Pajlug 21:3-15
Nqe cim:
“Ua ncaj ua ncees thiab ua zoo, txaus tus TSWV siab dua coj tej khoom tuaj fij rau nws.” (Pajlug 21:3)
Lus nug xav:
– Vajntxwv Xalumoos tshaj tawm txog qhov tseeb dabtsi?
– Nws hais meej txog tej yam dabtsi hauv nqe Vajluskub no?
– Peb yuav ua neej li cas kom peb lub neej dhau los ua ib qho khoom fij uas haum Vajtswv siab?
Qhib thawj, Vajntxwv Xalumoos tshaj tawm ib qho tseeb tseemceeb hais tias: “Ua ncaj ua ncees thiab ua zoo, txaus tus TSWV siab dua coj tej khoom tuaj fij rau nws” (nqe 3). Vajtswv tsis txaus siab rau tej kab ke kev ntseeg yog tias tej ntawd cais tawm ntawm txojkev ua neej ncaj ncees thiab kev hlub. Nws tsis xav yuav peb tej khoom fij, lo lus thov lossis tej kab ke, tiamsis Nws xav kom peb muaj lub siab ncaj ncees, txo hwjchim thiab muaj kev hlub tshua hauv lub neej txhua hnub (I Xamuyees 15:22; 16:7). Vajntxwv Xalumoos kuj tawmtsam txojkev khavtheeb thiab kev xav tias yus tus kheej ncaj ncees. Nws hais tias: “Lub qhovmuag uas qaujles thiab lub siab uas khavtheeb, yog kev txhaum” (nqe 4). Kev khavtheeb ua rau peb dig muag tsis pom txog kev cheemtsum tau Vajtswv txoj koob hmoov hlub tshua, thiab ua rau peb muaj lub siab tawv rau lwm tus. Thaum paub hais tias peb vamkhom Vajtswv hauv txhua yam, peb yuav txo hwjchim, ua siab ntev thiab muaj lub siab khuvleej rau lwm tus heev ntxiv
Vajntxwv Xalumoos kuj muab txojkev nquag ua haujlwm ncaj ncees los piv rau txojkev ntshaw uas qia dub. Nws qhia tias tus uas nquag thiab ua tib zoo npaj yuav coj mus rau kev muaj nplua mias, tiamsis tus uas lam tau lam ua thiab siab hlob yuav muaj tsis txaus (nqe 5). Txojkev ncaj ncees qhia tshwm dhau ntawm lub neej ua ncaj, ua siab dawb paug thiab ua siab ntev. Kev hlub qhia tshwm thaum peb tsis nrhiav yam zoo rau tus kheej los ntawm kev ua phem rau lwm tus, tiamsis yog nrhiav yam zoo uas coj koob hmoov los rau peb thiab rau cov uas nyob ib puag ncig peb. Nws kuj hais meej hais tias cov neeg phem tsis ua raws txojkev ncaj ncees, yuav raug puastsuaj; hos tus neeg siab ncaj txojkev yuav tus yees (nqe 6-7). Vajtswv tus uas ncaj ncees yuav txiav txim rau cov neeg phem raws li lawv tej haujlwm (nqe 12). Nws ceebtoom tias tus neeg ua neej ncaj ncees yeej yuav tsis ua txuj tsis pom cov neeg txomnyem; txojkev hlub tiag yeej ua tib zoo mloog thiab pab cov uas raug kev txomnyem (nqe 13). Vajtswv saib txojkev uas peb saib xyuas cov neeg raug mob, raug tso tseg thiab raug tsimtxom tseemceeb heev. Peb kev hlub tshua lwm tus qhia tshwm peb kev totaub txog Vajtswv txojkev hlub tshua uas Nws muab pub rau peb.
Vajntxwv Xalumoos hais meej hais tias: Thaum muaj txojkev ncaj ncees, yog kev zoo siab rau cov neeg ncaj ncees, tiamsis cov neeg siab phem tas kev cia siab” (nqe 15). Raws li cov neeg ncaj ncees, kev ncaj ncees coj kev zoo siab los rau lawv. Vim tus uas hlub Vajtswv yeej hlub yam uas Vajtswv hlub. Tus neeg ncaj ncees ntshaw kom qhov tseeb, qhov ncaj ncees thiab qhov yog muaj yeej hauv lub neej. Tiamsis raws li cov neeg phem, kev ncaj ncees coj kev txhawj ntshai tuaj raug rau lawv.
Vajtswv tsis txaus siab rau kev ua neeg zoo sab nraud, tiamsis Nws txaus siab rau cov uas muaj kev ncaj ncees, kev txo hwjchim thiab kev hlub tshua. Thaum peb xaiv ua yam yog thiab ncaj ncees, peb tabtom qhia Vajtswv tus yamntxwv rau lwm tus pom. Thaum peb ua neej hauv txojkev hlub thiab kev ncaj ncees, peb lub neej yuav dhau los ua ib qho khoom fij uas haum Vajtswv siab tshaj txhua yam khoom fij.
Thov Vajtswv,
Tus Tswv, thov Koj pab kom nyuam yaus niaj hnub nrhiav kev ua yam yog thiab ncaj ncees los txhawb nqa Koj, uas yog Vajtswv ncaj ncees uas yuav txiav txim rau nyuam yaus. Nyuam yaus tuav Tswv Yexus Khetos lub npe thov, Amees.
Peb yuav tsum hloov yam dabtsi hauv peb lub neej tom qab kawm zaj no?
Nyeem Vajluskub hauv peb lub xyoos: Malakaus 12
Kênh Youtube BHKTHN:
