Klei Aê Diê Blŭ: Y-Yôsuê 7:10-15
Êlan kliăng: “Ƀiădah phung ƀuôn sang Israel amâo ngă tui si klei mtă djŏ kơ mnơ̆ng pioh brei leh kơ Yêhôwa; kyuadah Y-Akan anak êkei Y-Karmi, čô Y-Sapdi, čĕ Y-Sêra, mơ̆ng găp djuê Yuđa mă đa đa mnơ̆ng anăn. Snăn Yêhôwa čuh ai ngêñ kơ phung ƀuôn sang Israel.” (Y-Yôsuê 7:1)
Klei êmuh ksiêm mĭn: Ya klei Aê Diê brei Y-Yôsuê ngă? Ya ngă Aê Diê mtă kơ Y-Yôsuê leh anăn phung ƀuôn sang Aê Diê brei drei jing doh jăk? Klei soh drei hmăi kơ hlei pô? Ya klei drei ngă čiăng msir mgaih klei soh?
Leh bi blah amâo dưi ôh hŏng ƀuôn Ahi, Y-Yôsuê ngă leh klei djŏ snăk jing nao hŏng Aê Diê wah lač. Khădah snăn, tơdah ka dưi msir mgaih ôh klei soh snăn wah lač ăt kăn srăng mâo boh tŭ rei. Aê Diê lač kơ Y-Yôsuê kgŭ kdơ̆ng, đăm kŭp ƀô̆ ti lăn ôh. Aê Diê čiăng kơ ñu mâo bruă ngă čiăng msir mgaih klei soh. Êlâo hĭn, Aê Diê brei thâo Israel ngă soh leh, diñu bi kdơ̆ng leh hŏng klei bi mguôp hŏng Aê Diê mtă leh. Israel mă leh dŭm mta mnơ̆ng năng bi rai. Hlăk mă mnơ̆ng jing dŏ Aê Diê, diñu jing phung knĕ, lŏ ngă mgưt msĕ si amâo thâo ôh, jing klei luar. Leh thâo mta phŭn Israel bi blah amâo dưi ôh, Aê Diê hưn sa klei sĭt huĭ hyưt snăk: Hbĭl diñu ka mă mđuê̆ ôh mơ̆ng krah diñu mnơ̆ng năng bi rai snăn Israel jing phung arăng tăm pah, năng bi rai. Ñu amâo srăng lŏ dôk mbĭt hŏng diñu ôh, jing Aê Diê amâo srăng lŏ brei klei dưi hĭn hlăm klei bi blah kơ diñu ôh, ƀiădah phung roh srăng bi rai diñu.
Aê Diê lŏ dơ̆ng lač kơ Y-Yôsuê brei kgŭ kdơ̆ng, leh anăn tal anei brei thâo ya klei ngă čiăng mă hĕ mnơ̆ng năng bi rai kbiă mơ̆ng Israel. Hdră bi mrâo mphŭn hŏng klei bi doh. Msĕ si êlâo kơ găn êa krông Yurdan, brei diñu bi doh diñu pô (Y-Yôsuê 3:5).Bi doh amâo djŏ knŏng čiăng lăm lui klei soh ôh ƀiădah lŏ mprăp ai tiê phung ƀuôn sang čiăng kơ Aê Diê nao leh anăn ngă bruă ti krah diñu. Aê Diê ăt ktrâo kơ Y-Yôsuê klei thâo ƀuh pô ngă soh. Pô anăn mbĭt hŏng jih gŏ sang ñu srăng tŭ klei čuh hlăm pui.
Klei soh Y-Akan hmăi leh kơ jih jang phung ƀuôn sang Aê Diê. Klei Y-Akan ngă soh hŏng klei bi mguôp ngă kơ jih jang phung ƀuôn sang ăt ngă soh hŏng klei bi mguôp. Klei soh drei khăng amâo hmăi kơ hjăn drei pô ôh. Klei soh anak ngă kơ amĭ ama hêñ; klei soh amĭ ama bi knap anak čô; ung tlĕ piu bi knap kơ mô̆, anak aneh, amĭ ama dua nah… Sa čô ngă soh srăng ngă kơ pô mkăn tui hlue ngă soh. Klei soh sa čô phung đăo kơ Krist srăng hmăi kơ sa Phung Sang Aê Diê alŭ wăl, kjham hĭn sa êpul êya phung đăo kơ Krist. Êlâo kơ klei ngă soh, brei čih dŭm čô srăng tŭ klei hmăi kyua klei soh pô, snăn srăng ƀuh anăn amâo djŏ ênoh mrô ƀiă ôh. Klei soh Y-Akan ngă djiê leh tlâo pluh năm čô mnuih leh anăn jih jang gŏ sang ñu (Y-Yôsuê 7:5, 24).
Akâo kơ Aê Diê đru drei kgŭ, msir mgaih klei soh, čiăng dưi mâo klei hdĭp tŭ dưi, mâo Aê Diê kiă kriê leh anăn ba klei jăk mơak kơ phung srăng tŭ klei hmăi kyua klei soh pô.
Klei hdĭp drei dôk ba klei hmăi jhat kơ pô mkăn mơ̆?
Wah lač: Ơ Khua Yang, akâo kơ Ih đru kâo ksiêm dlăng pô leh anăn gĭr lăm lui jih klei soh dôk mâo hlăm klei hdĭp kâo čiăng kơ kâo amâo hmăi jhat kơ gŏ sang leh anăn Phung Sang Aê Diê ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
