Blŭng a 13:1-13
“…dah e iŏk tơring gah ‘ngiĕo inh iŏk gah ‘ma, dah e iŏk gah ‘ma, inh iŏk gah ‘ngiĕo.”(Blŭng a 13:9b)
Nơ̆r jet tơ chĕng pơwao:
– Bri seh teh choh ei,‘bok Abraham khŏm mă chrek asong kơ sư hăm ‘bok Lot păng măr sư Lot mon sư noh khŏm mă tơklah dih băl, yua kơ kiơ pơm thoi noh?
– ‘Bok Abraham hlôi rơih iŏk kơ sư teh noh kiơ̆ kơ tơdong juăt ayơ?
– Bơ̆n đei hŏk iŏk kiơ đơ̆ng tơdrong ‘bok Abraham rơih iŏk noh?
‘Bok Abraham păng Lot mon drŏ-nglo sư noh hlôi arih yak năm, oei hơdai đunh kơ khei sơnăm, bre sư achăng lê̆ pơlei sư kơdih pơlei Ur tơring char mă đei ‘Bar tŏ Đak Krong na jăk oei tơ dêh Charan, jang sa tơ noh. Đơ̆ng rŏng kơ ‘bok Thêra lôch, lu sư jăk dơ̆ng truh tơ dêh Kanaan, arih sa tơ noh, chă năm jơ̆p jơ̆p kơ dêh noh hloi. Lăp dêh Kanaan noh đei tơdrong pơngot rơwĕt,lu sư jur tơ dêh Êyiptơ. Đơ̆ng rŏng kơ lu sư đei tơdrong hăm pơtao đe Êyiptơ tơ anih pơtao sư noh, lu sư wang wih brŏk dơ̆ng tơ dêh Kanaan, arih oei tơ tơring gah gơal. Bre sư noh ưh kơ pôm kơ kơtum jê̆ đĕch ôh, bre sư juăt băl dêh, kư̆m năm hơdai, jang hơdai hloi ‘mơ̆i, mă hiôk dah sơ’ngon, bre sư kư̆m wang hiôk,wang sơ’ngon hơdai, mă truh tơ tơmam sa đak nhă kư̆m asong băl yua hơdai băl ngăl.Mă-lei đơ̆ng jơ năr bre sư wih dơ̆ng tơ dêh Kanaan noh,bre sư đih rong triu bu kư̆m lơ bu kư̆m lơ na jing ba ăn đei tơdrong anat tih kơ bre sư yua kơ: “Tơ anih noh ưh kơmah kơ bre sư oei hơdai yua kơ sem dơrong păng mŭk tơmam sư lơ tơpă dĭng mah pă đei gơh oei hơdai” (trong 6). Mă dêh sư noh khul bơngai wei triu ‘bok Abraham păng khul bơngai wei triu ‘bok Lot đei tơdrong pơjah pơjăng tơgar băl, lei na tơdrong tơklah wă kơ oei kơdih anih phara noh kăl tơpă hloi bơih. Tơ’ngla kơdih ‘bok Abraham ‘mơ̆i pơtơm ‘bok Lot klah asong teh wă arih sa. Abraham khan kơ Lot thoi âu: Ba minh pôm hơtô hơrao hơnao kăt, inh wă kơ ba ‘nĕ pơjah băl, păng khul wei triu inh hăm khul wei triu e kư̆m ‘nĕ pă tơgar băl dơ̆ng. Đĭ kơ dêh ‘nâu ưh kơ ‘bơ̆t anăp e hă? Thoi noh lê̆ e tơklah đơ̆ng inh bĕ, tơdah e iŏk gah ‘ma inh iŏk gah ‘ngieo, tơdah e iŏk gah ‘ngieo, lei lê̆ inh iŏk gah ‘ma.” (trong 8-9). Abraham sư bơngai mih lăm hnam dơnŏ, sư kư̆m tơchĕng wă kơ hiôk ‘lơ̆ng kơ Lot đunh kơ khei sơnăm bơih, Abraham sư gơh rơih iŏk bri teh kiơ̆ thoi sư wă, na Lot mon sư noh khŏm chu kiơ̆ kơ Abraham lei ră trŏ sư… Mă-lei Abraham ưh tơchĕng wă yua ăn kơdih akâu sư đĕch ôh, sư tơchĕng wă pơyua ăn kơ mon sư hơdrol ‘mơ̆i.
Lăm chăl arih dang ei, bơ̆n arih hơdai lu buăl juăt bơngai jih ‘ma, bơ̆n wă mă pơgơ̆p tơklep dih băl, păng wă mă năm hơdai, jang hơdai ling-lang ră. Mă-lei đei lu bơngai mơ’nah sư hăm buăl sư bu to noh, đei tơdrong truh thoi yơ ei, yua kơ đơ̆ng đei tơdrong thoi ‘nei bơih, lei na tơdrong tơklah dih băl noh kăl dêh păng kư̆m ‘lơ̆ng pơđĭ kơ bre sư. Thoi tơdrong bre ‘bok Pôl hăm ‘Banaba noh bre sư tơklah dih băl lăm Hla bơar tơdrong jang 15:36-41 noh đơ̆ng bre sư tơklah băl na jing ‘lơ̆ng pơđĭ kơ bre sư.
Tơdrong mă Abraham pơm ‘noh ‘lơ̆ng dêh sư ‘nei, trŏ kơ wă dêh ‘nei yua kơ sư tơchĕng wă pơhiôk kơ bơngai nai adrol kơ sư kơdih; Abraham tơ’bôh jơhngơ̆m sư thoi noh ‘noh, đĭ-đăng kon pơlei Kră Yang dang ei kăl kơ đei jơhngơ̆m thoi Abraham noh mơ̆n. Lăm Hla bơar Philip 2:3-4 chih athei bơ̆n pơm tơdrong noh, thoi âu: “Iĕm ‘nĕ kơ pơm minh tơdrong kiơ mă ưh kơ ‘lơ̆ng kơ đe, thoi lĕ kơ tơdrong pơang,dah tơdrong ưh kơ băt mơnat kơ đe.Iĕm athei pơm ‘lơ̆ng ling-lang thoi bơngai dim jô̆ kơ đei thoi bơngai ‘lơ̆ng hloh kơ iĕm.Iĕm athei pơhiôk jơhngơ̆m đe mơ̆n, ‘nĕ kơ pơhiôk jơhngơ̆m kơdih đĕch ôh.”. Yua kơ tơm hloh noh, Kră Yang Yêsu hlôi ăn akâu Sư kơdih lôch yua kơ đĭ-đăng lu bơ̆n. Mưh bơ̆n rok kơmĭl Kră Yang, bơ̆n kăl kơ tơchĕng ‘blŏk hiơ̆k kơ lu bơngai jih ‘ma adrol hloh, ưh kơ pôm tơchĕng hiơ̆k ‘blŏk kơ bơ̆n kơdih đĕch ôh, yua kơ đơ̆ng đei thoi noh ‘mơ̆i na bơ̆n gơh arih bơ̆jang awih awăn kơ Kră Yang, awih awăn kơ Khul Lui, awih awăn kơ ‘nhŏng oh, bôl buăl jih ‘ma‘lơ̆ng trŏ păng đei yua tơpă.
Ơ Kră Yang Yêsu, inh bơnê kơ Ih yua kơ Ih hlôi ‘mêm mơnat, lôch yua kơ đĭ-đăng kon bơngai lăm teh đak, lăm noh đei inh. Apinh Ih tơgŭm inh pơhrăm pơm rok kơmĭl Ih, ưh kơ chă wă kơ lơi yua ăn kơ inh kơdih, mă-lei tơchĕng hiơ̆k tơdrong pơyua ăn kơ đe nai bơngai jih ‘ma. Mă khan phŏ kơnh tơdrong ayơ ei pơm kơ inh pŭ tơdrong hơtŭch. Inh krao khan yua anăn Kră Yang Yêsu Krist, Amen!
Bơ̆n hăm hơmet jơhngơ̆m lăp đon lui gơnang kơ Kră Yang wă kơ bơ̆n gơh pơyom kơ tơdrong lơi yua ăn kơ bơngai nai?
Đŏk Sơ̆p Hlabơar ‘Bok Kei-Dei lăm pêng sơnăm: Malachi 2.
Kênh Youtube BHKTHN:
