Blŭng a 8:20-22
“Nôê pơm minh pôm chơnang soi kơ Kră Yang ‘Bok Kei-Dei. Sư rôp lu kon sem ‘lơ̆ng rơgoh, hăm lu sem păr ‘lơ̆ng rơgoh pơm tơmam soi ‘buh pơyơ̆r tơ chơnang soi.” (Blŭng a 8:20)
Nơ̆r jet tơchĕng pơwao:
– Đơ̆ng rŏng kơ lĕch đơ̆ng duk, ‘bok Nôê pơm tơdrong kiơ adrol hloh?
– Kră Yang tơl tơwih tơdrong noh thoi yơ?
– Lu bơ̆n đei pơhrăm iŏk tơdrong kiơ đơ̆ng tơdrong ‘nâu?
Hăm đĭ đăng kon bơngai, đơ̆ng rŏng kơ trong năm ataih trŏ kơ hơmet, hơđơ̆ng păng pơdơh. Mălei ‘bok Nôê đei minh tơdrong jang ‘lơ̆ng Kră Yang lăp đon, đơ̆ng rŏng kơ năr lĕch đơ̆ng duk, “Nôê pơm minh pôm chơnang soi kơ Kră Yang ‘Bok Kei-Dei. Sư rôp lu kon sem ‘lơ̆ng rơgoh, hăm lu sem păr ‘lơ̆ng rơgoh pơm tơmam soi ‘buh pơyơ̆r tơ chơnang soi.” (trong 20). Tơdrong kơkuh ‘nâu tơ’bôh jơhngơ̆m chu, pơjao păng băt bơnê kơ Kră Yang ‘Bok Kei-Dei, Tơ’ngla mă dŏng sư hlôi đơ̆ng tơdrong phak yua kơ tơdrong ‘mêm ăn đĕch păng jơhngơ̆m ‘mêm Kră Yang. Tơmam soi ‘buh pơtih kơ tơdrong pơyơ̆r tôm tơdrong, anih mă đĭ tơmam soi kon sem đei pơyơ̆r kơ Kră Yang, ưh kơ gơh ‘măn iŏk kơdih. Păng noh bơih jơhngơ̆m ‘mêm ‘bok Nôê hăm Kră Yang ‘Bok Kei-Dei.
Nơ̆r ‘Bok Kei-Dei chih: “Kră Yang ‘bâu phu păng tơchĕng khan” (trong 21) wă khan Kră Yang lăp đon sơng iŏk tơmam soi ‘bok Nôê pơyơ̆r, mă khan ‘bôh jơhngơ̆m kon bơngai yoch kơnê̆ tơpă mălei Kră Yang pơkă khan: “…yua kơ jơhngơ̆m kon bơngai yoch kơnê̆ tơpă đơ̆ng sơ̆, đơ̆ng oei ‘lơ̆p.c Inh kư̆m ưh kơ wă pơrăm lu kon sem arih thoi Inh đei pơm.” (trong 21b). Kră Yang kư̆m pơkă Sư gô bơwei lu tơdrong arih tơ teh hăm lu bơyan phang phara băl, wă pơsĭt lu tơdrong arih oei kơjăp ưh kơ đei layơ hiong (trong 22). ‘Nâu bơih tơdrong pơgơ̆p Kră Yang ưh kơ trŏ ‘măn kơ ‘bok Nôê đĕch ôh mălei ‘măn kơ đĭ đăng adrĕch kon bơngai đơ̆ng Sư pơjing. Tơdrong pơgơ̆p ‘nâu ưh kơ trŏ kon bơngai bơ̆n trŏ sơng iŏk, mălei yua kơ Kră Yang ăn đĕch păng tơdrong tơdă hơmet sư ‘lơ̆ng dêh.
Rim ‘nu kơ lu bơ̆n ahrei âu athei ‘blŏk, yua kơ jơhngơ̆m ‘mêm Kră Yan na tơdrong arih lu bơ̆n oei đei păng oei đei arih tơ anăp mă khan lu bơ̆n băt hơđăl kơdih bơ̆n ưh kơ hơnhŏ. Kră Yang oei tơ’bôh tơdrong ‘mêm Sư ăn kơ lu bơ̆n rim năr mưh Sư tơl nơ̆r bơ̆n krao khan, dŏng lu bơ̆n hlôi đơ̆ng anih krê hơmơt, jơ̆ tơdrong gĭt kăl hloh noh bơih Kră Yang dŏng pơklaih bơ̆n đơ̆ng tơdrong phak ling lang lăm dơnâu ŭnh. Lei na tơdrong mă bơ̆n pơm tơwih ăn trŏ hloh hăm Kră Yang noh bơ̆n đĭ jơhngơ̆m kơkuh kơ Sư. Athei chăl arih rim bơngai lui nhen thoi hnam akŭm pơyơ̆r tơmam soi ăn kơ Kră Yang lăp đon. Yua kơ Kră Yang đei ‘mêm kơ lu bơ̆n bơih. “Ơ lu ‘nhŏng oh, bơ̆n băt boih ‘Bok Kei-Dei ‘mêm kơ bơ̆n tôch bơneh dang noh, na bơ̆n athei pơjao akâu bơ̆n kơ Sư, ‘nĕ pă pơm yoch, pơm kiơ̆ kơ Sư đĕch, noh na Sư lăp đon kơ bơ̆n.” (Rôm 12:1).
Ơ Kră Yang, inh bơnê kơ Ih yua kơ Ih ‘mêm ăn đĕch kơ inh păng jơhngơ̆m ‘mêm Ih na tơdrong arih arih inh oei đei păng oei đei tơ anăp tơ ala teh âu, lăm noh tơdrong arih inh kơdih. Inh băt đĭ đăng tôm tơdrong ‘nâu đơ̆ng Ih ăn đĕch gah inh ưh kơ hơnhŏ ôh. Thoi noh apinh Ih tơgŭm inh arih rim năr băt bơnê păng yua tơdrong arih inh thoi hnam akŭm pơyơ̆r kơ Ih tơmam soi ‘bâu phu Ih lăp đon. Krao khan yua anăn Kră Yang Yêsu Krist, Amen.
Năr ‘nâu, lu bơ̆n gô pơyơ̆r kơ Kră Yang tơmam soi ‘bâu phu ayơ wă tơ’bôh jơhngơ̆m pơyơ̆r kơkuh kơ Kră Yang?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 17
Kênh Youtube BHKTHN:
