Chivkeeb 6:11-22
Nqe cim:
“Twb yog vim Nau-es ntseeg, Nau-es thiaj mloog Vajtswv lus. Vajtswv qhia rau Nau-es txog tej xwm txheej uas yav tom ntej yuav muaj los uas Nau-es qhovmuag tsis pom. Nau-es thiaj txua ib lub nkoj, Nau-es thiab nws tsevneeg thiaj dim kev ploj kev tuag” (Henplais 11:7)
Lus nug xav:
– Thaum txiav txim siab ua kom lub ntiajteb puastsuaj, Vajtswv qhia Nau-es ua dabtsi kom cawm tau tsevneeg?
– Nau-es lub nkoj muaj lub ntsiab li cas txog Vajtswv txojkev cawmdim?
– Peb cheemtsum yuav tsum ua li cas?
Thaum tej neeg ua phem ua qias thiab ua tsis ncaj, Vajtswv txiav txim siab “ua kom lawv raug kev puastsuaj tas huv tibsi mus” (nqe 13). Txawm yog li ntawd los, Vajtswv nco txog Nau-es tus uas txaus Nws siab, thiab Nau-es tsevneeg. Yog li, Nws qhia kom Nau-es txua ib lub nkoj, Vajtswv qhia txua ib yam zuj zus, muab dabtsi txua, qhia txua lub nkoj ntev dav thiab sab hauv nkoj tso dabtsi. Lub nkoj no yuav cawm Nau-es tsevneeg, dua li yuav cawm txhua yam tsiaj thaum Vajtswv tso dej nyab ntiajteb.
Nau-es lub nkoj yog qhov kev cawmdim, tej neeg sawvdaws thiab txhua yam tsiaj puavleej raug puastsuaj tas. Vajtswv yog tus uas teem muaj txojkev cawmdim no, tsis yog Nau-es ua tau. Vajtswv Txojlus qhia paub Vajtswv kuj npaj muaj kev cawmdim rau neeg ntiajteb. Txawm yog neeg ntiajteb puavleej ua txhaum thiab tsis muaj leejtwg cawm tus kheej los Vajtswv npaj kev cawmdim uas yog tso Nws Leej Tub nqis los ua txojkev cawmdim, “Vajtswv txojkev hlub uas nws muab pub dawb rau neeg yog nws txib Yexus Khetos los tuag txhiv neeg kom dim txim, Vajtswv thiaj suav hais tias neeg ncaj ncees tabmeeg Vajtswv. Vajtswv txib Yexus Khetos los tuag theej neeg lub txhoj thiab nws cov ntshav ntxuav neeg tej kev txhaum, Vajtswv thiaj zam tau neeg lub txim, vim neeg ntseeg Yexus Khetos” (Loos 3:24-25). Tswv Yexus yog “lub nkoj cawmdim” rau cov neeg uas tso kev txhaum tseg thiab ntseeg Nws.
Vajtswv hais rau Nau-es paub ua ntej txog tej xwm yuav muaj los thiab qhia txojkev cawmdim rau Nau-es. Nau-es ua raws li txhua yam Vajtswv hais (nqe 22). Tus uas sau phau ntawv Henplais qhia hais tias Nau-es ua qhov ntawd los ntawm txojkev ntseeg, “Twb yog vim Nau-es ntseeg, Nau-es thiaj mloog Vajtswv lus. Vajtswv qhia rau Nau-es txog tej xwm txheej uas yav tom ntej yuav muaj los uas Nau-es qhovmuag tsis pom. Nau-es thiaj txua ib lub nkoj, Nau-es thiab nws tsevneeg thiaj dim kev ploj kev tuag” (Henplais 11:7). Nimno, Vajtswv kuj ceebtoom txog txojkev rau txim yuav los tom ntej uas raug tibneeg lub neej, thiab Nws kuj qhia txojkev cawmdim hauv Tswv Yexus rau peb. Vajtswv caw kom tibneeg los cuag Nws, los vamkhom “Lub Nkoj Cawmdim” uas yog tso kev txhaum tseg, ntseeg Tswv Yexus, cia Nws ua tus Tswv cawmseej thiab ua thawj rau lub neej kom tau txojsia ntev ibtxhis. Xav kom peb txhua tus puavleej ua zoo li Nau-es ua, paub “hwm tus Tswv” thiab ntseeg Vajtswv khov kho.
Thov Vajtswv,
Vajtswv, ua Koj tsaug vim txoj koob hmoov pub dawb uas Koj muab rau nyuam yaus hauv Yexus Khetos. Thov Koj pab kom nyuam yaus ntseeg ruaj Tswv Yexus yog “Lub Nkoj Cawmdim” rau nyuam yaus. Thov pab nyuam yaus ua tau siab tawv qhia txojkev cawmdim no rau cov neeg uas tabtom yuam kev. Nyuam yaus tuav Tswv Yexus lub npe thov, Amees.
Peb zeem paub tias yus tabtom nyob hauv “Lub Nkoj Cawmdim” los yog tseem ua li neeg ntiajteb?
Nyeem Vajluskub hauv peb lub xyoo: Phau Ntawv Nkauj 89
Kênh Youtube BHKTHN:
