Klei Aê Diê Blŭ: Klei Mphŭn Dơ̆ng 5:1-32
Êlan kliăng: “Anei jing klei čih djŏ kơ phung anak čô Y-Ađam. Tơdah Aê Diê hrih mnuih, Ñu mjing digơ̆ tui si rup Aê Diê pô” (Klei Mphŭn Dơ̆ng 5:1).
Klei êmuh ksiêm mĭn: Klei lŏ mñă kơ bruă Aê Diê hrih mjing hlăm êlan 1-2 ya čiăng lač? Ti jing anôk mdê leh anăn klei hdĭp mnuih? Klei hriăm anei bi hriăm drei si srăng hdĭp?
Klei Mphŭn Dơ̆ng 5 jing klei čih anăn phung anak čô Y-Ađam leh anăn H’Êwơ hŏng lu anăn dleh răk, thŭn dôk hdĭp dleh hdơr, kyuanăn mâo lu mnuih khăng čiăng kdưt hĕ tơdah dlăng hdruôm hră Klei Aê Diê Blŭ. Ƀiădah tơdah răk bi nik, anăn phung anak čô anei lač kơ anôk mdê leh anăn klei hdĭp mnuih. Êlâo hĭn, dua êlan tal êlâo lŏ mñă kơ klei Aê Diê hrih mjing mnuih tui si rup Ñu pô, anak mnuih amâo djŏ mnơ̆ng čŏng čiăng mbliư̆ jing mă hjăn ôh, kăn djŏ tăm ƀri mâo hĕ ti lăn ala anei, ƀiădah jing mnơ̆ng hrih mjing tui si rup Aê Diê pô. Kyuanăn mnuih knŏng mâo klei sĭt nik kơ klei hdĭp hlăm klei bi mguôp hŏng Aê Diê đuč.
Hlăm hră čih anăn phung anak čô anei, drei ƀuh mâo dŭm mta klei čih mñă wĭt, mñă nao, anăn jing klei kkiêng, phung anak, leh anăn thŭn dôk hdĭp. Grăp čô pô kkiêng leh jing klei bi klă kơ găp djuê mnuih mâo klei lŏ čuê nanao, phung ênuk anei lŏ čuê kơ phung ênuk êlâo. Hŏng klei bi čuê djuê anăn, klei ƀuăn Aê Diê mâo klei bi čuê nanao. Ƀiădah hră čih anăn phung anak čô anăn ăt brei ƀuh mơh sa anôk mdê anak mnuih, anăn jing wăt tơdah mnuih hdĭp jŏk dưn ăt srăng djiê mơh. Y-Ađam djiê hlăk ñu 930 thŭn, YSet hdĭp 912 thŭn, pô hdĭp jŏk hĭn jing Y-Mêthusêla mâo 969 thŭn…Aê Diê brei mnuih hdĭp čiăng ngă hdră Ñu čuăn leh, kiă kriê lăn ala Ñu hrih mjing leh, leh anăn lŏ bi đĭ lar lu hĭn. Ƀiădah leh ngă soh klei hdĭp ti lăn ala anei srăng mâo anôk tuč ruê̆ leh anăn grăp čô mnuih srăng găn sơăi klei anăn.
Ƀiădah lĕ, djiê amâo djŏ jih leh ôh, wăt mâo mơh pô amâo găn ôh klei djiê. Mâo sa čô hlăm phung anak čô Y-Ađam mâo klei čih yăl dliê mdê snăk snei: “Y-Ênŏk êbat mbĭt hŏng Aê Diê, êdei tinăn arăng amâo lŏ ƀuh ñu ôh, kyuadah Aê Diê mă ba ñu leh” (êlan 24). Y-Ênŏk amâo găn klei djiê tui si bhiăn ôh ƀiădah Aê Diê mă ba ñu. Drei amâo thâo ôh ya ngă ñu dưi mâo hĕ klei jăk jĭn yuôm bhăn anăn, drei knŏng thâo anôk mdê klei hdĭp ñu tui si klei čih leh ñu jing mnuih “êbat mbĭt hŏng Aê Diê”. Êbat mbĭt hŏng Aê Diê jing hdĭp bi mguôp kjăp, sĭt suôr hŏng Aê Diê, mâo klei đăo, gưt asăp leh anăn bi mguôp hŏng Aê Diê nanao. Êbat mbĭt hŏng Aê Diê jing hdĭp bi mơak kơ Aê Diê, hŏng jih ai tiê knang kjăp kơ Ñu măng ai si klei hdĭp jing. Anăn jing klei hdĭp phung jing dŏ Khua Yang kyuadah drei thâo kơ drei amâo djŏ knŏng hdĭp kơ klei hdĭp anei ôh ƀiădah hdĭp kơ anôk hdĭp hlŏng lar msĕ mơh, jing anôk drei srăng dôk mbĭt hŏng Khua Yang hlŏng lar.
Si ngă drei dôk “êbat mbĭt hŏng Aê Diê” grăp hruê mơ̆? Si ngă drei hdĭp mdê hŏng phung lăn ala mơ̆?
Wah lač: Ơ Khua Yang, kâo bi mni kơ Ih kyuadah kâo jing anak Ih leh anăn dôk hdĭp hlăm Ih. Đru klei hdĭp kâo bi êdah nanao rup Ih pô. Brei kâo “êbat mbĭt” hŏng Ih nanao, dôk hlăm klei bi mguôp kjăp sĭt suôr hŏng Ih, leh anăn hdĭp hlăm klei čang hmăng kơ klei hdĭp hlŏng lar amâo djŏ knŏng kơ klei hdĭp anei ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 48
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
