Klei Aê Diê Blŭ: Klei Bi Hriêng 21:3-15
Êlan kliăng: “Ngă klei kpă ênô leh anăn klei djŏ jing klei Yêhôwa mơak lu hĭn kơ mnơ̆ng ngă yang.” (Klei Bi Hriêng 21:3)
Klei êmuh ksiêm mĭn: Ya mta klei sĭt nik Mtao Salômôn hưn mdah? Ya mta klei ñu bi klă hlăm trăn anei? Si drei hdĭp čiăng kơ klei hdĭp jing mnơ̆ng myơr ngă yang bi mơak kơ Khua Yang?
Kčưm dơ̆ng, Mtao Salômôn hưn mdah sa klei sĭt nik phŭn: “Ngă klei kpă ênô leh anăn klei djŏ jing klei Yêhôwa mơak lu hĭn kơ mnơ̆ng ngă yang” (êlan 3). Aê Diê amâo khăp ôh kơ hdră bhiăn klei đăo tơdah bi kah hĕ hŏng knhuah dôk hdĭp kpă ênô leh anăn klei khăp. Ñu amâo čiăng ôh kơ mnơ̆ng myơr ngă yang, klei wah lač amâodah hdră bhiăn klei đăo, ƀiădah Ñu čiăng kơ ai tiê khăp kơ klei kpă ênô, klei luă gŭ leh anăn klei thâo pap hlăm klei hdĭp grăp hruê (I Y-Samuel 15:22, 16:7). Ñu bi kdơ̆ng mơh hŏng klei mgao leh anăn hưn ktưn pô yơh jing kpă ênô: “ală dlăng krưh leh anăn ai tiê mgao… jih jang anăn jing soh” (êlan 4). Klei mgao ngă bi mmăt ală mta drei ti anăp klei pap leh anăn bi khăng ai tiê hŏng mnuih mkăn. Thâo săng kơ drei jing dŏ Aê Diê, drei srăng jing luă gŭ, tŭ gĭr leh anăn mâo ai tiê thâo pap hĭn.
Mtao Salômôn ăt bi msĕ mơh klei kriăng sĭt kpă hŏng klei tluh čiăng čuôt klih. Ñu brei thâo: klei mkra hdră bruă hŏng klei răng atăt kơ klei bŏ dlai, êjai anăn klei jêč ruăt leh anăn klei tluh atăt kơ klei kƀah (êlan 5). Klei kpă ênô bi êdah hŏng knhuah hdĭp kpă ênuah, sĭt suôr leh anăn dôk gĭr. Klei khăp bi êdah tơdah drei amâo tui duah klei tŭ dưn hŏng hdră êlan ngă jhat kơ mnuih mkăn ôh, ƀiădah tui duah klei ngă jăk, ba klei jăk mơak kơ drei pô wăt kơ pô riêng gah msĕ mơh. Ñu kñăm msĕ mơh phung măk ƀai amâo ngă tui si klei kpă ênô ôh, kyuanăn srăng kpuh mđuĕ, ƀiădah êlan phung doh jăk srăng jing kpă (êlan 6-7). Pô kpă ênô srăng phat kđi phung măk ƀai tui si bruă diñu ngă (êlan 12). Ñu hưn êlâo brei răng, hdĭp kpă ênô amâo tuôm dlăng hơăi mang ôh ti anăp klei knap mñai; klei khăp sĭt kăp mđing hmư̆ leh anăn lŏ wĭt lač nanao (êlan 13). Aê Diê mđing uêñ snăk kơ knuih drei dôk dơ̆ng ƀơ̆ng huă hŏng phung tŭ klei ruă knap, hŏng phung arăng phưi lui leh anăn hŏng phung arăng ktư̆ juă. Ai tiê thâo pap drei hŏng mnuih mkăn bi êdah klei drei thâo săng kơ klei pap Aê Diê pioh kơ drei.
Mtao Salômôn lač klă: “Tơdah arăng ngă klei djŏ phung kpă ênô hơ̆k mơak, ƀiădah phung ngă jhat srăng mâo klei huĭ snăk” (êlan 15). Hŏng phung kpă ênô, klei djŏ ba klei hơ̆k mơak. Kyuadah ai tiê khăp kơ Khua Yang ăt srăng khăp msĕ mơh kơ ya klei Khua Yang khăp. Mnuih kpă ênô êpa mhao klei sĭt nik, klei kpă ênô leh anăn klei djŏ mâo klei dưi hĭn hlăm klei hdĭp. Bi hŏng phung ngă jhat snăn klei djŏ srăng ba klei huĭ snăk kơ diñu.
Aê Diê amâo mơak ôh hŏng klei hdĭp mgưt luar, ƀiădah Ñu mơak hŏng phung mâo klei hdĭp kpă ênô, luă gŭ leh anăn mâo ai tiê thâo pap. Tơdah drei čuăn ruah ngă klei djŏ leh anăn klei kpă ênô, snăn drei bi êdah knuih Khua Yang. Tơdah drei êbat hlăm klei khăp leh anăn klei kpă ênô, klei hdĭp drei srăng jing sa mnơ̆ng myơr ngă yang bi mơak kơ Khua Yang hĭn kơ jih jang mnơ̆ng myơr mkăn.
Ya mta klei brei drei bi mlih hĕ leh hriăm klei hriăm anei?
Wah lač: Ơ Khua Yang, akâo Ih đru kâo grăp hruê tui duah ngă klei djŏ leh anăn klei kpă ênô nanao, čiăng mpŭ mni kơ Khua Yang, Pô kpă ênô srăng phat kđi kâo. Kâo wah lač hlăm Anăn Khua Yang Yêsu Krist, Amen. ŭ
Dlăng Klei Aê Diê Blŭ hlăm tlâo thŭn: Y-Markôs 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
