Klei Aê Diê Blŭ: Klei Mphŭn Dơ̆ng 8:20-22
Êlan kliăng: “Y-Nôê mdơ̆ng sa boh knưl ngă yang kơ Khua Yang, leh anăn ñu mă jih đơ hlô mnơ̆ng doh leh anăn jih đơ čĭm čap doh, leh anăn ñu myơr mnơ̆ng myơr čuh ti dlông knưl anăn” (Klei Mphŭn Dơ̆ng 8:20)
Klei êmuh ksiêm mĭn: Leh kbiă mơ̆ng kŭmpăn, ya bruă Y-Nôê ngă êlâo hĭn? Si Aê Diê lŏ wĭt ngă kơ bruă ngă anăn? Ya klei hriăm drei mâo mơ̆ng bruă anei?
Hŏng păt čiăng jih jang mnuih, leh sa hdră êlan sui srăng jing mmông êmiêt tiêt, hơĭt ai tiê, leh anăn mdei. Ƀiădah Y-Nôê mâo leh sa bruă ngă bi mơak snăk kơ Aê Diê. Leh kbiă mơ̆ng kŭmpăn, “Y-Nôê mdơ̆ng sa boh knưl ngă yang kơ Khua Yang, leh anăn ñu mă jih đơ hlô mnơ̆ng doh leh anăn jih đơ čĭm čap doh, leh anăn ñu myơr mnơ̆ng myơr čuh ti dlông knưl anăn” (êlan 20). Klei kkuh mpŭ anei bi êdah ai tiê kkuh mpŭ, myơr jih leh anăn hdơr knga êlam snăk mơ̆ng Y-Nôê hŏng Aê Diê, Pô bi mtlaih leh ñu mơ̆ng klei bi kmhal kyua klei pap leh anăn klei Ñu pap brei klei soh. Mnơ̆ng myơr čuh bi knăl kơ klei myơr kluôm ênŭm, anôk jih jang mnơ̆ng myơr čuh dưi myơr kơ Aê Diê, amâo pioh ya klei kơ pô ôh. Leh anăn anăn ăt jing ai tiê Y-Nôê hŏng Aê Diê.
Klei Aê Diê Blŭ čih leh, “Khua Yang ƀâo mnâo jăk” (êlan 21), jing Ñu mơak tŭ mă mnơ̆ng Y-Nôê myơr leh. Wăt tơdah ƀuh klă knuih anak mnuih ăt jing jhat ƀiădah Aê Diê ƀuăn: “Kâo amâo srăng lŏ tăm pah kơ lăn ôh kyua mnuih” (êlan 21b). Aê Diê ăt ƀuăn Ñu srăng kriê pioh wưng kơ klei hdĭp ti lăn hŏng dŭm yan mdê mdê, rơ̆ng klei hdĭp dưi lŏ čuê kjăp (êlan 22). Anei jing klei bi mguôp Aê Diê mkŏ mjing amâo djŏ knŏng hŏng Y-Nôê ôh ƀiădah hŏng wăt jih jang mnơ̆ng Ñu hrih mjing. Klei bi mguôp anei amâo djŏ kyua anak mnuih năng ôh, ƀiădah kyua klei pap Khua Yang leh anăn hdră jăk siam Ñu.
Grăp čô drei hruê anei brei hdơr, kyua klei pap Aê Diê klei hdĭp drei dưi rơ̆ng kluôm ênŭm leh anăn lŏ čuê, wăt tơdah drei thâo klă pô amâo năng ôh. Aê Diê ăt dôk bi êdah klei pap Ñu hŏng drei grăp hruê tơdah Ñu hmư̆ klei wah lač, bi mtlaih drei mơ̆ng klei huĭ hyưt, leh anăn klei yuôm bhăn hĭn jing Ñu bi mtlaih drei mơ̆ng klei bi kmhal hlăm war pui. Snăn klei drei wĭt ngă djŏ hĭn hŏng Khua Yang jing jih ai tiê kkuh mpŭ kơ Ñu. Brei klei hdĭp grăp čô phung đăo kơ Krist msĕ si sa sang yang myơr mnơ̆ng jăk siam bi mơak Aê Diê. Kyua Ñu pap brei leh kơ drei, “Ơ phung ayŏng adei, kâo kwưh kơ diih kyua klei Aê Diê pap, myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê” (Rôm 12:1).
Hruê anei, drei srăng myơr kơ Khua Yang si mnơ̆ng ƀâo mngưi čiăng bi êdah jih ai tiê kkuh mpŭ kơ Ñu?
Wah lač: Ơ Khua Yang, bi mni lač jăk kơ Ih kyua klei khăp leh anăn klei pap Ih klei hdĭp dưi kriê pioh leh anăn lŏ čuê ti lăn ala anei, mâo wăt klei hdĭp kâo. Kâo thâo jih jang klei anei kyua klei pap brei amâo djŏ jing kyua kâo năng ôh. Kyua anăn akâo kơ Khua Yang đru kâo hdĭp grăp hruê hŏng ai tiê hdơr knga, leh anăn yua klei hdĭp kâo msĕ si sang yang myơr kơ Khua Yang mnơ̆ng ƀâo mngưi bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
