I Timôthê 5:17-20
“Lu kră wei-lăng bơngai lui bơngai bu jang ‘lơ̆ng iĕm thim ‘biơ̆ jên khei sư, mă loi lu bơngai bơtho tơdrong ‘Bok Kei-Dei.” (I Timôthê 5:17)
Nơ̆r jet tơchĕng pơwao:
– Pôl đei bơtho tơ’bôh kơ Timôthê thoi yơ wă kơ arih hăm lu Kră wei lăng khul bơngai lui?
– Nơ̆r bơtho âu wă khan kiơ hăm Timôthê păng lu bơ̆n dang ei?
Lăm kơthơ chih ăn kơ Timôthê, Pôl bơtho tơ’bôh wă kơ arih hăm lu Kră Wei Lăng Khul Bơngai Lui (trong 17-20) lăm nơ̆r “Lu Kră Wei-lăng” jơ̆ “gơh pơgơ̆r Khul Bơngai Lui” “Bơtho Tơdrong ‘Bok Kei-Dei” (trong 17)
Âu bơih wă tơ’bôh “Kră Wei-lăng” ưh kơ sĭ khan bơngai ‘lŏ kră, mă tơpă noh bơngai wei lăng Khul Bơngai Lui. Lăm Khul Bơngai Lui blŭng a, lăm lu kră wei lăng hăm lu bơngai bơtho bơwei Khul Bơngai Lui, lu sư pơyơ̆r akâu jăn bơ̆jang kơ Kră Yang rim năr.
Pôl pơkă kơ Timôthê bơih minh ‘nu bơnai chông nhăk gah bơhngol ih athei “pơyom tôm tơdrong” lu kră wei lăng gơh pơgơ̆r bơngai lui, mă-loi hloh lu bơngai chu iŏk tơdrong gleh lăm tơdrong bơtho tơdrong lui păng bơtho, ‘nâu bơih minh tơdrong pơyom tơgŭm kăl hloh lăm jơhngơ̆m wang hơdai tơiung dêh char ‘Bok Kei-Dei, Pôl yua iŏk nơ̆r Kră Yang Yêsu lăm Luka 10:7 “Na iĕm kư̆ kơ oei tơ hnam noh khŏm khŏm. Iĕm lê̆ kơ sư ‘me iĕm, yua kơ iĕm bơtho sư tơdrong ‘Bok Kei-Dei, kư̆m dang lĕ jang tơgŭm sư mơ̆n. Iĕm ‘nĕ chă oei jơ̆p jơ̆p kơ hnam đe.” ‘nâu lu bơ̆n hlôh “tơgŭm apah jên tơmam mă hơlăng ‘biơ̆” bơngai chông anhăk gah bơhngol kăl kơ mă gơh hăm lu bơngai tơgŭm bơ̆n lăm tơdrong bơ̆jang.
Tơdrong mă ‘bar tơ’bưh hăm nơ̆r jâ̆u kơnê̆ “Dah đe jâu kơnê̆ kơ kră wei-lăng bơngai lui, ih ‘nĕ kơ mơ̆ng sư hŏ, dah minh ‘nu bơngai đĕch jâ̆u kơnê̆ sư. Dah lu sư ‘bar pêng ‘nu wă pơma thoi noh tơpă, ‘noh ih gơh mơ̆ng păng jet hloi lu sư khan: “Tơdrong kiơ iĕm jâ̆u kơnê̆ sư? ” (trong 19). ‘nâu tơdrong juăt đei bơtho lăm hla bơar Bơtho Khôi Juăt 19:15 păng Kră Yang Yêsu pơma ‘bơm lăm Mathiơ 18:16. Nơ̆r bơtho âu wă tơ’bôh kơ lu bơngai chông anhăk gah bơhngol kăl kơ pơ’lơ̆ng hăm nơ̆r jâ̆u kơnê̆ wă kơnhăm kơ bơngai Wei lăng Khul Bơngai Lui, ưh kơ hăt hot lui kơ nơ̆r pơma chă pơm đĕch mă đei tơdrong ưh kơ lui ngeh. Mă-lei, dah Kră wei lăng păng bơngai bơ̆jang đei tơdrong glăi “athei pơma khă sư ‘bơ̆t anăp đe tơpôl lu bơngai lui wă kơ lu bơngai lui kơchăng đon ưh kơ wă pơm yoch thoi bơngai ‘noh dơ̆ng.” (trong 20). Chih roi Kăl kơ pơdah rơđah păng pơma tơpăt kiơ̆ kơ tơdrong đêl glăi păng pŭ iŏk đêl bơngai noh yoch glăi kiơ̆ kơ tơdrong đêl yoch, mă-lei ưh kơ gơh ôn, tơdrong oei ôn gô hiong tơdrong pŭn hiôk kơ kon pơlei păng pơm ưh kơ ‘lơ̆ng kơ lơ bơngai.
Chăl dang ei, lu kră wei lăng Khul Bơngai Lui lơ bơngai bơ̆jang hăm jơhngơ̆m pơyơ̆r ưh kơ iŏk jên tơgŭm, mă khan thoi noh, Khul Bơngai Lui păng bơngai pơgơ̆r kăl kơ ‘blŏk tơtăm lu bơngai bơ̆jang đĭ jơhngơ̆m, chu iŏk tơdrong gleh lăm tơdrong jang bơtho păng năm pơm kơdranh wă kơ gơh pơtrŭt hơdai bơ̆jang kơ Kră Yang awih awăn kơ lu kon triu mă Kră Yang pơjao.
Kơkuh kơ Ih ơ Kră Yang inh bơnê kơ Ih lơ bơngai oei chu iŏk kơ lu bơngai chu iŏk tơdrong gleh, đĭ jơhngơ̆m bơ̆jang kơ Kră Yang lăm hnam ‘Bă apĭnh tơgŭm inh gơh pơyom, hơlăng hơmrah hăm lu sư păng pơ’lơ̆ng hăm lu bơngai jâ̆u glăi kơnhăm kơ lu sư, krao khan yua anăn Kră Yang Yêsu Krist. Amen.
Lu bơ̆n ‘blŏk tơtăm kơ lu kră wei lăng bơ̆jang lăm Khul Bơngai Lui hăm tơdrong tơpă thoi yơ?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Tơdrong Tơ’bôh 11
Kênh Youtube BHKTHN:
