Blŭng a 5:1-32
“Âu boih sơ̆p hla bơar chih răk adrĕch adrung Ađam. Năr mă Kră Yang ‘Bok Kei-Dei pơjing kon bơngai, Sư pơjing kon bơngai hơbŏ thoi Kră Yang ‘Bok Kei-Dei.” (Blŭng a 5:1)
Nơ̆r jet tơchĕng pơwao:
– Tơdrong tơ’blŏk dơ̆ng gah tơdrong Kră Yang pơjing kon bơngai trong 1-2 đei gĭt kăl thoi yơ?
– Ayơ tơdrong phara băl păng chăl arih kon bơngai?
– Lu bơ̆n đei tơ’blŏk athei arih thoi yơ?
Blŭng a chăl 5 ‘nâu bơih chih roi adrĕch adrung ‘bok Ađam păng yă Ewơ hăm dôm anăn anat kơ đŏk, sơnăm kư̆m anat kơ ‘blŏk, thoi noh na lơ bơngai ưh ‘maih pơih đŏk sơ̆p hla bơar nơ̆r ‘Bok Kei-Dei ‘bơ̆t anih ‘nâu đei roi tơ’bôh păng chăl arih kon bơngai. Hơdrol hloh, ‘bar trong blŭng a đei tơ’blŏk ming dơ̆ng gah tơdrong Kră Yang pơjing kon bơngai hơbŏ thoi Kră Yang ‘Bok Kei-Dei. Kon bơngai ưh kơ trŏ kơ tơmam lĕch đơ̆ng kơdih kon bơngai ôh. Ưh kơ đei lĕch hloi kơdih đơ̆ng lăm ala teh âu, mălei đơ̆ng Tơ’ngla pơjing hơbŏ thoi rup Kră Yang ‘Bok Kei-Dei. Thoi noh, na kon bơngai đei chă ‘bôh tơdrong arih tơ’bưh hăm Kră Yang đĕch.
Đei chih lăm adrĕch adrung ‘nâu, lu bơ̆n ‘bôh đei lu nơ̆r pơma pơlơ̆k pơle, noh tơdrong đe tơpŭ, adrĕch adrung păng sơnăm. Rim chăl arih đei tơpŭ đei pơma hơđăl lăm adrĕch adrung kon bơngai oei pơtrơp pơ’yoi, đơ̆ng jơhnơr âu truh jơhnơr đơ̆ng rŏng. Kư̆m lăm tơdrong pơtrơp noh, na Nơ̆r Kră Yang pơkă oei đei hơnơ̆ng. Mă khan lei ră, đe chih roi adrĕch adrung noh oei đei pơm tơ’bôh khan mă kon bơngai arih sot dang yơ hĭ kư̆m gô lôch. ‘Bok Ađam lôch lăm sơnăm 930, ‘bok Sêt sơnăm 912, dah bơngai arih sot đunh ‘biơ̆ ‘bok Mêtusila 969 sơnăm… Kră Yang ăn kon bơngai đei pơm keh tơdrong kơnhăm Sư, pơgơ̆r tơ ala teh đơ̆ng Sư pơjing wă kơ chek lar rai lơ. Mălei chăl arih âu đơ̆ng rŏng kơ pơm yoch ling lang rai năm tơ lôch mă bu kư̆m yak hlôi.
Mă khan lei ră, lôch ưh kơ trŏ lôch hiong ôh, mă khan ưh kơ trŏ bu bu tă kơ lôch ngăl ôh. Minh ‘nu lăm adrĕch Ađam đei roi kơ: “Ênok kiơ̆ Kră Yang ‘Bok Kei-Dei, na biŏng pă ‘bôh hloi, yua kơ Kră Yang ‘Bok Kei-Dei sơng iŏk sư boih.” (trong 24). ‘Bok Hênŏk ưh kơ đei lôch ôh mălei Kră Yang atŏk sư tơ plĕnh. Lu bơ̆n ưh kơ băt yua kơ kiơ sư đêl hlôi mơn đei pŭn hiôk thoi noh, lăp băt tơdrong phara băl gah chăl arih sư đei roi tơ’bôh jơ̆ bơngai “năm hơdai Kră Yang ‘Bok Kei-Dei”. Năm hơdai Kră Yang jơ̆ arih tơ’bưh dêh, tơ jê̆ hăm Kră Yang, lui gơnang, chu nơ̆r păng tơdrong tơ’bưh hăm Kră Yang. Yak hăm Kră Yang jơ̆ arih Kră Yang lăp đon, adrin bơwei đon lui kơjăp lăm Kră Yang mă khan tơdrong arih thoi yơ ‘noh athei arih kiơ̆ lăm Kră Yang yua kơ lu bơ̆n băt bơ̆n ưh kơ sĭ arih chăl âu đĕch ôh mălei arih ling lang, anih lu bơ̆n gô oei hăm Kră Yang ling lang.
Ơ Kră Yang, inh bơnê kơ Ih yua kơ inh gah Ih păng arih lăm Ih. Apinh Ih tơgŭm inh arih tơ’bôh rup lăm Ih. Inh apinh “yak hơdai Ih” oei lăm tơdrong tơ’bưh hăm Ih păng arih lăm tơdrong hơmĕng tơ anăp ling lang ưh kơ trŏ lăm chăl âu đĕch ôh. Krao khan yua anăn Kră Yang Yêsu Krist, Amen.
Lu bơ̆n hăm oei yak kiơ̆ hăm Kră Yang rim năr ưh? Hăm arih phara ‘biơ̆ ưh hăm teh đak ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 48
Kênh Youtube BHKTHN:
