Chivkeeb 13:1-13
Nqe cim zaj kawm:
“…Yog koj mus nyob sablaug, kuv mam mus nyob sabxis, yog koj mus nyob sabxis, kuv mam mus nyob sablaug.” (Chivkeeb 13:9b)
Lus nug xav:
– Vim li cas Anplas thiaj txiav txim siab faib av thiab cais tawm ntawm nws tus xeebntxwv Lauj?
– Anplas tau txiav txim siab raws li txojcai twg?
– Peb kawm tau yam dabtsi los ntawm txojkev xaiv ntawd?
Anplas thiab nws tus xeebntxwv Lauj tau mus ua ke ntau lub xyoo. Nkawd ua ke tawm hauv lub nroog Ules cheeb tsam Ob Tug Niam Dej hauv Mexuputamias mus rau Halas. Tomqab Telas tuag lawm, nkawd rov ua ke mus rau tebchaws Kana-as thiab taug kev mus thoob plaws lub tebchaws ntawd. Thaum Kana-as raug kev tshaib nqhis, nkawd kuj ua ke nqis mus rau tebchaws Iziv. Tomqab tej xwm txheej uas muaj nrog vajntxwv Iziv, nkawd rov qab los rau tebchaws Kana-as thiab nyob rau sab qabteb. Nkawd tsis yog txheeb ze xwb, tiamsis tseem yog ob tug neeg uas ua ke dhau ntau yam kev nyuaj thiab kev zoo siab. Tiamsis txij thaum rov qab nram tebchaws Iziv los, nkawd ob leeg muaj tsiaj txhu coob heev, ua rau muaj teebmeem, raws li Vajtswv Txojlus hais tias: “tsis muaj tshav zaub txaus rau nkawd tej tsiaj nyob ua ke, rau qhov nkawd muaj tsiaj txhu coob heev” (nqe 6). Thaum kawg, cov tub yug tsiaj ntawm ob tog pib sib cav sib ceg, yog li ntawd kev cais nyias nyob nyias thiaj dhau los ua qhov cheemtsum heev.
Anplas yog tus xub hais kom faib thaj av nyob. Nws hais rau Lauj tias: “Wb yog kwvtij txivtub tsis tsimnyog cia koj cov neeg thiab kuv cov neeg sib cav sib ceg li no. Wb cia li sib faib nyias mus nyob nyias. Xaiv saib koj nyiam thaj chaw twg. Yog koj mus nyob sablaug, kuv mam mus nyob sabxis, yog koj mus nyob sabxis, kuv mam mus nyob sablaug” (nqe 8-9). Ua tus hlob hauv tsevneeg, thiab yog tus uas tau saib xyuas Lauj tau ntau xyoo, Anplas yeej muaj cai xaiv thaj av zoo rau nws ua ntej thiab cia Lauj ua raws. Tiamsis nws tsis xav txog nws tus kheej ua ntej; nws xub xav txog qhov zoo rau nws tus xeebntxwv.
Nyob hauv lub neej, hauv tej kev sib raug zoo nrog lwm tus, peb yeej xav nyob ua ke thiab sib pab sib txhawb. Tiamsis qee zaus, kev cais nyias mus nyias kuj yog yam tsimnyog thiab muaj txiajntsig rau ob tog huv tibsi. Zoo ib yam li Timthawj Paulus thiab Npananpas uas sib cais hauv Tes Haujlwm 15:36-41. Yam uas tsimnyog qhuas hauv Anplas yog qhov uas nws xub xav txog lwm tus ua ntej nws tus kheej. Qhov ntawd yog tus yamntxwv uas tus Tswv cov menyuam yuav tsum muaj, raws li Vajtswv Txojlus hais tias: “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug. Nej tsis txhob xav txog nej xwb, tiamsis nej yuav tsum xav txog lwm tus thiab” (Filipis 2:3-4). Qhov tseemceeb tshaj, Tswv Yexus Khetos twb muab Nws tus kheej los txhiv peb txhua tus lawm. Thaum peb xyaum raws Nws tus yamntxwv, xav txog lwm tus heev dua peb tus kheej, ces peb thiaj ua tau Vajtswv tes haujlwm, pab Pawg Ntseeg thiab pab peb tej kwvtij nkauj muam raws li Vajtswv siab nyiam.
Thov Vajtswv,
Tus Tswv, ua Koj tsaug vim Tswv Yexus Khetos tau hlub thiab tuag txhiv tibneeg sawvdaws. Thov Koj pab kom nyuam yaus xyaum raws Koj tus yamntxwv, tsis nrhiav kev zoo rau tus kheej paub xav txog lwm tus. Nyuam yaus tuav Tswv Yexus Khetos lub npe thov, Amees.
Peb puas kam tso siab rau tus Tswv thaum txiav txim ua kom lwm tus tau txais yam zoo?
Nyeem Vajluskub hauv peb lub xyoos: Malakis 2
Kênh Youtube BHKTHN:
