Chivkeeb 5:1-32
Nqe cim:
“Ntawm no mus yog hais txog Adas tej xeebntxwv. Thaum Vajtswv tsim neeg, nws tsim zoo li nws tus yamntxwv ntag” (Chivkeeb 5:1)
Lus nug xav:
– Qhov uas rov hais txog Vajtswv tsim neeg hauv nqe 1-2 muaj ntsiab lus li cas?
– Qhov twg yog yamntxwv thiab txoj hmoo ntawm tibneeg?
– Peb kawm tau kom yuav tsum ua neeg zoo li cas?
Chivkeeb tshooj 5 yog sau txog cajces ntawm Adas thiab Evas thiab sau tej neeg cov npe, xyoo ua neej nyob, yog li muaj coob xav hla mus thaum nyeem ntu Vajluskub no. Tiamsis thaum ua tib zoo nyeem, qhov uas sau txog cajces no hais txog yamntxwv thiab tibneeg txoj hmoo. Qhov xubthawj, ob nqe ua ntej hais txog Vajtswv tsim tibneeg muaj tus yamntxwv zoo li Nws. Tibneeg tsis yog ib qhov khoom uas hloov pauv ua tau, tsis yog lam los nyob hauv lub ntiajteb no, tiamsis yog Vajtswv tsim muaj tus yamntxwv zoo li Vajtswv. Yog li tibneeg tsuas nrhiav tau kev ua neeg tiag nyob hauv txojkev sib raug zoo nrog tus Tswv xwb.
Hauv qhov kev sau keebkwm cajces no, peb pom tej yam pheej hais mus hais los, qhov ntawd yog kev yug los, xeebntxwv thiab hnubnyoog ua neej. Ib tug neeg yug los yog ib qhov tabpov hais tias tibneeg cajces muaj xeeb ntxwv ntxiv, ib tiam dhau rau ib tiam. Los ntawm qhov kev cajces no, Vajtswv tej lus cogtseg yeej tseem pheej niaj hnub muaj tiav mus ntxiv. Dua li, qhov kev sau cajces no kuj qhia paub ib qhov yamntxwv tias tibneeg txawm yuav ua neej nyob ntev npaum twg los yeej yuav tuag mus. Adas ua neej nyob tau 930 xyoo, Xej ua neej nyob tau 912 xyoo, lossis tus neeg uas nyob ntev dua yog Methuxelas tau 969 xyoos… Vajtswv pub rau tibneeg ua neej nyob qhia tshwm Nws lub homphiaj, Nws kev tswj lub ntiajteb uas Nws tsim kom huamvam ntxiv. Tiamsis kev ua neej nyob hauv ntiajteb no tomqab uas neeg poob kev txhaum nws muaj qhov xaus thiab txhua tus puavleej mus qhov ntawd.
Txawm yog li ntawd los, kev tuag tsis yog tas, thiab tsis yog txhua tus kuj puavleej tuag. Ib tug neeg nyob hauv Adas cajces tau Vajluskub hais li no: “Enauj ua nws lub neej nrog Vajtswv sib raug zoo, ces nws txawm cia li ploj lawm, rau qhov Vajtswv coj nws mus lawm” (nqe 24). Enauj tsis tuag zoo li sawvdaws, Vajtswv cia li coj nws mus lawm. Peb tsis paub tias yog vim li cas Enauj tau txais qhov kev kaj siab ntawd, peb tsuas paub tias yamntxwv ntawm nws kev ua neej tau qhia tseg tias “ua nws lub neej nrog Vajtswv sib raug zoo”. Nrog Vajtswv sib raug zoo yog ua neej nyob hauv Vajtswv, nyob ze tus Tswv, muaj kev ntseeg, mloog lus thiab niaj hnub teev tiam Vajtswv. Nrog Vajtswv sib raug zoo yog ua neej haum tus Tswv siab, tuav kev ntseeg tus Tswv ruaj khov tsis hloov. Nov yog kev ua neej ntawm tus neeg muaj Vajtswv, vim peb paub hais tias yus tsis yog ua neej nyob ntiajteb no tiamsis yog ua neej nyob mus ibtxhis, peb yuav nrog tus Tswv nyob mus li.
Thov Vajtswv,
Vajtswv, ua tsaug vim Koj pub nyuam yaus muaj feem nrog Koj thiab nyob hauv Koj. Thov Koj pab kom nyuam yaus paub ua neej qhia tshwm koj tus yamntxwv. Ua neej nrog Koj sib raug zoo, nyob ze Koj thiab ua neej muaj cia siab rau lub neej yav tom ntej. Nyuam yaus tuav Tswv Yexus lub npe thov, Amees.
Peb puas tabtom nrog tus sib raug zoo txhua hnub? Peb qhov kev ua neej puas txawv li neeg ntiajteb ua?
Nyeem Vajluskub hauv peb lub xyoo: Exekees 48
Kênh Youtube BHKTHN:
