1 Timautes 5:17-20
Nqe cim:
“Tsimnyog muab nqi zog ob npaug rau cov txwjlaug uas ua haujlwm zoo, tiamsis tsimnyog muab nqi zog ntau dua rau cov uas qhuab qhia thiab cob qhia” (1 Timautes 5:17)
Lus nug xav:
– Timthawj Paulus qhia li cas rau tus xibhwb hluas Timautes txog qhov uas yuav ua rau cov txwjlaug hauv Pawg ntseeg?
– Lo lus qhia no muaj nqis dabtsi rau xibhwb Timautes thiab rau peb niaj hnub nim no?
Hauv tsab ntawv xa rau xibhwb Timautes, Timthawj Paulus taw qhia txog qhov uas yuav ua rau cov txwjlaug hauv Pawg ntseeg (nqe 17-20). Lo lus mus ua ke nrog “cov txwjlaug” yog “ua haujlwm zoo” “qhuab qhia thiab cob qhia” (nqe 17), nov qhia pom hais tias “cov txwjlaug” tsis yog neeg laus xwb tiamsis tseem yog cov uas pab haujlwm hauv Pawg ntseeg. Hauv Pawg ntseeg xubthawj, muaj ib txhia cov txwjlaug koom nrog cov xibhwb tu cov ntseeg. Lawv fij lawv tus kheej ua Vajtswv haujlwm txwm nkaus txhua lub sijhawm.
Timthawj Paulus qhia xibhwb Timautes uas yog ib tug thawjcoj sab ntsujplig hais tias, “Cov txwjlaug uas coj tau zoo, yeej tsimnyog tau txais nqizog ob npaug, tshwjxeeb yog cov uas tuav tes haujlwm qhuabqhia thiab cobqhia” MWW2022. Nov yog kev sib saib taus thiab sib pab uas tsimnyog muaj hauv kev sib koom txhim tsa Vajtswv lub tebchaws. Timthawj Paulus hais raws li Tswv Yexus cov lus hauv Lukas 10:7 uas hais tias “yeej tsimnyog tus uas ua haujlwm tau nqi zog” qhia pom lolus “tsimnyog muab nqi zog ntau dua” ntawm no, kuj nkag siab tau raws li lub ntsiab uas yog “muab nyiaj hli los ntawm siab davfo”. Cov thawjcoj sab ntsujplig yuav tsum muaj lub siab davfo rau txhua tus uas koom nrog yus ua haujlwm.
Qhov tim ob ntsig txog tej lus nkaug. “Yog leejtwg lam nkaug hais tias cov txwjlaug ib tug twg ua txhaum, yog tsis muaj ob leeg lossis peb leeg ua timkhawv hais tias tus ntawd tau ua txhaum tiag, koj tsis txhob rawm ntseeg” (nqe 19). Nov yog tus cai uas tau qhia nyob hauv 2 Kevcai 19:15 thiab Tswv Yexus tau hais txog nyob hauv Mathais 18:16. Lo lus qhia no qhia pom cov thawjcoj yuav tsum xyuam xim rau tej lus nkaug txog cov pab ua haujlwm hauv Pawg ntseeg, tsis txhob rawm ntseeg tej lus liam ntawd thiab xav phem. Tiamsis yog muaj cov txwjlaug lossis ib tug pab ua haujlwm twg tau ua txhaum ces “…yuav tsum ntuas tus ntawd tabmeeg sawvdaws kom lwm tus thiaj ntshai” (nqe 20). Kev qhuab ntuas yuav tsum ua tabmeeg thiab ncajncees, raws li qhov kev txhaum uas tau ua thiab hnyav npaum li cas, tiamsis tsis txhob zais kev txhaum. Zais kev txhaum cia yuav ua rau Pawg ntseeg poob koob hmoov thiab ua rau coob leej yuam kev.
Niaj hnub nimno cov pab Vajtswv haujlwm hauv Pawg ntseeg cim civ txaus siab fij tus kheej ua Vajtswv haujlwm raws lub sijhawm tsis yuav nyiaj hli, tiamsis Pawg ntseeg thiab cov thawj saib xyuas Pawg ntseeg yuav tsum xam pom cov uas tas siab ua haujlwm, tiv kev txomnyem cob qhia, tshaj Moo Zoo kom peb sib txhawb zog ua Vajtswv haujlwm thiab tu pab yaj uas Vajtswv cob.
Thov Vajtswv,
Tus Tswv, nyuam yaus ua Koj tsaug ntau heev rau cov uas siv sib zog ua haujlwm rau Koj. Thov pab nyuam yaus hwm thiab saib taus lawv, thiab txhob cia tej lus nkaug uas tsis muaj tseeb los raug lawv. Nyuam yaus tuav Tswv Yexus Khetos lub npe thov, Amees.
Peb hlub tshua cov pab ua Vajtswv haujlwm hauv Pawg ntseeg los ntawm tej haujlwm ua tseeb twg?
Nyeem Vajluskub hauv peb lub xyoos: Tshwmsim 11
Kênh Youtube BHKTHN:
