Mathiơ 23:34-36
“Inh khan kơ iĕm tơpă, yua kơ dôm lu bơngai mă yă ‘bok iĕm pơlôch noh ‘Bok Kei-Dei kư̆m wă phak iĕm hơgop hăm lu sư mơ̆n.” (Mathiơ 23:36)
Nơ̆r jet tơchĕng pơwao:
– Kră Yang Yêsu pơma kơ lu bơngai Juđê arih sa hăm lu bơngai mă Kră Yang wơh thoi yơ?
– Lu sư gô pŭ iŏk tơdrong kiơ?
– Lu bơ̆n đei tơdrong pơlung liơ kơplah oei lăm tơdrong gleh truh gah đon lui bơ̆n?
Kră Yang yua lu nơ̆r bơ̆n juăt kơ pơma, “bơngai pơtruh nơ̆r ‘Bok Kei-Dei, lu bơngai hơgei, păng lu bơngai pơm ‘bok bơtho” wă pơma kơ lu bơngai pơgơ̆r lăm Khul Bơngai Lui blŭng a. Kră Yang khan lê̆ adrol gah lu bơngai pơgơ̆r gah bơhngol hơlĕnh păng bơngai Juđê gô pơm kơ lu bơngai mă đei đon lui kơ Kră Yang tơpă. Lu sư gô tơ’bơ̆p hăm tơdrong pơm kơnê̆ đơ̆ng lu bơngai Juđê, iĕm rôp pơlôch, iĕm pơ̆ng tơ ‘long pơglang, iĕm teh tach păng sơnguĕt, păng iĕm kư̆m pơpuh lu sư jăk đơ̆ng pơlei âu pơlei to. Pham mă ưh kơ đei yoch đơ̆ng lu bơngai lui lôch yua kơ tơdrong lui gô lĕch ro jơ̆p teh đak, păng yua kơ đơ̆ng tơdrong pơm kơnê̆ kơ lu bơngai lui kơ Kră Yang Yêsu pơtơm đơ̆ng bơngai Juđê thoi noh lu sư athei chu pŭ iŏk đơ̆ng tơdrỏng lu sư pơm kơnê̆ kơ lu bơngai tơpăt tuh pham.
Kră Yang Yêsu tơ’blŏk ming đơ̆ng chăl ‘bok ‘bok A’bel truh tơ Sachara ‘bok khan lê̆ adrol, bơngai mă khan lê̆ adrol tuch luch lăm chăl Pah so, bơngai mă đe pơlôch “Tơhnam ‘Bok Kei-Dei tơm” (trong 35). Tơ’bôh tơdrong pơm kơnê̆ pơlôch bơngai lui ưh kơ sĭ tơdrong ‘noh ‘nao đei đơ̆ng bơngai Juđê ôh, mălei lăm chăl adrol sơ̆ lơ wơ̆t lu sư kư̆m pơlôch lu bơngai khan lê̆ adrol kơ Kră Yang bơih. Kră Yang pơma pơtôch gah tơdrong Sư phak lu yă ‘bok bơngi Juđê: “Inh khan kơ iĕm tơpă , yua kơ dôm lu bơngai mă yă ‘bok iĕm pơlôch ‘noh ‘Bok Kei-Dei kư̆m wă phak iĕm hơgop hăm lu sư mơ̆n”. Nơ̆r Kră Yang đei khan lê̆ adrol noh đei ‘bôh hloi tơpă lăm sơnăm 70 đơ̆ng rŏng kơ Kră Yang (Đ.K).
Bơngai lui dang ei, kư̆m tơ’bơ̆p tơdrong pơgăn pơm kơnê̆, pơlôch kơplah roi tơdrong lui kơ Kră Yang. Kră Yang Yêsu đei khan bơih kơ lu bơngai pơhrăm păng Sư: ““Mă lu iĕm athei ‘blŏk gah tơdrong Inh bơtho hei: ‘Đĭch ưh kơ lah tih hloh kơ yŏng sư.’ Đe pơm kơnê̆ kơ Inh păng đe gô pơm kơnê̆ kơ iĕm mơ̆n. Đe lui yom kơ nơ̆r Inh bơtho dang yơ, đe kư̆m lui yom kơ nơ̆r iĕm bơtho dang noh mơ̆n.” (Yôhan 15:20). Đei pơlung kơ bơ̆n pran hloh lăm đon lui kơplah lăng kơmĭl lu bơngai mă lôch yua kơ đon lui lăm jơhnơr blŭng a sơ̆, lu sư chu iŏk lôch wă bơwei đon lui. Kơplah oei lăm tơdrong pơmat, pơm kơnê̆ bơ̆n băt thoi âu bơ̆n ưh kơ oei minh drô̆ pơsĕl ôh yua kơ mă bu bu lui kơ Kră Yang tă kơ chu iŏk tơdrong pơmat ngăl, pơm kơnê̆ thoi ‘bok Pêtrôs đei bơtho: “Thoi noh na bơ̆n athei lui mă kơjăp wă kơ bơ̆n gơh puh sư mă ataih. Iĕm kư̆m băt boih đĭ đăng ‘nhŏng oh bơngai lui oei jơ̆p-jang kơ teh đak tă đei tơdrong gleh thoi iĕm mơ̆n.” (I Pêtrôs 5:9). Bơ̆n kư̆m băt Kră Yang ‘Bok Kei-Dei đei tơ’bôh hloi tơpă đơ̆ng ‘bok khan lê̆ adrol thoi yơ lei na Sư kư̆m tơ’bôh dôm lu nơ̆r khan lê̆ adrol gah tơdrong phak kon bơngai thoi noh, “Mă dang ei Sư kư̆m pơkă khan wă pơrăm plĕnh pơrăm teh đak wă soh păng ŭnh. Truh năr Sư sek tơlang ning-mônh Sư pơrăm tơpă mơ̆n păng phak dôm lu bơngai mă ưh kơ lui kơ Sư lăm noh.” (II Pêtrôs 3:7).
Ơ ‘Bă mă ‘mêm mơnat, bơnê kơ Ih yua kơ inh đei băt kơ Ih, apinh Ih thim jơhngơ̆m pran kơ inh wă kơ inh kĕ chu iŏk dôm tơdrong pơmat, pơm kơnê̆ păng kơjăp lăm đon lui wă kiơ̆ Kră Yang ding đĭ chăl arih. Krao khan yua anăn Kră Yang Yêsu Krist, Amen.
Bơ̆n wă kơ tuch luch bơ̆n gô tơ’bơ̆p Kră Yang dah lê̆ Kră Yang phak? Bơ̆n kăl kơ tơchĕng pơwao păng pơm hloi!
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 81-82
Kênh Youtube BHKTHN:
