Klei Aê Diê Blŭ: Klei Mphŭn Dơ̆ng 6:11-22
Êlan kliăng: “Hŏng klei đăo Y-Nôê gưt leh anăn ngă sa boh kŭmpăn čiăng bi mtlaih sang ñu, leh Aê Diê hưn kơ ñu kơ klei srăng truh ka arăng tuôm ƀuh ôh” (Hêbrơ 11:7).
Klei êmuh ksiêm mĭn: Tơdah čuăn bi rai lăn ala, ya klei Aê Diê mtă brei Y-Nôê ngă čiăng djă pioh klei hdĭp? Ya klei kŭmpăn Y-Nôê čiăng lač kơ hdră êlan Aê Diê bi mtlaih? Si drei srăng lŏ wĭt ngă?
Dôk ti anăp klei soh jhat leh anăn klei măk ƀai mnuih, Aê Diê čuăn leh “srăng bi rai diñu mbĭt hŏng lăn ala” (êlan 13). Ƀiădah Aê Diê hdơr kơ Y-Nôê leh anăn kơ gŏ sang gơ̆, kyuadah gơ̆ mâo klei pap ti anăp Ñu. Kyuanăn Ñu brei gơ̆ ngă sa boh kŭmpăn leh anăn ktrâo brei čêč kdrêč jih jang klei srăng ngă, mơ̆ng kyâo srăng yua hlŏng kơ boh prŏng kŭmpăn, wăt kơ grăp kdrêč hlăm lam. Kŭmpăn anei srăng bi mtlaih klei hdĭp jih jang mnuih hlăm gŏ sang Y-Nôê, leh anăn djă pioh klei hdĭp kơ lăn ala hŏng jih jang mnơ̆ng hdĭp dôk hlăm kŭmpăn tơdah Aê Diê bi kmhal lăn ala.
Kŭmpăn Y-Nôê jing hĕ mnơ̆ng bi mtlaih êjai jih jang mnuih leh anăn jih jang mnơ̆ng hdĭp ti rŏng lăn tŭ klei bi rai. Aê Diê pô yơh jing Pô mkra hdră bi mtlaih anei amâo djŏ klei Y-Nôê pô ktưn amâodah gĭr ôh. Hdruôm hră Klei Aê Diê Blŭ brei thâo Aê Diê mkra mơh hdră bi mtlaih kơ jh jang mnuih. Êjai jih jang mnuih ngă soh leh sơăi leh anăn leh anăn amâo mâo sa čô dưi bi mtlaih ñu pô ôh, snăn Aê Diê tiŏ hriê Anak Ñu hriê ti lăn ala čiăng ngă hdră Ñu bi mtlaih, “leh anăn diñu mâo hơăi mang klei yap kpă hŏng klei Aê Diê pap, hlăm klei Krist Yêsu bi tui. Aê Diê čuăn leh Yêsu Krist brei Ñu jing mnơ̆ng bi tui klei soh hŏng êrah Ñu, čiăng kơ arăng mă tŭ hŏng klei đăo. Klei anăn čiăng bi êdah klei kpă ênô Aê Diê, kyuadah hŏng klei gĭr Ñu lui amâo bi kmhal ôh klei soh arăng ngă êlâo tinăn” (Rôm 3:24-25). Khua Yang Yêsu yơh jing “kŭmpăn bi mtlaih” kơ hlei pô kmhal kơ klei soh leh anăn đăo kơ Ñu.
Aê Diê hưn êlâo leh kơ Y-Nôê kơ klei phat kđi leh anăn Ñu brei kơ gơ̆ hdră êlan bi mtlaih. Y-Nôê ngă leh jih jang klei Ñu mtă (êlan 22). Pô čih hră Hêbrơ mblang Y-Nôê ngă klei anăn hŏng klei đăo, “Hŏng klei đăo Y-Nôê gưt leh anăn ngă sa boh kŭmpăn čiăng bi mtlaih sang ñu, leh Aê Diê hưn kơ ñu kơ klei srăng truh ka arăng tuôm ƀuh ôh” (Hêbrơ 11:7). Hruê anei, Aê Diê ăt hưn êlâo mơh kơ klei phat kđi srăng truh êdei anăp djŏ kơ klei hdĭp hlŏng lar mnuih kmưn, leh anăn Ñu brei hdră êlan bi mtlaih hlăm Khua Yang Yêsu Krist. Aê Diê dôk iêô jak mnuih hriê mŭt dôk hlăm “kŭmpăn bi mtlaih” hŏng klei kmhal kơ klei soh, đăo kơ Yêsu Krist, jum Ñu jing Pô Bi Mtlaih leh anăn Khua kơ klei hdĭp pô čiăng dưi mâo klei hdĭp hlŏng lar. Čiăng snăk grăp čô drei jing msĕ si Y-Nôê, thâo huĭ mpŭ kơ Aê Diê, đăo kơ Ñu hŏng jih ai tiê.
Si ngă drei dôk hlăm “kŭmpăn bi mtlaih” hĕ amâodah ăt dôk kram hlăm klei soh ti krah lăn ala anei?
Wah lač: Ơ Khua Yang, lač jăk kơ Ih kyuadah hŏng klei Ih pap kâo mâo klei bi mtlaih hlăm Yêsu Krist. Brei kâo dôk kjăp nanao hlăm Khua Yang Yêsu jing “kŭmpăn bi mtlaih” kơ klei hdĭp kâo. Đru kâo jhŏng hưn hdră êlan bi mtlaih anei kơ jih jang phung dôk klah đuĕ hlăm klei hdĭp anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 89
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
