Klei Aê Diê Blŭ: Klei Mphŭn Dơ̆ng 13:1-13
Êlan kliăng: “…tơdah ih mă tĭng điâo, kâo srăng nao tĭng hnuă; amâodah tơdah ih mă tĭng hnuă, kâo srăng nao tĭng điâo” (Klei Mphŭn Dơ̆ng 13:9b)
Klei êmuh ksiêm mĭn: Ya ngă Y-Abram čuăn bi mbha lăn leh anăn bi ktlah hŏng amuôn ñu? Hŏng si hdră êlan Y-Abram brei ruah? Ya klei hriăm drei mâo mơ̆ng klei ruah anei?
Y-Abram leh anăn amuôn ñu Y-Lot hiu mbĭt sui thŭn leh. Diñu kbiă đuĕ mbĭt mơ̆ng ƀuôn Ur, čar Kaldê nao kơ ƀuôn Čaran mkŏ mjing klei hdĭp. Leh Y-Têra djiê, dua awa amuôn ñu đĭ nao kơ čar Kanaan, găn lu boh ƀuôn. Tơdah čar Kanaan mâo klei ư̆ êpa, diñu trŭn nao kơ čar Êjip. Leh bi mâo klei hŏng mtao čar Êjip, diñu lŏ wĭt kơ čar Kanaan, dôk ti krĭng Dhŭng. Ti krah diñu dua amâo djŏ jing knŏng găp djuê ôh, ƀiădah wăt jing ayŏng adei hiu mbĭt, bi mbha klei ênguôt, klei mơak mơh. Ƀiădah hlăk diñu đuĕ mơ̆ng čar Êjip lŏ wĭt kơ čar Kanaan, jih diñu dua mâo lu hlô mnơ̆ng rông sơăi, mơ̆ng anăn mâo klei dleh dlan: “Čar anăn amâo mâo djăp anôk ôh kơ diñu dôk mbĭt, kyuadah mnơ̆ng diñu lu đei tơl diñu amâo dưi dôk mbĭt” (êlan 6). Tơl mâo klei bi msao hdơ̆ng phung mgăt êmô biăp dua nah, kyuanăn klei bi ktlah dôk mdê jing yuôm snăk.
Y-Abram pô yơh čŏng čiăng blŭ kơ klei bi mbha anôk dôk hdĭp: “Y-Abram lač kơ Y-Lot, “Kâo kwưh kơ ih, đăm brei mâo ôh klei bi msao kâo hŏng ih, leh anăn phung mgăt êmô biăp kâo hŏng phung mgăt êmô biăp ih; kyuadah drei jing ayŏng adei. Amâo djŏ hĕ mâo jih čar ti anăp ih? Bi ktlah bĕ ih pô mơ̆ng kâo; tơdah ih mă tĭng điâo, kâo srăng nao tĭng hnuă; amâodah tơdah ih mă tĭng hnuă, kâo srăng nao tĭng điâo” (êlan 8-9). Jing sa čô awa hlăm gŏ sang, jing pô rông ba Y-Lot sui thŭn leh, Y-Abram dưi ruah anôk lăn ñu čiăng leh anăn amuôn srăng gưt kơ ñu. Ƀiădah lĕ hrô kơ klei mĭn kơ ñu pô, Y-Abram mĭn kơ klei tŭ dưn kơ amuôn ñu êlâo hĭn.
Hlăm klei hdĭp, hlăm klei khăp sĭt suôr leh anăn bi mguôp hdơ̆ng mnuih hlăm gŏ sang, drei čiăng snăk mâo klei bi mguôp kjăp leh anăn hiu mbĭt, ƀiădah hlăm đa đa klei, klei bi ktlah jing klei yuôm leh anăn jăk kơ jih dua. Msĕ Y-Pôl leh anăn Y-Ƀarnaƀas bi ktlah hlăm Bruă Phung Khua Ƀĭng Kna 15:36-41. Klei năng bi mni kơ Y-Abram jing ñu mĭn kơ pô mkăn êlâo kơ mĭn kơ ñu pô, leh anăn – anăn yơh jing knuih brei grăp čô phung đăo mâo hĕ: “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô. Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh” (Philip 2:3-4). Kyuadah êgao hĭn kơ jih jang, Khua Yang Yêsu săn leh asei mlei Ñu pô kơ jih jang drei. Tơdah drei tui knuih Khua Yang, thâo uêñ mĭn kơ pô mkăn hrô kơ klei knŏng mĭn kơ pô snăn kơh drei dưi hdĭp mă bruă kơ Khua Yang, kơ Phung Sang Aê Diê leh anăn mă bruă kơ phung ayŏng adei hŏng klei sĭt.
Drei srăng knang kơ Khua Yang leh anăn čuăn ngă bruă hŏng klei mpŭ kơ klei tŭ dưn kơ pô mkăn mơ̆?
Wah lač: Ơ Khua Yang, bi mni kơ Ih Khua Yang Yêsu kyuadah Ih khăp leh anăn săn leh asei kyua jih jang mnuih. Đru kâo tui hriăm mơ̆ng Ih, amâo duah klei tŭ dưn kơ kâo pô ôh ƀiădah mĭn kơ klei tŭ dưn kơ pô mkăn wăt tơdah klei anăn brei kâo tŭ klei luč dưn mơh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Malaki 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
