Klei Aê Diê Blŭ: I Y-Timôthê 5:17-20
Êlan kliăng: “Brei arăng mpŭ dua blư̆ lu hĭn kơ phung khua mduôn kiă kriê jăk, boh nik nak kơ phung mtô leh anăn bi hriăm.” (I Y-Timôthê 5:17)
Klei êmuh ksiêm mĭn: Ya klei Khua ƀĭng kna Y-Pôl ktrâo atăt kơ Khua pô mtô hlăk ai Y-Timôthê kơ klei dôk dơ̆ng ƀơ̆ng huă hŏng phung khua mduôn hlăm Phung Sang Aê Diê? Si klei yuôm bhăn klei mtô anei hŏng Khua pô mtô Y-Timôthê leh anăn hŏng drei hruê anei?
Hlăm hră mơĭt kơ Khua pô mtô hlăk ai Y-Timôthê, Khua ƀĭng kna Y-Pôl mâo klei mtă kơ klei dôk dơ̆ng ƀơ̆ng huă hŏng phung khua mduôn hlăm Phung Sang Aê Diê (êlan 17-20). Boh blŭ nao mbĭt hŏng “phung khua mduôn” jing “kiă kriê jăk”, “mtô leh anăn bi hriăm” (êlan 17) tinei brei ƀuh “phung khua mduôn” amâo djŏ knŏng jing phung khua thŭn ôh, ƀiădah lŏ jing phung mă bruă hlăm Phung Sang Aê Diê. Hlăm Phung Sang Aê Diê tal êlâo, đa đa phung khua thŭn hŏng phung kriê dlăng phung đăo. Diñu khăng jing phung myơr pô mă bruă kơ Aê Diê jih hruê mmông.
Khua ƀĭng kna Y-Pôl mtă mtăn kơ Khua pô mtô Y-Timôthê jing pô kiă kriê hlăm mngăt jing, “brei arăng mpŭ dua blư̆ lu hĭn” kơ phung khua mduôn kiă kriê jăk Phung Sang Aê Diê, boh nik jing phung gĭr klam klei dleh dlan hlăm bruă mtô leh anăn bi hriăm. Anei jing klei mpŭ bi đru čiăng êdi hlăm ai tiê hrăm mbĭt mkŏ mjing Ƀuôn Ala Mtao Aê Diê. Khua ƀĭng kna Y-Pôl čih hlue si klei Khua Yang Yêsu mtô hlăm Y-Luk 10:7 “mnuih mă bruă năng kơ klei mưn” brei ƀuh boh blŭ “mpŭ dua blư̆ lu hĭn” tinei lŏ dưi thâo săng hlue si klei mblang “mkăp prăk mlan amâodah kăp đru êbeh dlai”. Pô kiă kriê hlăm klei hdĭp mngăt brei kmah hŏng phung mă bruă mbĭt hŏng pô hlăm klei mă bruă.
Klei tal dua lač kơ klei arăng čhal lač. “Đăm tŭ ôh klei arăng kčŭt kơ sa čô khua mduôn, knŏng tơdah mâo klei hưn bi sĭt mơ̆ng dua amâodah tlâo čô” (êlan 19). Anei jing klei bhiăn mtô hlăm Klei Mtô Mñă Klei Bhiăn 19:15 leh anăn mâo Khua Yang Yêsu lač hlăm Y-Mathiơ 18:16. Klei mtô anei brei ƀuh khua kiă kriê brei răng hŏng klei čhal lač kñăm hlăm phung mă bruă Phung Sang Aê Diê, amâo ruăt đăo kơ ya klei mčeh luar leh anăn đing đăo. Khădah snăn, tơdah phung khua mduôn amâodah mnuih mă bruă mâo klei soh snăn “brei ih ƀuah diñu ti anăp jih jang, čiăng kơ phung mkăn mâo klei huĭ” (êlan 20). Klei kpĭ mjuăt brei hưn mdah leh anăn kpă ênô tui hlue hlăm klei hmăi mơ̆ng klei soh ngă leh, leh anăn hnơ̆ng kjham mơ̆ng klei mâo, ƀiădah đăm mdăp ôh. Klei soh arăng mdăp srăng bi luč klei hơêč hmưi kơ jih êpul êya leh anăn ngă bi msoh lu mnuih.
Hruê anei, phung mă bruă hlăm Phung Sang Aê Diê lu jing mă bruă mkrah hruê mmông leh anăn amâo mâo prăk đru ôh, khădah snăn, Phung Sang Aê Diê leh anăn phung khua kiă kriê ăt brei mđing uêñ kơ phung mă bruă jih ai tiê mă bruă, klam dleh dlan hlăm bruă mtô leh anăn bi hriăm čiăng hdơ̆ng mđĭ ai mă bruă Khua Yang leh anăn êpul biăp Khua Yang jao.
Drei mđing uêñ kơ phung mă bruă hlăm Phung Sang Aê Diê hŏng ya bruă ngă klă klơ̆ng?
Wah lač: Ơ Khua Yang, kâo hdơr knga kơ Khua Yang lu snăk kơ phung tŭ klei dleh dlan, jih ai tiê mă bruă kơ Sang Ama. Akâo kơ Ih đru kâo mpŭ, kmah hŏng digơ̆ leh anăn thâo răng ti anăp klei čhal lač soh kñăm kơ digơ̆. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
