Jôsuê 2:1-11
“Na tơdrong lui bơ̆n, tơ̆ng bơ̆n ưh kơ pơm kiơ̆ kơ nơ̆r ‘Bok Kei-Dei pơkă, ưh kơ yua kiơ ôh; bơ̆n kư̆m thoi akâu kon bơngai bơ̆n, ưh pă đei bơhngol, jing kơtĕch jơhngơ̆m lôch”( Yakơ 2:26)
Nơ̆r jet tơchĕng pơwao:
– Yua đơ̆ng yơ bre dăr lăng dêh char gơh klĕch hlôi?
– Yua kơ kiơ yă `Rahap pơm thoi noh?
– Lu bơ̆n pơm thoi yơ wă kơ tơgŭm bơngai nai băt kơ bơ̆n đei đon lui tơpă lăm Kră Yang Yêsu?
‘Bok Jôsuê pơm hlơp sư wơh ‘bar ‘nu năm dăr lăng dêh char Kanaan, mă loi sư pơlei Jêrikô. ‘Bar ‘nu bơngai âu năm tơ hnam minh ‘nu drŏ kăn pơm đi anăn sư Rahap. Măr sư ‘bĭch tep tơ noh hloi yua kơ hnam ter tơnăr dur , hnam noh mơ̆t lĕch ‘bônh ‘biơ̆ huay kơ gan ngĭl ngŭl. Mă tơpă sư, đĭ-đăng tôm tơdrong yua đơ̆ng Kră Yang chông anhăk, yua kơ Sư ‘bôh bơngai drŏ kăn âu đei đon lui. Đei đe năm roi kơ pơtao pơlei Jêrikô gah ‘bar ‘nu bơngai năm dăr lăng noh, na pơtao athei yă ‘noh tơlĕch ăn ‘bar ‘nu bre noh. Mă-lei yă noh ưh kơ chu kơ pơtao ôh mă-lei ôn bre noh tơ anih tơ kơpal kư̆m khan bre noh yak trong ‘noh, tơpă bre noh yak trong nai na huay rôp bre noh.
Wă kơ gơh pơm thoi noh, sư athei đei jơhngơ̆m nuih kơtang yua kơ tơdah đe băt đe gô rôp pơlôch bơngai mă pơm yoch blơ̆ teh đak noh. Tơm sư gơh đei nuih kơtang âu yua kơ sư lui kơ ‘Bok Kei-Dei tơpă. Kơplah pơma dơnuh hăm bre noh tơ anih tơ kơpal, sư ưh kơ roi tơdrong jang sư dŏng bre noh ôh mă-lei pơma dơnuh hăm đon lui lăm Kră Yang ‘Bok Kei-Dei bơngai Hêbrơ. Sư lui kơ ‘Bok Kei-Dei ăn pơlei Jêrikô kơ kon pơlei Isơrael kư̆m thoi dŏng pơklaih đơ̆ng dêh Êyiptơ păng tơdrong kĕ jei đơ̆ng Sưăn kơ lu sư. Sư khan hăm đon lui sư khan Sư bơih “Kră Yang ‘Bok Kei-Dei lu iĕm bơih Kră Yang ‘Bok Kei-Dei Tih Hloh, mă oei tơ kơpal plĕnh ti păng tơ ala teh âu.” ( trong 11). Yă noh sư lui kơ ‘Bok Kei-Dei jơ̆ Kră Yang kơ đĭ-đăng plĕnh teh, phara kơ lu yang kon pơlei ‘nguaih kơ Isơrael, lu sư lui pơm yang kơ minh anih noh đĕch (I Lu pơtao 20:23). Yă noh ưh kơ sĭ lui lăm jơhngơ̆m đĕch păng sư ră roi hăm nơ̆r pơma păng đei pơm tơ’bôh đon lui sư hăm tơdrong sư đei pơm hloi pơklaih bre bơngai chop dăr teh đak sư.
‘Bok Yakơ đei bơtho đon lui mă ưh kơ pơm kiơ̆ noh đon lui lôch, păng đon lui năm hơdai hăm tơdrong pơm kiơ̆ hloi, yua đơ̆ng ;ơm kiơ̆ na đon lui ‘lơ̆ng tôm tơdrong (Yakơ 2:22,26). Sư kư̆m bơtho khan yă Rahap đơ̆ng sư sơng iŏk lu bơngai mă đei wơh tơ’bôh ăn kơ bre trong nai na wih brŏk, kư̆m yua đơ̆ng tơdrong pơm hloi na jô̆ jing bơngai ‘lơ̆ng tơpăt (Yakơ 1:25). Tơdrong bơ̆n pơm ưh kơ gơh tơgŭm bơ̆n gơh klaih mă-lei đon lui đei pơm hloi noh đon lui tơpă, păng đơ̆ng noh gơh jô̆ ‘lơ̆ng tơpăt. Bơ̆n Bơngai Lui bơih, lu bơ̆n ưh kơsĭ khan bơ̆n lui mă-lei kăl kơ pơm tơ’bôh đon lui noh hăm tơdrong bơ̆n pơm hloi noh chu yom nơ̆r Kră Yang. Juăt sư bơ̆n pơm tơpă hăm đon lui noh kĕ chu iŏk gleh pơmat, pơm hloi, hloh kơ noh dơ̆ng chu ăn akâu kơdih thoi yă Rahap lăm tơdrong roi hơ’mon âu. Apinh Kră Yang tơgŭm lu bơ̆n pơ̆n nuih kĕ chu iŏk yua kơ đon lui lăm Kră Yang.
Ơ Kră Yang, bơnê kơ Ih ăn kơ inh pơhrăm iŏk đon lui đơ̆ng kơmĭl yă Rahap. Apinh ăn kơ inh đei pơ̆n nuih pơm tơ’bôh đon lui tơpă đơ̆ng lăm nơ̆r pơma păng tơdrong inh pơm, mă khan đei tơ’bơ̆p tơdrong pơmat tat. Yua anăn Kră Yang Yêsu Krist, Amen.
Lu bơ̆n hăm pơ̆n pơm tơ’bôh đon lui tơpă bơ̆n hăm tơdrong pơm hloi mă khan đei tơ’bơ̆p tơdrong gleh glăn pơmat tat ưh?
Đŏk Sơ̆p Hla ar ‘Bok Kei-Dei lăm pêng sơnăm: Galati 3.
Kênh Youtube BHKTHN:
