Klei Aê Diê Blŭ: Klei Kbiă 40:1-11
Êlan Kliăng: “Yêhôwa lač kơ Y‑Môis, “Hruê tal sa hlăm mlan tal sa brei ih mdơ̆ng sang čhiăm klei bi kƀĭn” (Klei Kbiă 40:1-2)
Klei êmuh ksiêm mĭn: Ya klei yuôm bhăn hŏng phung Israel mơ̆ng bruă mdơ̆ng Sang čhiăm hlăm hruê tal sa mlan tal sa? Ya klei Aê Diê mtô Y‑Môis ngă čiăng kơ djăp mta mnơ̆ng hlăm lam leh anăn wăl tač Sang čhiăm dưi jing doh jăk? Ya klei hriăm đru diih bi mĭn kơ klei hdĭp sa čô đăo?
Aê Diê mtă kơ Y‑Môis mdơ̆ng Sang čhiăm hlăm hruê tal sa mlan tal sa. Anei jing wưng sa thŭn êlâo anăn, Aê Diê mtă kơ phung ƀuôn sang ñu mprăp kơ Knăm Klei Găn leh anăn hưn phung ƀuôn sang Israel srăng hnưm kbiă mơ̆ng Êjip. Aê Diê mkŏ mjing leh thŭn mrâo kơ phung ƀuôn sang Ñu ruah (Klei Kbiă 12:2, 6-14). Snăn Sang čhiăm dưi mdơ̆ng hlăm wưng mnuih ƀuôn sang Israel bi hdơr sa thŭn mkŏ mjing ala čar, hruê Aê Diê ba diñu tlaih mơ̆ng klei jing hlŭn ti Êjip. Anei jing wưng diñu lŏ hdơr kơ hƀuê ênuk; klei thâo kơ klei myang, klei khăp, klei pap leh anăn klei Aê Diê đru hŏng klei yuôm bhăn. Aê Diê čiăng mkŏ mjing sa wưng mrâo hlăm klei bi mguôp hŏng phung ƀuôn sang Aê Diê ruah leh anăn Ñu srăng dôk ti krah sang čhiăm diñu.
Aê Diê mtă kơ Y‑Môis dưm djăp mta mnơ̆ng djŏ anôk. Hip klei bi mguôp dưm hlăm anôk doh jăk leh anăn gang hŏng čhiăm păng. Ti anôk doh jăk mâo knưl mah pioh čuh mnơ̆ng ƀâo mngưi dưm ti anăp čhiăm păng anôk doh jăk hŏng anôk doh jăk hĭn; ba jơ̆ng diăn leh anăn mkra pui kđen, ba jhưng leh anăn dăp bi djŏ mnơ̆ng dưm ti dlông. Dưm knưl mnơ̆ng myơr čuh ti anăp ƀăng bhă mŭt sang čhiăm klei bi kƀĭn. Dưm thŭng êa plah wah sang čhiăm klei bi kƀĭn hŏng knưl, leh anăn dưm êa hlăm anăn. Leh anăn Aê Diê mtă kơ Y‑Môis mă êa ƀâo mngưi pioh trôč, leh anăn trôč sang čhiăm leh anăn jih jang mnơ̆ng hlăm ñu, pioh brei ñu wăt jih jang mnơ̆ng yua kơ ñu, leh anăn ñu srăng jing doh jăk (êlan 9-11).
Aê Diê doh jăk kyuanăn anôk Ñu dôk ăt brei doh jăk mơh. Bruă mjing sa mta mnơ̆ng jing doh jăk jing kyua Aê Diê pô kčah. Êa ƀâo ngưi jing mta êa yuôm bhăn dưi mkra mơ̆ng dŭm mta ƀâo mngưi jăk hĭn, djŏ hlue si hdră Aê Diê mtă. Phung ƀuôn sang Aê Diê amâo dưi čŏng mkra mjing hlue si hdră anăn čiăng yua tui si pô čiăng ôh (Klei Kbiă 30:22-33). Hlăm Klei Aê Diê Blŭ, êa ƀâo mngưi ăt jing sa hlăm klei bi knăl mơ̆ng Yang Mngăt Jăk.
Grăp čô đăo mâo sơăi sa wưng yuôm bhăn, anăn jing hruê drei đăo kơ Khua Yang Yêsu jing Khua kơ klei hdĭp pô. Msĕ si phung ƀuôn sang Israel, yap mơ̆ng anăn drei dưi tlaih mơ̆ng klei jing hlŭn kơ klei soh, djăp mta mnơ̆ng hđăp êgao leh leh anăn kcưm dơ̆ng sa klei hdĭp mrâo hlăm klei bi mguôp hŏng Aê Diê. Yang Mngăt Jăk dôk hlăm drei, đru kơ drei jing doh jăk, đru drei lăm lui klei jhat, klei soh leh anăn bi mlih drei jing msĕ si Khua Yang hĭn grăp hruê. Phung đăo dưi iêô jing phung ƀĭng kna doh jăk kyua Yang Mngăt Jăk dôk hlăm drei. Ti anôk mâo Aê Diê dôk, tinăn jing doh jăk.
Drei brei Aê Diê bi mlih klei hdĭp pô năng jing anôk kơ Aê Diê dôk mơ̆?
Wah lač: Ơ Khua Yang, kâo bi mni kơ Aê Diê tlâo yang ruah leh kâo jing anak Ih, mjing kâo jing doh jăk leh anăn yua kâo jing sang čhiăm doh jăk kơ Ih! Akâo kơ Yang Mngăt Jăk bi mlih klei hdĭp kâo jing doh jăk năng jing anôk Ih dôk.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 6:8-7:19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
