Chivkeeb 8:20-22
Nqe cim:
“Nau-es teeb tau ib lub thaj rau tus TSWV, nws muab tej tsiaj huv thiab tej noog ib yam ib tug coj los tua thiab muab hlawv tagnrho fij rau Vajtswv saum lub thaj ntawd” (Chivkeeb 8:20)
Lus nug xav:
– Tom qab uas tawm hauv lub nkoj, Nau-es ua dabtsi ua ntej dua?
– Vajtswv teb li cas rau tes haujlwm nws ua ntawd?
– Peb kawm tau zaj kawm dabtsi hauv zaj xwm no?
Feem coob tibneeg mas tom qab uas mus ib ntu kev ntev loo lawd ces yuav rov los npaj los tu kom muaj chaw nyob ruaj khov thiab so. Tiamsis Nau-es ho ua ib yam uas haum Vajtswv siab heev. Kiag thaum tawm hauv nkoj los, “Nau-es teeb tau ib lub thaj rau tus TSWV, nws muab tej tsiaj huv thiab tej noog ib yam ib tug coj los tua thiab muab hlawv tagnrho fij rau Vajtswv saum lub thaj ntawd” (nqe 20). Qhov kev ua hauv kev pehawm no qhia tshwm Nau-es muaj lub siab mloog Vajtswv lus, fij tas rau Vajtswv thiab paub ua Vajtswv tsaug kawg siab kawg ntsws, vim Vajtswv yog tus uas pab cawm nws dim ntawm txoj kev rau txim los ntawm Vajtswv txoj koob hmoov thiab lub siab hlub tshua xwb. Qhov khoomfij hlawv fij ntawd piv txog txoj kev muab fij uas txaus nkaus, tagnrho tus tsiaj puavleej muab fij rau Vajtswv, tsis tseg ib yam dabtsi rau yus li. Ntawd yog lub siab uas Nau-es muab pub rau Vajtswv.
Vajlugkub sau tseg hais tias, “Tej pa khoom fij ntawd tsw qab ntxiag ua rau tus TSWV txaus siab heev” (nqe 21), txhais tias Vajtswv zoo siab txais yuav qhov khoom fij uas Nau-es fij ntawd. Txawm Vajtswv pom tseeb hais tias tibneeg yeej ib txwm yog neeg phem, los Nws coglus hais tias: “Kuv yuav tsis ua rau txhua yam uas muaj sia kom raug puastsuaj li uas kuv tau ua tas los no lawm” (nqe 21b). Vajtswv kuj coglus Nws yuav tswj kom muaj caij muaj nyoog sib txawv rau txhua yam uas muaj sia hauv lub ntiajteb no thiab tabpov txhua yam ntawd yuav muaj sia txuas ntxiv mus thiab nyob ruaj khov (nqe 22). Nov yog txoj kev coglus uas Vajtswv rhawv tsim tsis yog rau Nau-es xwb tiamsis tagnrho txhua yam uas Vajtswv tsim. Txoj kev coglus no tsis yog tibneeg tsimnyog tau txais, tiamsis vim Vajtswv txoj koob hmoov thiab Nws txoj kev npaj tseg uas zoo kawg nkaus rau tibneeg.
Niaj hnub nim no peb txhua tus yuav tsum nco ntsoov hais tias, los ntawm Vajtswv lub siab hlub tshua mas peb txojsia ceev tau thiab thiaj nyob mus ntxiv, txawm peb paub tseeb hais tias peb yeej tsis tsimnyog tau txais. Vajtswv yeej tseem qhia tshwm Nws kev hlub rau peb txhua hnub thaum uas Nws teb peb tej lus thov, cawm peb dim ntawm tej kev txaus ntshai, thiab yam uas muaj nqis tshaj plaws yog Nws cawm peb dim ntawm txoj kev rau txim uas nyob mus ib txhis hauv ntuj tawg. Yog li ntawd yam uas tsimnyog peb ua rau Vajtswv yog pehawm Nws kawg siab kawg ntsws. Cia peb txhua tus ntseeg lub neej zoo li lub tuamtsev uas fij tej khoom haum Vajtswv siab. Vim Vajtswv twb hlub tshua peb lawm, “Cov kwvtij, Vajtswv hlub peb kawg nkaus li, yog li ntawd kuv thiaj ntuas nej hais tias thaum nej tseem ua neej nyob no, nej yuav tsum muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam” (Loos 12:1).
Thov Vajtswv,
Vajtswv, nyuam yaus ua Koj tsaug vim Koj txoj kev hlub thiab lub siab hlub tshua mas nyuam yaus txojsia thiaj tabpov thiab yuav nyob mus ntxiv hauv lub ntiajteb no. Nyuam yaus paub hais tias txhua yam puavleej yog Koj txoj koob hmoov yeej tsis yog nyuam yaus tsimnyog tau. Yog li ntawd thov pab nyuam yaus paub ua Koj tsaug thiab siv nyuam yaus lub neej ua yam khoom fij muaj nqis haum Koj siab. Nyuam yaus tuav Tswv Yexus Khetos lub npe thov, Amees.
Hnub no, peb fij yam khoom fij tsw qab twg los ua Vajtswv tsaug?
Nyeem Vajluskub hauv peb lub xyoos: Tshwmsim 17
Kênh Youtube BHKTHN:
