Tơdrong Pơđơ̆k 21:3-15
“Pơm tơdrong tơpăt, băt pơm tơdrong trŏ Noh Kră Yang lăp đon hloh kơ tơmam soi pơyơ̆r” (Tơdrong Pơđơ̆k 21:3)
Nơ̆r jet tơchĕng pơwao:
– Pơtao Sôlômôn roi tơbăt tơdrong tơpăt ayơ?
– Sư pơma hơđăl tơdrong kiơ lăm chăl ‘nâu?
– Bơ̆n arih thoi yơ wă kơ tơdrong arih bơ̆n Kră Yang lăp đon?
Pơih blŭng a, Pơtao Sôlômôn roi tơbăt minh tơdrong tơpăt: “Pơm tơdrong tơpăt, băt pơm tơdrong trŏ Noh Kră Yang lăp đon hloh kơ tơmam soi pơyơ̆r.” (trong 3). Kră Yang ‘Bok Kei-Dei ưh kơ lăp đon kơ lu tơdrong giĕng tơdrong lui dah tơklah lê̆ tơdrong arih ‘lơ̆ng tơpăt păng ‘mêm mơnat. Sư ưh kơ lăp đon ôh kơ tơmam soi, nơ̆r krao khan dah tơdrong juăt, na Sư wă noh jơhngơ̆m ‘mêm kơ tơdrong ‘lơ̆ng tơpăt, iŏk đon ala păng tơdrong ‘mêm mơnat lăm tơdrong arih rim năr (I Samuêl 15:22; 16:7). Pơtao Sôlômôn kư̆m blah găn tơdrong pơang păng khan kơdih akâu ‘lơ̆ng tơpăt: “Măt lăng pơrŏ, păng jơhngơ̆m pơang, Ŭnh kơđeng lu bơngai kơnê̆, tă kơ yoch ngăl.” (trong 4). Pơang pơm kơ măt bơ̆n măng mu ‘bơ̆t tơdrong kăl wă gah tơdrong mơnat păng arăng kơ̆l hăm bơngai nai. Băt kơnăl tơdrong kiơ̆ kơ ‘Bok Kei-Dei, bơ̆n gô jing iŏk đon ala, kĕ chơ̆n păng đei jơhngơ̆m băt mơnat hloh.
Pơtao Sôlômôn kư̆m pơting tơdrong pơnam tơpă hăm jơhngơ̆m hưch ham pơm ưh kơ ‘lơ̆ng, sư tơbăt; tơdrong pơjing tơdă hơmet pơ’lơ̆ng gô đei tơdrong hiôk hian, na dah hăt hot păng hưch ham gô jing dơnuh (trong 5). Tơdrong ‘lơ̆ng tơpăt gơh pơm tơ’bôh đơ̆ng tơdrong arih tơpăt, tơnăp păng kĕ ĕnh chang gô. Tơdrong ‘lơ̆ng tơpăt gơh pơm tơ’bôh kơplah bơ̆n ưh kơ đei chă wă lơi yua kơdih hăm trong mă pơrăm bơngai nai, mălei chơ chă tơdrong ‘lơ̆ng, ba ăn tơdrong pŭn hiôk kơdih akâu păng lu bơngai jum dăr. Sư kư̆m pơma hơđăl bơngai pơm kơnê̆ ưh kơ đei pơm kiơ̆ tơdrong ‘lơ̆ng tơpăt. Thoi noh, gô ‘bônh kơ hiong, mălei trong lu bơngai ‘lơ̆ng rơgoh gô tơpăt (trong 6-7). Tơ’ngla ‘lơ̆ng tơpăt gô sek tơlang bơngai kơnê̆ kiơ̆ kơ tơdrong jang lu sư pơm (trong 12). Sư khă tơbăt arih ‘lơ̆ng tơpăt ưh kơ đei layơ lăng hmă đĕch dah đei tơdrong pơmat; tơdrong ‘mêm ling lang mơ̆ng păng tơl tơwih (trong 13). Kră Yang ‘Bok Kei-Dei ling lang hiơ̆k dêh kơ tơdrong lu bơ̆n arih sa hăm lu bơngai mă đe pơm ưh kơ hiôk, đe achăng lê̆ păng đe pơm kơnê̆. Jơhngơ̆m ‘mêm mơnat bơ̆n hăm bơngai nai tơ’bôh tơdrong hlôh băt bơ̆n gah jơhngơ̆m ‘mêm mơnat đơ̆ng ‘Bok Kei-Dei ‘măn kơ bơ̆n.
Pơtao Sôlômôn khan hơđăl: “Tơdă lu bơngai hiă pơnam đei tơmam rơkah rơkai. Mă-lei đei lu bơngai pơm hăt-hot gô jing pơngot dơnuh.” (trong 5). Hăm bơngai ‘lơ̆ng tơpăt; pơm tơdrong tơpăt ba ăn tơdrong chơt hiôk. Yua kơ jơhngơ̆m mă ‘mêm kơ Kră Yang kư̆m ‘mêm dôm tơdrong kiơ mă Kră Yang ‘mêm. Bơngai tơpăt wă dêh kơ tơdrong tơpăt tơpă păng tơdrong trŏ gô kĕ jei lăm tơdrong arih. Na hăm bơngai pơm kơnê̆ lei na gô đei tơdrong hli krê.
Kră Yang ưh kơ lăp đon ôh hăm dôm tơdrong arih ‘bơ̆r đak klak ŭnh, mălei Sư lăp đon hăm dôm tơdrong arih đơ̆ng pơm tơdrong ‘lơ̆ng tơpăt, iŏk đon ala păng jơhngơ̆m băt mơnat. Dah bơ̆n rơih tơdrong trŏ păng tơpăt, bơ̆n pơm tơ’bôh tơdrong ‘lơ̆ng trŏ Kră Yang. Kơplah bơ̆n yak lăm tơdrong ‘mêm păng tơdrong tơpăt sĭt, tơdrong arh bơ̆n jing tơmam soi Kră Yang lăp đon hloh kơ dôm tơmam soi nai.
Ơ Kră Yang, apinh Ih tơgŭm inh rim năr ling lang chă tơdrong trŏ păng ‘lơ̆ng tơpăt wă ưang kơ Kră Yang. Tơ’ngla ‘lơ̆ng tơpăt gô sek tơlang inh. Krao khan yua anăn Kră Yang Yêsu Krist, Amen.
Bơ̆n kăl kơ tơplih kiơ đơ̆ng ‘bai pơhrăm ‘nâu?
Đŏk Sơ̆p hla bơar ‘Bok Kei-Dei lăm pêng sơnăm: Markôs 12
Kênh Youtube BHKTHN:
