Yexus Khetos lub npe thov, Amees.
Peb puas kam qhia tshwm yus txoj kev ntseeg tseeb los ntawm tej haujlwm ua, txawm yuav poob txhua yam, raug tsimtxom thiab kev nyuaj?
Nyeem Vajluskub hauv peb lub xyoos: Kalatias 3.
Kênh Youtube BHKTHN:
