Blŭng a 6:11-22
“‘Bok Nôê sơ̆ kư̆m yua kơ sư lui, na lăp sư kơtơ̆ng ‘Bok Kei-Dei khan kơ sư ning mônh gô đei tơdrong truh na sư lui hloi. Sư pơm minh pôm duk tih wă dŏng pơklaih hnam dơnŏ sư” ( Hêbrơ 11:7)
Nơ̆r jet tơchĕng pơwao:
– Kơplah wă pơrăm teh đak âu , Kră Yang ‘Bok Kei-Dei đei bơtho tơ’bôh kơ‘bok Nôê pơm kiơ wă kơ bơwei tơdrong arih?
– Duk ‘bok Nôê wă bơtho tơ’bôh thoi yơ lăm tơdrong Kră Yang đei bơtho tơ’bôh lê̆ adrol ?
– Lu bơ̆n kăl kơ pơm thoi yơ?
‘Bơ̆t anăp tơdrong răm rai păng tơdrong kơnê̆ kon bơngai, Kră Yang ‘Bok Kei-Dei khan “Inh gô pơrăm đĭ kon bơngai,”(trong 13). Mă khan thoi ei, Kră Yang oei ‘blŏk kơ ‘bok Nôê bơngai mă đei pŭn ‘bơ̆t anăp Sư, păng đĭ lăm hnam dơnŏ su. Yua thoi noh. Kră Yang bơtho tơ’bôh kơ sư pơm duk hăm se le tôm tơdrong, đơ̆ng tơmam wă pơm duk truh tơ pơm tih iĕ sư tŏ yơ păng dôm tơdrong gah lăm duk noh. Duk âu gô bơwei tơdrong arih hnam dơnŏ ‘bok Nôê, kư̆m gô bơwei tơdrong arih đĭ-đăng păng đĭ-đăng lu sem tơmam arih lăm duk kơplah Kră Yang yua đak lip wă pơrăm đĭ-đăng bơngai lăm teh đak.
Duk ‘bok Nôê jing thoi tơmam wă dŏng pơklaih lăm năr kơplah kon bơngai păng đĭ-đăng sem tơmam arih tơ ala teh Kră yang ‘Bok Kei-Dei wă pơrăm. Đơ̆ng Kră Yang ‘Bok Kei-Dei jơ̆ Tơ’ngla đei dan hơmet lê̆ tơdrong wă dŏng pơklaih âu ưh kơsĭ yua đơ̆ng adrin dah chă đon đơ̆ng ‘bok Nôê. Sơ̆p Hla bơar ‘Bok Kei-Dei tơbăt Kră Yang ‘Bok Kei-Dei đei tơdă hơmet lê̆ tơdrong dŏng pơklaih dĭ-đăng kon bơngai. Kơplah đĭ-đăng kon bơngai lăm teh đak pơm yoch păng ưh kơ đei minh ‘nu bơngai bu mă gơh dŏng pơklaih sư kơdih na Kră Yang ‘Bok Kei-Dei wơh Kon Pôm Sư jur lăm teh đak wă pơm keh tơdrong dŏng pơklaih. “ Mă-lei ‘Bok Kei-Dei oei ‘mêm kơ kon bơngai jô̆ kon bơngai jing ‘lơ̆ng hăm Sư. Sư mơnat ăn đĕch. Yua kơ Sư mơnat na Sư Yêsu Krist huai iŏk bơ̆n ‘Bok Kei-Dei ăn Kon Sư pơm tơmam soi wă dŏng pơklaih lu đe bu đei đon lui kơ pham Kon Sư” (Rôm 3: 24-25). Kră Yang Yêsu bơih “Duk Dŏng Pơklaih” lu bơngai băt tơbral tơdrong yoch păng lui gơnang kơ Sư.
Kră Yang ‘Bok Kei-Dei khan lê̆ hơdrol kơ ‘bok Nôê, gah tơdrong wă sek tơlang păng ăn kơ đei trong wă dŏng pơklaih. Sư pơm kiơ̆ dôm tơdrong Kră Yang khan (trong 22). Bơngai chih kơthơ Hêbrơ đei tơblang khan sư pơm kiơ̆ dôm tơdrong ‘noh yua kơ đei đon lui, “‘Bok Nôê sơ̆ yua kơ sư đei đon lui, na lăp sư kơtơ̆ng ‘Bok Kei-Dei khan kơ sư ning mônh gô đei tơdrong truh na sư lui hloi. Sư pơm minh pôm duk tih wă dŏng pơklaih hnam dơnŏ sư” (Hêbrơ 11:7). Dang ei, Kră Yang ‘Bok Kei-Dei kư̆m khan lê̆ adrol lăm tơdrong wă dŏng pơklaih lăm tơdrong sek tơlang gô truh tơ anăp gô ‘bơm lăm tơdrong arih ling-lang, păng Sư ăn trong wă dŏng pơklaih lăm Kră Yang Yêsu. Kră Yang ‘Bok Kei-Dei oei krao kon bơngai athei jah năm bĕ, oei lăm “Duk Dŏng Pơklaih” hăm tơdrong tơbral tơdrong yoch, dan đon lui lăm Kră Yang Yêsu. Sơng iŏk Sư pơm ‘Bok Dŏng Pơklaih păng pơm Tơ’ngla lăm chăl arih bơ̆n wă kơ đei arih păng arih ling-lang. Hơpơi wă rim ‘nu lu bơ̆n kư̆m lei-lăi thoi ‘bok Nôê, băt “đĭ jơhngơ̆m hli yom” păng đĭ jơhngơ̆m lui gơnang kơ Kră Yang ‘Bok Kei-Dei.
Ơ Kră Yang, inh bơnê kơ Ih yua kơ tơdrong mơnat ăn đĕch đơ̆ng Ih na inh gơh klaih đơ̆ng lăm Kră Yang Yêsu. Apinh Ih ăn kơ inh oei kơjăp lăm Kră Yang Yêsu jơ̆ “ `Duk Dŏng Pơklaih” chăl arih inh. Apinh Ih tơgŭm inh pơ̆n nuih ră roi tơdrong dŏng pơklaih âu kơ lu đe bu mă oei wơ̆l jrok lăm chăl âu. Yua anăn Kră Yang Yêsu Krist, Amen.
Lu bơ̆n hăm băt tơpă bơ̆n oei lăm “Duk Dŏng Pơklaih” dah oei môch glơ̆k hiong lăm teh đak âu?
Đŏk Sơ̆p Hla ar ‘Bok Kei-Dei lăm pêng sơnăm: Hơriso 89.
Kênh Youtube BHKTHN:
